သျှမ်းပြည်မြောက်ပိုင်း ကွတ်ခိုင်မြို့နယ်အတွင်း ဖြစ်ပွားသည့် တိုက်ပွဲမှ ဦးခေါင်းပိုင်း လက်နက်ကြီး ကျည်ထိသည့် ကလေးငယ်သည် ယနေ့ ညနေပိုင်းအချိန်တွင် သေဆုံးသွားကြောင်း သတင်းသိရသည်။
ယနေ့ ဇူလိုင် ၂၅ ရက်နေ့ မနက် ၇ နာရီဝန်းကျင်တွင် လွိုင်ဆမ်ဆစ် တောင်ခြေရှိ မန်နောင် နှင့် နမ့်ပါခီးကြား တိုက်ပွဲဖြစ်ပွားခဲ့ပြီး အသက် ၃ နှစ်အရွယ် ကလေးငယ်ကို လက်နက်ကြီး ကျည်ထိမှန်ကာ ဆေးကုသမှုခံယူနေစဥ် တွင် သေဆုံးသွားခဲ့ကြောင်း အသက် ၄၀ ဝန်းကျင်အရွယ် အမျိုးသမီးက သျှမ်းသံတော်ဆင့်ကို ပြောသည်။
“ကလေးငယ်က ညနေ ၃ နာရီကျော်မှာဆုံးသွားတာပါ၊ ကွတ်ခိုင်ဆေးရုံကနေ လားရှိုးဆေးရုံကို ပြောင်းပေးခဲ့သေးတယ်၊ လားရှိုးဆေးရုံမှာဆုံးသွားတာ၊ ယူကြုံးမရတဲ့ ဖြစ်စဥ်ပဲ” ဟု အထက်ပါ အမျိုးသမီးက ပြောသည်။
အဆိုပါ တိုက်ပွဲကြား လက်နက်ကြီးကျည်ထိမှန်သည့် ကလေးငယ်သည် အသက် ၃ နှစ်အရွယ်ရှိ မိုင်းအငြိမ်း ဖြစ်ပြီး ဖခင် ဦးနမ်တီ နှင့် မိခင် ဒေါ်အေးဒွန်တို့၏ သား ဖြစ်ကြောင်း သတင်းသိရသည်။
ယမန်နေ့ ဇူလိုင် ၂၄ ရက်နေ့တွင် မန်နောင်ဘုန်းကြီးကျောင်းအတွင်း စစ်ကောင်စီတပ်ဖွဲ့တို့ လာရောက်စခန်းချရာမှ ယနေ့ မနက်ပိုင်းအချိန်တွင် ကချင်လွတ်မြောက်ရေးတပ်မတော် KIA မှ လာရောက်ပစ်ခတ်ပြီး တိုက်ပွဲဖြစ်ပွားခဲ့ခြင်း ဖြစ်ကြောင်း ဒေသခံများက ပြောသည်။
“စစ်ကောင်စီတွေသာ ရွာထဲ စခန်းလာမချရင် ဘုန်းကြီးကျောင်းထဲ လာမအိပ်ရင် အခုလို တိုက်ပွဲဖြစ်လာစရာ အကြောင်းမရှိဘူးလို့ မြင်သာပဲ၊ အခုချိန်ထိလည်း စစ်ကောင်စီတွေက ရွာထဲမှာ ရှိနေတုန်းပဲ၊ ပြည်သူတွေနေတဲ့ ရပ်ရွာနဲ့ ဝေးတဲ့နေရာမှာပဲ တိုက်ပွဲ ဖြစ်ကြပါ၊ ရွာနားမကပ်ကြပါနဲ့” ဟု မန်နောင်ရွာခံအမျိုးသားတစ်ဦးက ပြောသည်။
တိုက်ပွဲကြား လက်နက်ကြီးထိမှန် သေဆုံးခဲ့သည့် ကလေးငယ်ရုပ်အလောင်းကို မှုခင်းဆရာဝန်မှ ခွဲစိတ်စစ်ဆေးမည်ဖြစ်ကြောင်းနှင့် ခွင့်ပြုချက်ရပါက လားရှိုးမှာပင် သင်္ဂြိုလ်မည်ဖြစ်ကြောင်း သတင်းသိရသည်။
ကွတ်ခိုင်မြို့နယ်သည် တိုင်းရင်းသားလက်နက်ကိုင် ပေါင်းစုံလှုပ်ရှားနေထိုင်လျက်ရှိသည့် အပြင်တိုက်ပွဲလည်း မကြာခနဖြစ်ပွားလေ့ရှိသည့်အတွက် ဒေသခံများက ပြည်သူနေ ရပ်ရွာများနှင့် နီးသည့်နေရာတွင် တိုက်ပွဲ မဖြစ်ကြရန် တောင်းဆိုကြသည်။
Leave a Comments