သျှမ်းပြည်တောင်ပိုင်း ရပ်စောက်မြို့နယ် အင်တောမြို့နယ်ခွဲ ကျောက်ဂူကျေးရွာအုပ်စုရှိ ကျေးရွာများကို တိုင်းရင်းသားလက်နက်ကိုင်တစ်စုက ဆက်ကြေးကောက်ခိုင်းနေကြောင်း သတင်းရရှိသည်။

ပြီးခဲ့သည့် ဇူလိုင်လကုန် ၃၀ ရက်တွင် ထိုလက်နက်ကိုင်တပ်ဖွဲ့မှ ကျေးရွာအုပ်ချုပ်ရေးမှူးများထံတွင် စကားပါးလာပြီး ဆက်ကြေးကောက်ခိုင်းကြောင်း သိရသည်။

“သူတို့ ကျနော်တို့ ပြည်သူတွေကိုခေါ်တာတော့မရှိဘူး။ အုပ်ချုပ်ရေးမှူးတွေ အကြီးတွေကို စည်းဝေးခေါ်ပြီးတော့ ပြောလာတာတဲ့။ ဆက်ကြေးကောက်ခိုင်းတာ။ ဖုန်းဆိုင်တွေဆို ဘယ်လောက်ပေးရမယ်ဆိုပြီးတော့ စာရေးလာပေးတာ။ အဲ့အတိုင်း ဒီဩဂုတ်လထဲမှာ ဆက်ကြေးထပ်ပေးရမယ်တဲ့” ဟု အမည်မဖော်ပြလိုသည့် ကျောက်ဂူဒေသခံ အမျိုးသားတစ်ဦးက ပြောသည်။

အဆိုပါ ဆက်ကြေးကောက်ခိုင်းသည့် လက်နက်ကိုင်သည် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) ဖြစ်ကြောင်း ကျောက်ဂူကျေးရွာအုပ်စုအတွင်းရှိ အုပ်ချုပ်ရေးမှူးတစ်ဦးက သျှမ်းသံတော်ဆင့် ကိုပြောသည်။

“ ဒီဒေသမှာက လှုပ်ရှားနေတာ တပ်ဖွဲ့ ၂ ခုရှိတယ်။ မြောက်ပိုင်းနဲ့ RCSS/SSA တို့ရှိတယ်။ အခုဆက်ကြေး ကောက်ခိုင်းတာတော့ RCSS/SSA တပ်ဖွဲ့က ကောက်ခိုင်းတာပါ။ စကားနဲ့ပြောလာတာပေါ့။ ပြေစာတွေနဲ့ ပေးလာတာတော့မရှိဘူး။ ဒီလအတွင်းအကုန်ပေးရမယ်။ အခုချိန်ထိတော့ ဘယ်သူမှ ဆက်ကြေးသွားပေး တာမရှိသေးပါဘူး” ဟု ၎င်းက ဆိုသည်။

လက်ရှိနိုင်ငံရေးအခြေနေကြောင့် ပြည်သူများစားဝတ်နေရေး ခက်ခဲချိန်တွင် ဆက်ကြေးကို ဈေးကြီးတောင်း နေသည့် အတွက်ကြောင့် ပြည်သူများအတွက် စားဝတ်နေရေးခက်ခဲနေကြောင်း သိရသည်။

“ခက်ခဲတာပေါ့။ အရမ်းခက်ခဲတယ်။ သူတို့တောင်းတဲ့ ဆက်ကြေးကလည်းဈေးနည်းတာမဟုတ်ဘူး။ သိန်းချီပြီး တောင်းတာလေ။ ပြီးတော့ ကျနော်တို့လည်းအခုက ရှာစားဖို့က တော်တော်လေး ခက်ခဲတယ်။ စားဝတ်နေရေးအတွက်လည်း အဆင်မပြေဘူး” ဟု ကျောက်ဂူကျေးရွာအတွင်းရှိ ဒေသခံ တစ်ဦးက ပြောသည်။

အဆိုပါ ကျောက်ဂူကျေးရွာအုပ်စုအတွင်းရှိ ကျေးရွာ ၂၇ ရွာလုံးကို ကျေးရွာတစ်ခုတွင် ခန့်မှန်းခြေအရ တစ်ရွာကို အိမ်ခြေ ၂၀၀ ကျော်ရှိကြောင်းသိရသည်။

ရပ်စောက်မြို့နယ်ခွဲ အင်တောမြို့နယ် ကျောက်ဂူကျေးရွာအုပ်စုအတွင်း RCSS မှ ဆက်ကြေးကောက်ယူသည့်ကိစ္စနှင့် ပတ်သက်ပြီး သျှမ်းသံတော်ဆင့်မှ အကြိမ်ကြိမ်ဆက်သွယ်မေးမြန်းရာ ပြန်လည်ဖြေကြားခြင်းမရှိပေ။

ထို့အပြင် သျှမ်းပြည်တောင်ပိုင်း လွိုင်လင်ခရိုင် ပင်လုံမြို့ ဆနင်းဒေသအတွင်းမှ ဒေသခံပြည်သူများကို SSPP/SSA တပ်ဖွဲ့မှ တပ်သားသစ်အတွက် စာရင်းကောက်ခြင်း ဖမ်းခေါ်ခြင်းများ ပြုလုပ်နေကြောင်း အမည်မဖော်လိုသူ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ဒီဒေသထဲမှာရှိတဲ့ RCSS နဲ့ သိတဲ့သူတွေ ပတ်သက်ဖူးတဲ့ ဆွေးမျိုးရှိတဲ့သူတွေရဲ့ အမည်စာရင်းနဲ့တကွ လာဖမ်း တာမျိုးတွေ ရှိသလို အသက် ၁၈ နှစ်ပြည့်ပြီးတဲ့ ရွာသားတချို့ကိုလည်း စစ်သားစုဆောင်းဖို့လာခေါ်တယ်၊ RCSS နဲ့ ပတ်သက်တယ်ဆိုပြီး ဖမ်းခေါ်ခံရတဲ့ တချို့တွေက ဘယ်ကိုရောက်သွားမှန်းမသိကြဘူး” ဟု အထက်ပါ ပုဂ္ဂိုလ် ကပြောသည်။

အာဏာသိမ်းခေါင်းဆောင် ဗိုလ်ချုပ်မှူးကြီး မင်းအောင်လှိုင် နှင့် RCSS/ SSA ဥက္ကဋ္ဌ ဗိုလ်ချုပ်ကြီး ယွက်စစ် တို့သည် မေ ၂၀ ရက်က တွေ့ဆုံခဲ့သည်။

အလားတူ (SSPP/SSA) သည် အာဏာသိမ်း စစ်ကောင်စီ နှင့် တွေ့ဆုံ ဆွေးနွေးရန်အတွက် သြဂုတ် (၂) ရက်နေ့က နေပြည်တော်သို့ ရောက်ရှိသွားပြီဖြစ်ကြောင်း သိရှိခဲ့သည်။