သျှမ်းပြည်တောင်ပိုင်း ပင်လုံမြို့ လောင်းကစား များပြားလာသည့်အပြင် ဈေးထဲတွင်လည်း ပေါ်တင်ခိုးယူ လုယက်မှုများလည်း ရှိနေကြောင်း စုံစမ်းသိရသည်။
စစ်တပ်က အာဏာသိမ်းပြီးနောက်ပိုင်း ပင်လုံမြို့တွင် ငါးပစ်ဂိမ်း၊ လောင်းကစားဝိုင်းများများပြားလာသည့်အပြင် ခိုးယူလုယက်မှုများ နှင့် သတ်ဖြတ်မှုများလည်း ရှိကြောင်း ပင်လုံမြို့ဒေသခံအမျိုးသားတစ်ဦး က သျှမ်းသံတော်ဆင့်ကို ပြောသည်။
“အရင်ကတော့ ဘယ်သူမှ ဘာမှ ဖွင့်လို့မရဘူး။ အခုခေတ်ကျတော့ ရဲတွေ၊ စစ်သားတွေ လုပ်နေကြတယ် ဆိုတော့ အကုန်ဖွင့် နေတာပဲ။ ဘာမှပြောလို့မရတော့ဘူး။ ငါးပစ်ဂိမ်းတွေလည်း ဖွင့်လာတာ ကြာနေပြီ” ဟု ပင်လုံမြို့ ဒေသခံ အမျိုးသားတစ်ဦးက ပြောသည်။
အလားတူ ယခုလအတွင်း ပင်လုံမြို့မဈေးအတွင်းတွင်လည်း ဆိုင်ကယ်ဖြင့်မောင်းလာပြီး အဖွားတစ်ဦးထံ ဖုန်းလုယူပြီး ထွက်ပြေးသွားခဲ့ကြောင်း သိရသည်။
“ဈေးထဲမှာဖြစ်သွားတာ။ လူတွေလည်းအများရှိတယ်။ ဆိုင်ကယ်စီးလာပြီးတော့ အဖွားရဲ့ လက်ထဲမှာရှိတဲ့ ဖုန်းကိုလုယူသွားတာ။ အဖွားက သူဈေးသုံးနေတဲ့အချိန်ဖြစ်တယ်။ လုယူသွားပြီးတော့ ပြန်လိုက်လို့လည်းမရဘူး။ ချက်ချင်းမောင်းထွက်ပြေးသွားတာ” ဟု ပင်လုံမြို့ ဒေသခံ အမျိုးသမီးတစ်ဦးက ပြောသည်။
ထိုအပြင် လောင်းကစားဝိုင်းများကြောင့် မိသားစုများအတွင်း မကြာခဏ ပြသာနာဖြစ်နေလျက်ရှိကြောင်း သိရသည်။
“ လောင်းကစားဆိုရင် ကောင်းကျိုးပြုတာတစ်ခုမှ မရှိဘူးလေ။ မိသားစုပြသာနာလည်း ခနခနဖြစ်တယ်။ လောင်းကစားကော၊ မူးယစ်ဆေးဝါးကြောင့်ကော မိသားစုပြသာနာတွေဖြစ်တယ်လေ။ အိမ်ဘေးက ဆို ခနခနရန်ဖြစ်သံတွေကြားလာတယ်” ဟု လွိုင်လင်မြို့ဒေသခံ အမျိုးသားတစ်ဦးက ပြောသည်။
ပြီးခဲ့သည့် မတ်လ ၁၂ ရက်တွင်လည်း ပင်လုံမြို့ထဲတွင် မူးယစ်ဆေးဝါးကြောင့် မိဘကို သားဖြစ်သူက ပြန်သတ်ဖြတ်ခဲ့ကြောင်းသိရသည်။
