တပ်မဆုတ်နိုင်ဟု SSPP မှ စစ်ကောင်စီထံ အကြောင်းပြန်

0

အာဏာသိမ်း စစ်ကောင်စီ တပ်ဆုတ်ခိုင်းသည့် သျှမ်းပြည်တောင်ပိုင်းရှိ ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တပ်စခန်း နေရာ ၃ ခုကို မဆုတ်နိုင်ဟု SSPP က အကြောင်းပြန်လိုက် ကြောင်းသတင်းသိရသည်။

SSPP

ဇူလိုင်လ ၂၁ ရက်တွင် SSPP မှ စစ်ကောင်စီကို အကြောင်းပြန်လိုက်ခြင်းဖြစ်ကြောင်း သိရပြီး စစ်ကောင်စီဘက်မှ နောက်တစ်ကြိမ် ဆွေးနွေးရန် ပြန်လည်ကမ်းလှမ်းလာခဲ့ကြောင်း SSPP/SSA ပြောရေးဆိုခွင့်ရှိသူ ဗိုလ်မှူးဖုန်းဟန် က သျှမ်းသံတော်ဆင့်ကို ပြောသည်။

“ကျနော်တို့က ဇူလိုင် ၂၀ ရက်နေ့မှာ ဒု ဗိုလ်ချုပ်ရာပြည့်ဆီကို လိပ်မူပြီး တပ်စခန်းနေရာတွေ မဆုတ်နိုင်ဘူးလို့ အကြောင်းပြန်လိုက်တယ်၊ တိုင်းမှူးဆီကိုလည်း မိတ္တူပို့လိုက်တယ်၊ လူထုကာကွယ်ရေးနဲ့ မွေးရပ်မြေကာကွယ် ရေးဆိုတဲ့ ကျနော်တို့ ရပ်တည်ချက်အတိုင်း လုပ်ဆောင်သွားမှာ” ဟု ဗိုလ်မှူးဖုန်းဟန်က ပြောသည်။

SSPP/SSA မှ တပ်မဆုတ်နိုင်ကြောင်း အကြောင်းကြားစာပို့ပြီးနောက် ယနေ့ (ဇူလိုင်လ ၂၂ )ရက်တွင် စစ်ကောင်စီ တိုင်းမှူးမှ တစ်ဆင့် နောက်တစ်ကြိမ် တွေ့ဆုံဆွေးနွေးရန် ပြန်လည်ကမ်းလှမ်းလာခဲ့ကြောင်း သတင်းသိရသည်။

“စာကိုလက်ခံရရှိတဲ့အကြောင်း စကစဘက်က ကျနော်တို့ကို အကြောင်းပြန်လာတယ်၊ ပြီးတော့ နောက်ထပ် တွေ့ဆုံဆွေးနွေးမှုပြုလုပ်ဖို့ ပြန်လည်ကမ်းလှမ်းလာတယ်၊ ဒါကတော့ ကျနော်တို့ကော်မတီနဲ့ ပြန်လည်ဆွေးနွေး ရမယ့် အပိုင်းပေါ့” ဟု ဗိုလ်မှူးဖုန်းဟန်က ဆက်လက်ပြောဆိုထားသည်။

လက်ရှိတွင် သျှမ်းပြည်တောင်ပိုင်း မိုင်းရှူးမြို့နယ်၊ လဲချားမြို့နယ် နှင့် ပင်လုံမြို့တို့တွင် စစ်ကောင်စီတပ်ဖွဲ့ နှင့် SSPP တို့က စစ်ရေးတင်းမာမှုများရှိနေပြီး ပြည်သူများက စစ်ဖြစ်ပွားလာမည်ကို စိုးရိမ်နေကြောင်းသိရသည်။

ယင်းကဲ့သို့ စစ်ရေးတင်းမာမှုများ ရှိနေသည့်အပေါ် ပြည်သူများစိုးရိမ်ထိတ်လန့်နေခြင်းနှင့် ပတ်သက်ပြီး တပ်ဆုတ် ခိုင်းသည့် အာဏာသိမ်း စစ်ကောင်စီတပ်ဖွဲ့၏ သဘောထားပေါ်တွင်သာ မူတည်ကြောင်း SSPP/SSA က ပြောသည်။
ထို့အပြင် စစ်ကောင်စီဘက်မှ စစ်ရေးစတင်ပါက တိုက်ပွဲသည် တစ်နေရာတည်း ဖြစ်ပေါ်မည် မဟုတ်ကြောင်း SSPP ပြောဆိုထား သည့်အတွက် လက်ရှိတွင် သျှမ်း တောင်ပိုင်း ရပ်စောက်မြို့နယ် နှင့် သျှမ်းပြည်မြောက်ပိုင်းမှ မိုးမိတ်မြို့နယ် တွင်လည်း အာဏာသိမ်းစစ်ကောင်စီတပ်ဖွဲ့နှင့် စစ်ရေးတင်းမာမှုများ ရှိနေကြောင်း သတင်းသိရသည်။

Leave a Comments