သျှမ်းပြည်မြောက်ပိုင်း မိုးမိတ်မြို့နယ်အတွင်း စစ်ကောင်စီတပ်ဖွဲ့တို့မှ စစ်အင်အားဖြည့် နေရာယူမှုများရှိနေကြောင်း သတင်းသိရသည်။
ယမန်နေ့ ဇူလိုင် ၂၅ ရက်တွင် စစ်ကောင်စီတပ် တပ်မ ၉၉ လက်အောက်ခံ ခလရ ၂၇၆ နှင့် ၃၄၈ တို့သည် နမ့်မိတ်ချောင်း မြောက်ဘက်ရှိ ရွှေကာလီဘုန်းကြီးကျောင်းအနီး နှင့် သရက်ချိုကျေးရွာ၊ ဆိုင်းလျန်(သဲနီ) ကျေးရွာ၊ စင့်ကင်စေတီကုန်း၊ စင့်ကင်ကျေးရွာ စသည့်နေရာများတွင် ထပ်တိုးလာသည့် စစ်အင်အားများနှင့် အတူ ဖြန့်ကျက်နေရာယူထားကြောင်း ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
“မနေ့က မွန်းလွဲပိုင်း ၂ နာရီလောက်မှာ တင်းတောင် တောင်ကုန်း (ၵွင်းတိုင်းတဝ်ႇ) ဘက်ကနေလာတဲ့ စစ်ကောင်စီတပ်က လက်နက်ကြီး (၈၁) မမ နဲ့ နမ့်နန်းကျေးရွာဘက်ကို ၇ လုံးလှမ်းပစ်တာ ၆ လုံး ပေါက်ကွဲသွားတယ်၊ အဲ့ဘက် မှာ KIA တွေနေရာယူထားတယ်ထင်ပြီး လှမ်းပစ်တာ၊ ပြည်သူထိခိုက်မှုတော့ မရှိဘူး” ဟု ၎င်းက ပြောသည်။
ပြီးခဲ့သည့် ၂၁ ရက်နေ့တွင်လည်း စစ်ကောင်စီ နှင့် KIA ပူးပေါင်းတပ်ဖွဲ့တို့သည် ဒေသအတွင်း တိုက်ပွဲပြင်းထန်စွာ ဖြစ်ပွားသည့်အတွက် စင့်ကင်ကျေးရွာ နှင့် ပန်ဆားစေးကျေးရွာတို့မှ ဒေသခံများသည် အိုးအိမ်စွန့်ခွာကာ စစ်ဘေးတိမ်းရှောင်ရကြောင်း သတင်းသိရသည်။
“ဇူလိုင် ၂၁ ရက်နေ့မှာဆိုရင် ရွာနှစ်ရွာက အိမ်ခြေ ၁၀၀ ကျော် နဲ့ လူဦးရေ ၃၀၀ နီးပါး စစ်ဘေးတိမ်းရှောင်ရတယ်၊ တချို့က မြို့ထဲမှာ သွားပြီးတိမ်းရှောင်နေရသလို တချို့ကလည်း စစ်ဘေးဒဏ်မရှိတဲ့ တောထဲမှာပဲ ဖြစ်သလို နေထိုင်ကြရတာ၊ ၂၅ ရက်နေ့မှာတော့ အခြေအနေ နည်းနည်းပြန်ကောင်းလာလို့ တချို့က အိမ်ကိုပြန် ရောက် ကြပြီ” ဟု အထက်ပါ ဒေသခံက ဆက်လက်ပြောဆိုထားသည်။
စစ်ရှောင်ပြည်သူများ အိမ်ပြန်သည့်အချိန်တွင် ရွာအနီးပတ်ဝန်းကျင် တစ်လျှောက်၌ စစ်ကောင်စီတပ်ဖွဲ့များ နေရာယူထားသည်ကို တွေ့မြင်ရသည့်အတွက် စိုးရိမ်စိတ်များ ရှိနေကြောင်းလည်း ဒေသခံများက ပြောသည်။
မိုးမိတ်မြို့နယ်အတွင်းတွင် ပြီးခဲ့သည့် ဇူလိုင် (၁) ရက်က စပြီး အာဏာသိမ်း စစ်ကောင်စီ တပ်ဖွဲ့နှင့် ရှမ်းပြည်တိုးတက်ရေးပါတီ / ရှမ်းပြည်တပ်မတော် (SSPP/SSA) တပ်ဖွဲ့တို့မှ တိုက်ပွဲစတင် ဖြစ်ပွားခဲ့ပြီးနောက် လက်ရှိ အချိန်ထိ အာဏာသိမ်းစစ်ကောင်စီတို့သည် KIA ပူးပေါင်းတပ်ဖွဲ့နှင့် တိုက်ပွဲဆက်လက်ဖြစ်ပွားနေကြောင်း သိရသည်။
