ပင်လုံမြို့မြောက်ဘက်တွင် တိုက်ပွဲဖြစ်

0

သျှမ်းပြည်တောင်ပိုင်း ပင်လုံမြို့ စန့်ကျန်းကျေးရွာတွင် စစ်ကောင်စီ ပူးပေါင်းတပ်ဖွဲ့နှင့် တိုင်းရင်း သား လက်နက်ကိုင်တပ်ဖွဲ့တို့ တိုက်ပွဲဖြစ်ပွားခဲ့ကြောင်း သတင်းသိရသည်။

ပင်လုံမြို့

ယမန်နေ့( သြဂုတ်လ ၁ )ရက်တွင် ပင်လုံမြို့ နှင့် လေးမိုင်ခန့်ကွာဝေးသည့် စန့်ကျန်းရွာ တွင် နယ်မြေလှည့်လာသည့် စစ်ကောင်စီနှင့် ပအိုဝ့်ပြည်သူ့စစ် PNA တို့နှင့် ဒေသအတွင်းရှိနေသည့် သျှမ်းပြည် တိုးတက်ရေးပါတီ၊သျှမ်းပြည်တပ်မတော် (SSPP) တို့ ထိတွေ့တိုက်ပွဲ ဖြစ်ပွားခဲ့ကြောင်း ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

“စန့်ကျန်းရွာက တောင်ပေါ်ရွာဖြစ်ပါတယ်၊ အဲ့ဖက်မှာ SSPP/SSA ပူးပေါင်းတပ်ဖွဲ့တို့က စခန်းချလှုပ်ရှားနေတာပါ။ နယ်ကျွံပြီးရောက်လာတဲ့ ပအိုဝ့်ပြည်သူ့စစ်နဲ့ စစ်ကောင်စီပူးပေါင်းတပ်ဖွဲ့တို့က SSPP/SSA နဲ့တွေ့ပြီး တိုက်ပွဲ ဖြစ်ပြီး ပအိုဝ့်ပြည်သူ့စစ်ဘက် ၂ ဦးကျတယ်လို့သိရတယ်” ဟု အသက် ၄၀ ဝန်းကျင် အမည်မဖော်လိုသူ ဒေသခံအမျိုးသား တစ်ဦးက ပြောသည်။

ပြီးခဲ့သည့် ဇူလိုင်လ အတွင်းတွင် စစ်ကောင်စီနှင့် ပအိုဝ့်ပြည်သူ့စစ်ပူးပေါင်းတပ်ဖွဲ့သည် ဟိုပုံးမြို့နယ် ပန်မုန့် နှင့် ကျောက်တန်းဘက် လှုပ်ရှားရာမှတစ်ဆင့် လက်ရှိတွင် ပင်လုံမြို့အတွင်း နယ်ကျွံရောက်လာကြောင်းလည်း ဒေသခံများက သျှမ်းသံတော်ဆင့်ကို ပြောသည်။

“တမင်ရည်ရွယ်ပြီး လာတာလား နယ်ကျွံပြီးဝင်လာသလားတော့ မပြောတတ်ဘူး၊ စစ်ကောင်စီတွေနဲ့ SSPP/SSA က အစကတည်းက စစ်ရေးတင်းမာမှုရှိနေတာ့ ထိတွေ့မှုရှိတာနဲ့ တိုက်ပွဲဖြစ်တာထင်တယ်” ဟု အထက်ပါ ပုဂ္ဂိုလ်က ဆက်လက်ပြောဆိုထားသည်။

သျှမ်းပြည်တောင်ပိုင်းအတွင်းရှိ ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA တပ်စခန်း နေရာ သုံးခုကို ဆုတ်ခွာရန် စစ်ကောင်စီတပ်ဖွဲ့၏ ညွှန်ကြားမှုကို ငြင်းပယ်သည့်အတွက် သျှမ်းပြည်တောင်ပိုင်းအတွင်း SSPP/SSA နှင့် စစ်ကောင်စီတို့က စစ်ရေးတင်းမာနေခြင်းဖြစ်သည်။

လက်ရှိတွင် လွိုင်လင်ခရိုင်အတွင်း နှင့် ရပ်စောက်မြို့နယ်တို့ဘက်၌ နှစ်ဖက်စစ်အင်အားဖြည့်တင်းမှုနှင့် စစ်ရေးတင်းမာမှုရှိနေကြောင်း သတင်းသိရသည်။

Leave a Comments