သျှမ်းပြည်အရှေ့ပိုင်း ထိုင်း – မြန်မာနယ်စပ် တာချီလိတ်မြို့ ဝိန်းကျောက်ရပ်ကွက်ရှိ စွမ်းမိုတယ်တွင် ဇူလိုင် (၁၁) ရက် ညနေပိုင်း၌ စစ်ကောင်စီမှ ဧည့်စာရင်းဝင်စစ်ပြီး အွန်လိုင်းဂိမ်းလုပ်ကိုင်သူ လူငယ် (၂၅) ဦး ဖမ်းဆီးခံရကြောင်း စုံစမ်းသိရသည်။
ထိုဖမ်းခံရသောသူများမှာ အွန်လိုင်းလုပ်ကိုင်သူများဖြစ်ပြီး၊ ထိုမိုတယ်တွင် အခွန်ဆောင်ထားခြင်းမရှိသဖြင့် ယခုလို ဧည့်စာရင်းစစ်ဟန်ဆောင်ပြီး ဝင်ဖမ်းဆီးခဲ့ခြင်းဖြစ်သည်ဟု တာချီလိတ်မြို့ အသက် (၂၀) ကျော် ရှိ လူငယ်တစ်ဦးက သျှမ်းသံတော်ဆင့်ကို ပြောသည်။
“ဖမ်းမိတာတော့ ဟုတ်တယ်။ အဲ့မိုတယ်က အခွန်မဆောင်လို့တဲ့၊ အခွန်မဆောင်တဲ့ မိုတယ်တွေ ဖမ်းတယ်။ ဖမ်းခံတဲ့ထဲမှာ ဘယ်သူတွေပါသွားလဲတော့ မသိဘူး“ ဟု ၎င်းကဆိုသည်။
ဖမ်းဆီးခံရသော လူငယ် (၂၅) ဦး နှင့် အတူ ကွန်ပျူတာ အပါအဝင် စုစုပေါင်းအလုံးရေ (၃၀၀) ကျော်၊ ကား (၃) စီးနှင့် ဖုန်း (၄၀) ဝန်းကျင် သိမ်းဆီးသွားကြောင်း သိရသည်။
တာချီလိတ်မြို့ အွန်လိုင်းဂိမ်းလုပ်ဆောင်သည့် ဟိုတယ်များတွင် လုံခြုံရေးအပြည့်ထားရှိပြီးကြောင်း၊ ဟိုတယ်များအနေဖြင့် သက်ဆိုင်ရာသို့ အခွန်အပြည့်အဝဆောင်ပြီး ဖွင့်လှစ်ပါက ပြဿနာမရှိကြောင်း၊ ထို့ပြင် ရဲများကိုလည်း လိုင်းကြေး ပေးဆောင်ထားလျှင် အဆင်ပြေကြောင်းလည်း အွန်လိုင်းဂိမ်းလုပ်ဆောင်သူများက ပြောသည်။
“ဒီမှာက နေရာတိုင်း လုပ်နေကြပဲ၊ အွန်လိုင်းလုပ်ဖို့ အခန်းခဘဲဈေးကြီးတယ်။ အကောင့်ဖွင့်ပေးရတယ်၊ ငွေသွင်းငွေထုတ် အဲ့လိုတွေလုပ်ရတယ်။ ဖမ်းခံရမှာကို မစိုးရိမ်ရပါဘူး။ (Security) အပြည့်ရှိတယ်။ ရဲတွေ နောက် ဌာနဆိုင်ရာတွေကို ပိုင်ရင်ရတယ်“ဟု ၎င်းကပြောသည်။
ထိုအပြင် တာချီလိတ်မြို့ရှိ အွန်လိုင်းဂိမ်းမျိုးသည် ငွေသားဖြင့် သုံးစွဲမှုမရှိသောကြောင့် ယခုလို စစ်ကောင်စီ ဖမ်းဆီးမှုအပေါ် သည် ဧည့်စာရင်း စစ်ဆေးမည်ဟု အကြောင်းပြပြီး ဖမ်းဆီးနေသည်ဟု တာချီလိတ်မြို့ ဒေသခံအမျိုးသား တစ်ဦးက ပြောသည်။
“သူတို့ စစ်ချင်တဲ့နေရာဆိုရင်တော့ အကြောင်းပြပြီး ဝင်စစ်တာပဲလေ။ လောင်းကစား ဉပဒေနဲ့ဖမ်းလို့လည်း မရဘူးလေ။ အွန်လိုင်းဂိမ်းဖမ်းတယ်ဆိုတဲ့ ခေါင်းစဉ်ကြီးနဲ့တော့ မရဘူးလေ၊ ခဏက ပြောသလို ဧည့်စာရင်းစစ်တယ်လို့ အကြောင်းပြပြီး ဖမ်းတယ်“ ဟု ၎င်းက ပြောသည်။
တာချီလိတ်မြို့သည် မြန်မာ၊ ထိုင်း နှင့် လာအို စသည့် သုံးနိုင်ငံ ထိစပ်နေသည့် နယ်စပ်မြို့တစ်မြို့ ဖြစ်ပြီး လောင်းကစားမှုများ၊ လူသတ်မှုများ၊ တရားမဝင် နိုင်ငံခြားသားဝင်ထွက်မှုများ၊ လူကုန်ကူးမှုများ၊ မူးယစ်ဆေးဝါး ရောင်းဝယ်မှုများ ပေါများရာ မြို့လည်း ဖြစ်ကြောင်း သိရသည်။
