သျှမ်းပြည်မြောက်ပိုင်း သီပေါမြို့တွင် နေထိုင်သည့် အမျိုးသမီးတစ်ဦးကို လောက်ကိုင်ဘက်သို့ အလုပ်သွားလုပ်ရန် သူငယ်ချင်း အရင်းမှ လိမ်လည် ဖြားယောင်းမှု ပြုလုပ်ခဲ့ကြောင်း စုံစမ်းသိရသည်။
ဇူလိုင်လ ၁၂ ရက် (ဝါဝင် ဥပုလ်နေ့) တွင် သီပေါမြို့ စံဖိတ်ရပ်ကွက်နေ အသက် ၁၉ နှစ်အရွယ်ရှိ နန်းယု (အမည်လွှဲ) ကို ကျောင်းနေဘက် ငယ်သူငယ်ချင်းဖြစ်သူ နန်းမွေနွံဆိုင်မှ လောက်ကိုင်သွားရန် လိမ်လည်ဖြားယောင်းခဲ့ခြင်းကြောင်း ဖြစ်စဥ်ကို သိရှိသည့် အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“ဖြစ်စဥ်က နန်းမွေနွံဆိုင်နဲ့ သူ့ သူငယ်ချင်းနှစ်ယောက်က နန်းယုကို နမ့်ဟူးနွဲ့ ရေတံခွန်သွားလည်မယ် ဆိုပြီး တော့ ဆိုင်ကယ်နှစ်စီးနဲ့အိမ်မှာ လာခေါ်တာ၊ ဒါပေမယ့် လားရှိုးပန်းခြံကို ခေါ်သွားတယ်၊ သူတို့ လားရှိုးကို ရောက်သွားတဲ့ အချိန်တော့ လောက်ကိုင်သွားဖို့ စည်းရုံးပြောဆိုခံရတာတဲ့” ဟု ၎င်းအမျိုးသမီးက ပြန်ပြောပြသည်။
နန်းမွေနွံဆိုင် နှင့် သူငယ်ချင်းနှစ်ဦးသည် နန်းယု ကို သီပေါမြို့မှ လားရှိုးပန်းခြံသို့ အလည်ဟု လိမ်လည်ပြောဆို ခေါ်ဆောင်ခဲ့ပြီး၊ ညနေမိုးချုပ်အချိန်တွင် အိမ်ပြန်ရန် အချိန်မရှိတော့သဖြင့် လားရှိုးမြို့ ရပ်ကွက် ၁ ရှိ နေအိမ် တလုံးသို့ ခေါ်ဆောင်သွားသည်။
လားရှိုး နေအိမ်ရောက်သည့်အချိန်တွင် လောက်ကိုင်မြို့သို့သွားပြီး အလုပ်လုပ်ရန် စည်းရုံးပြောဆိုခဲ့သည်။
“ သူ့ (နန်းမွေနွံဆိုင်) အဒေါ် လို့ပြောတယ်၊ အဲ့ဒီအိမ်ကို ရောက်သွားတဲ့အချိန်မှာ သူတို့ပြောတာက လောက်ကိုင်မှာ အလုပ်ကောင်းရှိတယ်။ လစာလဲကောင်းတယ် သွားမလားတဲ့၊ ဒါပေမယ့် သူ (နန်းယု) က သူ့မှာကလေးနဲ့ မိဘတွေရှိသေးတယ်၊ အခု အိမ်က မပြောဘဲ ထွက်လာမိတာ စိတ်ပူမှာစိုးလို့ မနက်ဖြန် အိမ်ပြန် အုံးမယ်လို့ ပြန်ပြောခဲ့တော့ သူ့ကို အခန်းတစ်ခုထဲမှာ သွားနေခိုင်းတာတဲ့” ဟု ထိုအခြေအနေကို သိသည့် အမျိုးသမီး က သျှမ်းသံတော်ဆင့်ကို ပြန်လည်ပြောပြခြင်းဖြစ်သည်။
