သျှမ်းပြည်တောင်ပိုင်း မိုင်းရှူးမြို့နယ်အတွင်း အာဏာသိမ်း စစ်ကောင်စီလက်အောက်ခံ တိုင်းမှူးကိုယ်တိုင် စစ်ကြောင်းများကို ဦးစီးနေကြောင်း သတင်းသိရသည်။
ယမန်နေ့ (ဇူလိုင် ၂၅ ) ရက်တွင် အရှေ့ပိုင်းတိုင်းစစ်ဌာနချုပ် (ရပခ)၊ အရှေ့အလယ်ပိုင်းတိုင်းစစ်ဌာနချုပ် (ရလခ) နှင့် တြိဂံဒေသတိုင်းစစ်ဌာနချုပ် (တသခ) တို့မှ တိုင်းမှူးများသည် ကား ၆ စီးဖြင့် မိုင်းရှူးမြို့နယ်သို့ ရောက်လာကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“တိုင်းမှူး ၃ ယောက်လုံးက မိုင်းရှူးကို တစ်ပြိုင်နက်တည်းရောက်လာတော့ တစ်ခုခုထူးလို့နေမှာပါ၊ ပြီးတော့ ခိုလမ်တိုင်းမှူးကိုယ်တိုင် ဒီမိုင်းရှူးမြို့နယ်ထဲက စစ်ကြောင်းကို ဦးစီးမယ်လို့ ကြားတယ်၊ ဒီရက်ပိုင်းအတွင်းမှာ စစ်ကောင်စီတွေ အင်အားက SSPP/SSA ရှိတဲ့ဘက်ကို ပိုတိုးလာတယ်”ဟု ၎င်းအမျိုးသားက ပြောသည်။
လက်ရှိ မိုင်းရူးမြို့နယ်အတွင်း အခြေစိုက်လှုပ်ရှားနေသည့် SSPP/SSA တပ်စခန်းသုံးခုအနီးသို့ စစ်ကောင်စီတပ် လက်အောက်ခံ ခလရ (၁၅၀) တပ်ရင်းဌာနချုပ်မှ စစ်ကားကြီး (၆) စီးနှင့် မိုင်းရယ် ခလရ (၂၂) မှ စစ်ကားကြီး (၄) စီးတို့သည် လွိုင်နိုင်းဘက်သို့ စစ်အင်အား ဖြည့်တင်းခဲ့ကြောင်း ဒေသခံ အမျိုးသားက ဆက်လက်ပြောဆိုထားသည်။
ထို့အပြင် လက်ရှိတွင် စစ်ကောင်စီတပ်ဖွဲ့တို့သည် လွိုင်နိုင်းအနီးပတ်ဝန်းကျင် တစ်ဝိုက်ကို မြေပြင် စစ်အင်အား ဖြည့်တင်းမှုများ ရှိနေသည့်အပြင် ညသန်းခေါင်ယံတွင်လည်း လေယာဥ်နှင့် ကင်းလှည့်လေ့ရှိ ကြောင်း ဒေသတွင်းလှုပ်ရှားနေသည့် SSPP/SSA အရာရှိတစ်ဦးက သျှမ်းသံတော်ဆင့်ကို ပြောသည်။
“အခုရက်ပိုင်းအတွင်း ညသန်းခေါင်ဆို ကျနော်တို့ တပ်စခန်းနေရာတစ်ဝိုက်ကိုလေယာဥ်နဲ့ လာပတ်ကြည့်တာ၊ မြေပြင်မှာ စစ်အင်အားတွေဖြည့်နေတာ မနည်းတော့ဘူး၊ တဖြည်းဖြည်းနဲ့ ကပ်လာတဲ့ အနေထားပေါ့၊ ဒါပေမဲ့ စကစ တွေကျနော်တို့ မြေပေါ်ကျူးကျော်နေတာ နှစ်ပေါင်း ၇၀ ကျော်ရှိနေပြီလို့ စစ်ရေးအရ ဖြေ ရှင်းမှ ရမယ်ဆိုလည်း အသင့်ပါ” ဟု ၎င်းအရာရှိက ပြောသည်။
မြေပြင်စစ်ရေးတင်းမာမှုများကြောင့် SSPP/SSA တပ်ဖွဲ့မှလည်း စစ်ရေးအတွက် ကြိုတင်ပြင်ဆင်မှုများရှိ နေသည့်အပြင် ဒေသခံပြည်သူလူထုများ အတွက်ထိခိုက်နစ်နာမှုများမရှိအောင် စစ်ရေးထိန်းနေကြောင်း ၎င်းက ဆက်လက်ပြောဆိုထားသည်။
အာဏာသိမ်း စစ်ကောင်စီတို့သည် မိုင်းရှူးမြို့နယ်အတွင်း လှုပ်ရှားနေသည့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တို့၏ တပ်စခန်းနေရာ ၃ ခုကို ဆုတ်ခွာခိုင်းရာမှ ယနေ့အထိ စစ်ရေး တင်းမာမှုများ ဖြစ်ပေါ်နေခြင်းဖြစ်သည်။
ယင်းကဲ့သို့ စစ်ရေးတင်းမာနေသည့်အချိန် ပြီးခဲ့သည့် ဇူလိုင်လ ၁၈ ရက်တွင်လည်း အရပ်သား မောင်းနှင်လာသည့် ကားကို စစ်ကောင်စီ မှ သေနတ်ဖြင့် ပစ်ခတ်လိုက်သဖြင့် ကားပေါ်ပါလာသည့် မိသားစု (၃) ဦးစလုံး သေဆုံးသွားခဲ့ရသည်။
Leave a Comments