သျှမ်းပြည်တောင်ပိုင်း နမ့်စန်မြို့တွင် စက်သုံးဆီဈေးနှုန်းများ ကျဆင်းလာသော်လည်း ယမန်နေ့ ဇူလိုင် (၁၈) ရက်နေ့တွင် (92) စက်သုံးဆီ အမျိုးအစားများ ပြတ်လပ်နေပြီဖြစ်ကြောင်း စုံစမ်းသိရှိရသည်။
နမ့်စန်မြို့အတွင်း စက်သုံးဆီဆိုင် (၂၀) ဝန်းကျင်ရှိပြီး၊ ထိုဆိုင်များတွင် စက်သုံးဆီ (92) စက်သုံးဆီသည် ယမန်နေ့ ဇူလိုင် (၁၈) ရက်မှစပြီး ဆိုင်တိုင်း ပြတ်လပ်နေပြီ ဖြစ်ကြောင်း၊ (Denko) ဆီဆိုင်တစ်ခုတည်းတွင်သာ (95) စက်သုံးဆီ ကျန်ရှိနေပြီး ရောင်းနေရကြောင်း နမ့်စန်မြို့ဒေသခံ အသက် ၃၀ အရွယ်ရှိ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ စက်သုံးဆီ (92) ကတော့ ပြတ်နေပြီ ၊မနေ့ကတော့ (Denko) တစ်ဆိုင်မှာရတာ ၊ကျနော်သွားထည့်တော့ (95) တစ်မျိုးပဲကျန်တယ်။ အပြင်က စက်သုံးဆီဆိုင်ငယ်တွေမှာတော့ မသိဘူး၊ (95) စက်သုံးဆီကော ဒီနေ့ထိ ကျန်သေးလားတော့ သေချာမသိသေးဘူး “ ဟု ၎င်းအမျိုးသားကပြောသည်။
နမ့်စန်မြို့ စက်သုံးဆီဆိုင်များမှ ဆီဈေးနှုန်းများမှာ အောက်တိန်း (95) တလီတာ (၂,၉၅၀) ကျပ်ဝန်းကျင် ၊ အောက်တိန်း (92) တလီတာ (၂,၈၅၀) ကျပ်ဝန်းကျင် နှင့် ဒီဇယ် တလီတာ (၂,၀၀၀) ကျော်ရှိနေကြောင်း ၎င်းက ဆက်ပြောသည်။
ထိုသို့ နမ့်စန်မြို့ စက်သုံးဆိုင်များမှာ စက်သုံးဆီများကို နယ်စပ်အသီးသီးမှ ဝယ်ယူရပြီးနောက် တာချီလိတ်မြို့တွင် စက်သုံးဆီများ ဝယ်ယူရရှိနိုင်ပြီး ယခုကာလတွင် နယ်စပ်မှ ဒေါ်လာငွေသုံးစွဲရသည့်အပြင် ဒေါ်လာဈေးများ အဆမတန် မြင့်တက်လာသောကြောင့် လာမည့်အခြေနေတွင် စက်သုံးဆီများ တင်သွင်းမရ ဖြစ်လာနိုင်ကြောင်း ဟု နမ့်စန်မြို့ ဒေသခံအမျိုးသားတစ်ဦး သုံးသပ်ထားသည်။
“ နမ့်စန်က စက်သုံးဆီတွေ ထိုင်းနယ်စပ် တာချီလိတ်မြို့မှာ ယူရတာလည်းရှိတယ်၊ အခုအခြေနေက ပုံမှန်မဟုတ်တော့ အခြေနေကတော့ ဖြစ်သလိုဖြစ်နေတာပဲ ၊ဒေါ်လာဈေးကတော့ စောင့်နေကြည့်နေတုန်း တစ်နေ့တစ်နေ့ တဖြည်းဖြည်းတက်လာနေတာ ၊ နယ်စပ်က ကုန်သည်တွေလည်း ဒေါ်လာဈေးသုံးရပြီး အခွန်ပါ ဆောင်ရတယ်။ တဖြည်းဖြည်းနဲ့ နယ်စပ်ကကုန်သွယ်ရေးတွေ ဒီထက်ပိုခက်ခဲလာမယ်၊ စက်သုံးဆီတွေလည်း တင်သွင်းမရဖြစ်လာမယ် “ ဟု ၎င်းကဆိုသည်။
စစ်အာဏာသိမ်းပြီးနောက် စစ်ကောင်စီ လက်အောက်ခံ စီးပွားရေးနှင့် ကူးသန်းရောင်းဝယ်ရေး ဝန်ကြီး ဌာန မှ စနစ်အမျိုးမျိုးပြောင်းလဲမှုကြောင့် ကုန်သည်များလည်း အခက်အခဲများစွာ ရင်ဆိုင်နေကြသည်။