ထို့နောက်တွင် နန်းမွေနွံဆိုင်သည် နန်းယု၏ လက်ကိုင်ဖုန်းကို ခဏငှားယူမည်ဟု ဆိုကာ ဖုန်းထဲရှိ ဖုန်းနံပါတ်များနှင့် အချင်းချင်းပြောဆိုထားသည့် လူမှုကွန်ရက် ( Facebook) မှ မက်ဆင်ဂျာ မက်ဆေ့များကို အကုန်ဖျက်လိုက်ကြောင်း ၎င်းက ဆက်ပြောသည်။
နန်းယု (နာမည်လွဲ) သည် လားရှိုးနေအိမ် တစ်လုံးတွင် တစ်ညတာအိပ်စက်ပြီး တခြားသူမနှိုးခင် အိပ်ရာထကာ ကားဂိတ်အထိ လမ်းလျှောက်လာပြီး အလွတ်ရထားသည့် အိမ်ဖုန်းနံပါတ်ခေါ်ဆိုကာ အကျိုးအကြောင်း ပြောဆိုခဲ့သည်။
ထို့နောက် လားရှိုးမြို့ လူမှုကူညီရေးအဖွဲ့ တစ်ဖွဲ့မှ သွားရောက်ခေါ်ဆောင်လာပြီး သီပေါမှ လာကြိုသည့် မိဘနှင့် အဖွဲ့သားများထံသို့ လွဲအပ်ခဲ့သည်။
ယင်းကိစ္စဖြစ်စဥ်များနှင့် ပတ်သက်ပြီး သီပေါမြို့မှ အမျိုးသမီးတစ်ဦးကလည်း အမျိုးသမီးများ အယုံမလွယ်သင့်ကြောင်းနှင့် နယ်ခြား ရောက်သွားပါက ဆက်လိုက်ရန် မလွယ်ကူကြောင်း သျှမ်းသံတော်ဆင့်ကို ပြောသည်။
“နန်းယု က မိဘကို အကြောင်းပြန်ပြောပြလို့ ကံကောင်းတယ်ပြောရမှာ၊ ပြီးတော့ သီပေါနဲ့ လားရှိုးဆိုတာ ကသိပ်မဝေးသေးလို့ပေါ့၊ ဒါကြောင့် အချိန်မှီအိမ်ပြန်ခေါ်လာနိုင်ခဲ့တယ်၊ တကယ်လို့ လောက်ကိုင်တို့ မိုင်းလား တို့လို နယ်ခြားရောက်သွားရင် ဆက်လိုက်ဖို့ခက်သွားမှာ၊ ဒါကြောင့် အမျိုးသမီးတွေ အယုံမလွယ်ကြပါနဲ့လို့ ပြောချင်တယ်” ဟု ၎င်းက ပြောသည်။
လက်ရှိတွင် နန်းယု သည် မိဘများထံ ပြန်ရောက်ပြီး ကြောက်လန့်စိုးရိမ်မှုအတွက် စိတ်ပိုင်းဆိုင်ရာ ထိခိုက်မှုတချို့ ခံစားနေရသည်။
သီပေါမြို့နယ်အတွင်းတွင် ဇွန်လ နှင့် ယနေ့အထိ နန်းယု ကဲ့သို့ ဖြစ်စဥ်အပါအဝင် လူကုန်ကူး ဖြားယောင်း သွေးဆောင်မှု ဖြစ်စဥ် ၃ ခုရှိနေပြီး တခြားဖြစ်စဥ်နှစ်ခုသည် အဆက်အသွယ်မရ ပျောက်ဆုံးနေကြောင်းလည်း သိရသည်။
စစ်ကောင်စီအာဏာသိမ်းပြီးနောက်ပိုင်းတွင် လူကုန်ကူးမှု၊ လောင်းကစားဝိုင်းအတွင်း အလုပ်လုပ်ရန် ဆွဲဆောင် ဖြားယောင်းမှုကဲ့သို့ တရားမဝင် အလုပ်များသည် တစ်နေ့တစ်ခြား တိုးများလာပြီး ပြည်သူများ၏ ဘဝလုံခြုံရေး ကင်းမဲ့နေသလိုခံစားရကြောင်းလည်း ဝေဖန်ပြောဆိုသံများ ထွက်ပေါ်နေကြောင်းသိရသည်။
