သျှမ်းပြည်တောင်ပိုင်း ရွာငံမြို့နယ် ပွေးနဖားကျေးရွာတွင် နေထိုင်သည့် စစ်တပ်သတင်းပေးဟု နာမည်ထွက် သူတစ်ဦး ပစ်သတ်ခံလိုက်ရကြောင်း သတင်းသိရသည်။
ပြီးခဲ့သည့် ဇူလိုင်လ ၁၃ ရက် ည ၈ နာရီဝန်းကျင်တွင် အမည်မသိလက်နက်ကိုင်တပ်ဖွဲ့တစ်ခုမှ ဦးတင်မိုး၏ နေအိမ်အတွင်း ဝင်ရောက်ပြီး ပစ်ခတ်သွားခြင်းဖြစ်ကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ညအချိန်မှာ လာပစ်တော့ ဘယ်သူဘယ်ဝါမှန်း မသိလိုက်ရဘူးတဲ့၊ သေနတ်သံ လေးငါးချက်လောက်ကြားလိုက်ရတယ်၊ သူ့အိမ်မှာ CCTV တွေ လည်းရှိနေတော့ အဲ့လိုလုပ်လိုက်တာ အတွင်းရေးတွေ သိနေတဲ့သူတွေဖြစ် လောက်တယ်” ဟု ဒေသခံ အမျိုးသားတစ်ဦးက ပြောသည်။
ပစ်ခတ်ခံရသူသည် ဦးတင်မိုးဟု အမည်ရှိပြီးစစ်ကောင်စီတပ်ဖွဲ့တို့အတွက် သတင်းပေးလုပ်ပေးသည့်အပြင် စစ်ကောင်စီတပ်ဖွဲ့တို့မှ ဒေသအတွင်း နေအိမ်မီးရှို့ ပြီးပြည်သူကို ဖမ်းဆီးခြင်းများ ပြုလုပ်သည့် အခါတွင်လည်း လိုက်ပါလေ့ရှိကြောင်းသိရသည်။
ပစ်ခတ်မှုဖြစ်ပွားပြီးသည့်နောက်တွင် ဒေသအတွင်း ရဲနှင့် စစ်သားများ ရောက်ရှိလာပြီးနေအိမ်အဝင်အထွက် စစ်ဆေးမှုများ ပြုလုပ်သည့်အပြင် CCTV များကိုလည်း စစ်ဆေးသွားကြောင်းသိရသည်။
“CCTV တွေကို ရဲ နဲ့ စစ်သားက စစ်ပေမဲ့ ဘယ်သူလက်ချက်လဲဆိုတာ မပြောသေးဘူး၊ ရုပ်အလောင်းကိုလည်း သူတို့ပဲလာသယ်သွားကြတယ်” ဟု အထက်ပါ အမျိုးသားက ဆက်လက်ပြောဆိုထားသည်။
လက်ရှိတွင် ဦးတင်မိုး၏ ရုပ်အလောင်းသည် ရွာငံမြို့ ပြည်သူ့ဆေးရုံသို့ ပို့ဆောင်ထားကြောင်း သတင်းသိရသည်။
ရွာငံမြို့သည် တော်လှန်ရေးလှုပ်ရှားမှုများ အရှိန်လျှော့ကျလာပြီး ဒေသခံပြည်သူ့ကာကွယ်ရေး တပ်ဖွဲ့ တချို့မှ နေရပ်စွန့်ခွာမှုရှိနေသော်လည်း စစ်ကောင်စီတို့မှ ဒေသခံပြည်သူများအပေါ် အကြမ်းဖက်လုပ်ရပ် နှိမ်နှင်းမှုများ ဆက်လက်ရှိနေဆဲ ဖြစ်ကြောင်း သိရသည်။
