သျှမ်းပြည်တောင်ပိုင်း ရပ်စောက်မြို့နယ်အတွင်းတွင် သျှမ်းပြည်ပြန်လည်ထူထောင်ရေး ကောင်စီ၊ သျှမ်းပြည် တပ်မတော် RCSS/SSA နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA တို့ တိုက်ပွဲဖြစ်ပွားခဲ့ကြောင်း သတင်းသိရသည်။
ယနေ့ ဇူလိုင် (၁၅) ရက် မွန်းလွဲပိုင်းက ရပ်စောက်မြို့နယ် ကျောက်ဂူကျေးရွာအုပ်စု လွိုင်ငင်းတောင်ဘက်တွင် ပစ်ခတ်သံများ ကြားရခြင်းဖြစ်ပြီး ၁ နာရီနီးပါးအထိ တိုက်ပွဲဖြစ်ပွားခဲ့ကြောင်း ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
“တိုက်ပွဲက မွန်းလွဲပိုင်း ၁၂ နာရီကျော်ကနေ ၁ နာရီဝန်းကျင်အထိ လွိုင်ငင်းတောင်ဘက်မှာ တိုက်ပွဲဖြစ်ကြပါတယ်၊ လက်နက်ကြီးရော လက်နက်ငယ်ရော ပစ်ခတ်ကြလို့ ကျနော်တို့ဆို ယာတောမှာ အလုပ်လုပ်ရာကနေ အိမ်ကိုပြန်ပြေးလာခဲ့ရတယ်” ဟု ကျောက်ဂူကျေးရွာခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
တိုက်ပွဲဖြစ်ပွားရာ လွိုင်ငင်းတောင်သည် ကျောက်ဂူကျေးရွာနှင့် ၂ မိုင်ခန့်သာ ကွာဝေးသည့်အတွက် ပစ်ခတ်သံများ ထွက်ပေါ်လာစဥ်တွင် အနီးရှိ ဒေသခံရွာသားများက ကြောက်လန့်ကြကြောင်း ၎င်းက ဆက်လက် ပြောဆို ထားသည်။
အဆိုပါ လွိုင်ငင်းတောင်ကြောတစ်ဝိုက်တွင် SSPP/SSA သွားလာလှုပ်ရှားနေလျက်ရှိပြီး ယမန်နေ့ (ဇူလိုင် ၁၄ ) ရက်တွင် RCSS/SSA စစ်ကြောင်းတစ်ခု အဆိုပါ လမ်းကြောင်းဘက် ထွက်သွားကြောင်း မြင်တွေ့ရသည့် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“အဲ့ဘက်မှာ SSPP/SSA စစ်အင်အားဖြည့်ပြီး လှုပ်ရှားနေတာတော့ ကြာပြီပေါ့နော်၊ မနေ့ကတော့ အဲ့လွိုင်ငင်း ဘက်ကို RCSS ခြေလျင်နဲ့ စစ်ကြောင်းချီသွားတာ မြင်လိုက်ရတယ်၊ ဒီနေ့တော့ တိုက်ပွဲသံကြားရတယ်ပေါ့၊ ဒါပေမဲ့ ဆက်စပ်မှု ရှိမလားတော့ ကျနော်လည်း မသိဘူး” ဟု အမည်မဖော်လိုသူ အသက် ၄၀ ဝန်းကျင် ကျောက်ဂူရွာခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ တိုက်ပွဲဖြစ်ပွားသည့်အတွက် လက်နက်ကိုင်တပ်ဖွဲ့များ ကျေးရွာထဲဝင်ပြီး ဘော်ဒါဆွဲ ရိုက်နှက်ဖမ်းဆီးမှု ပြုလုပ်မည်ကို စိုးရိမ်ကြောက်လန့်နေရကြောင်း ဒေသခံများက ပြောသည်။
ပြီးခဲ့သည့် ဖေဖော်ဝါရီလ အတွင်းမှာလည်း ရပ်စောက်မြို့နယ်အတွင်း SSPP/SSA ပါဝင်သည့် မြောက်ပိုင်း မဟာမိတ် နှင့် RCSS တို့ တိုက်ပွဲဖြစ်ပွားခဲ့ပြီး ဒေသခံပြည်သူအိမ် တချို့ပျက်စီးခဲ့ရသည့်အပြင် ရာနှင့်ချီသော ဒေသခံပြည်သူတို့က စစ်ဘေးတိမ်းရှောင်ခဲ့ရသည်။
ရပ်စောက်မြို့သည် တပ်မတော် (ကြည်း) ဗိုလ်သင်တန်းကျောင်း တည်ရှိရာမြို့ဖြစ်ပြီး သင်တန်းကျောင်းများ နှင့် ခြေလျင် တိုက်ခိုက်ရေး တပ်များ၊ လက်ရုံး ဝန်ထမ်းတပ်များ အခြေစိုက်သည့် နေရာတစ်ခု ဖြစ်သည်။
Leave a Comments