သျှမ်းပြည်တောင်ပိုင်း မိုင်းရှူးမြို့နယ် အာဏာသိမ်း စစ်ကောင်စီတပ်ဖွဲ့ နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တို့ စစ်ရေးတင်းမာမှု ရှိသော်လည်း စစ်ရှောင်တချို့ နေရပ်ပြန်သွားကြောင်း သတင်းသိရသည်။
စိုက်ပျိုးရေးရာသီဖြစ်သည့်အတွက် စစ်ရေးတင်းမာမှုများရှိနေသော်လည်း စိုးရိမ်စိတ်တစ်ဖက်နှင့် နေရပ်ပြန် ရခြင်းဖြစ်ကြောင်း နေရပ်ပြန်စစ်ရှောင် အမျိုးသားတစ်ဦးက သျှမ်းသံတော်ဆင့်ကို ပြောသည်။
“နှစ်ဖက်လုံးက စစ်ရေးတင်းမာမှုရှိနေဆဲဆိုပေမယ့် ကျနော်တို့ဝမ်းရေးအတွက်လည်း ရှိနေသေးတော့ စိုးရိမ်စိတ်နဲ့ ပြန်ရမှာပဲ၊ လယ်တွေခြံတွေ မလုပ်ရင်လည်း မဖြစ်နိုင်ဘူးလေ၊ ဒါကြောင့်ပြန်ရတာပါ” ဟု နေရပ်ပြန်စစ်ရှောင် အမျိုးသားက ပြောသည်။
လက်ရှိတွင် ပြီးခဲ့သည့် လအတွင်းမှ စစ်ဘေးတိမ်းရှောင်လာသည့် လွိုင်နိုင်းရွာခံ အိမ်ထောင်စု (၁၀) စုကျော် သည် နေရပ်ပြန်သွားကြောင်း ၎င်းက ဆက်လက်ပြောဆိုထားသည်။
အာဏာသိမ်းစစ်ကောင်စီတပ်ဖွဲ့သည် မိုင်းရှူးမြို့နယ်အတွင်းရှိလွိုင်နိုင်း- မန်ဝိန်းအတွင်း လှုပ်ရှားနေသည့် SSPP /SSA တပ်ဖွဲ့တို့ကို ဇူလိုင်လ ၇ ရက်နေ့တွင် သုံးကြိမ်မြောက် တပ်ဆုတ်ဖို့ ပြောဆိုခဲ့သော်လည်း လက်ရှိ အချိန်ထိ SSPP/SSA ဘက်မှ ဆုတ်ခွာခြင်းမရှိဘဲ စစ်ရေးတင်းမာနေကြောင်း ဒေသခံတစ်ဦးက သျှမ်းသံတော်ဆင့်ကို ဆက်လက်ပြောဆိုထားသည်။
“လွိုင်နိုင်းဘက်က ရွာခံတွေက စစ်ကောင်စီတွေ ဒုတိယအကြမ် သတိပေးပြီး စစ်ရေးတင်းမာလာတဲ့ အချိန် ကတည်း က စစ်ဘေးဒဏ်ကိုတိမ်းရှောင်လာတဲ့သူတွေဖြစ်တယ်၊ ပြီးတဲ့ ၇ ရက်နေ့ကလည်း တတိယအကြိမ်မြောက် တပ်ဆုတ်ဖို့ ပြောပေမဲ့ SSPP/SSA က မဆုတ်တော့ စစ်ကောင်စီတွေကလည်းစစ်အင်အားထပ်ဖြည့်ပြီး စစ်ရေးတင်းမာနေတုန်းပါ” ဟု အသက် ၄၀ ဝန်းကျင် မိုင်းရှူးဒေသခံအမျိုးသားတစ်ဦးက ပြောသည်။
စစ်ကောင်စီတို့သည် ပြီးခဲ့သည့် ဇွန်လ ၁၀ ရက်နေ့တွင်တစ်ကြိမ် ၊ ၃၀ ရက်နေ့တွင် တစ်ကြိမ် နှင့် ဇူလိုင်လ ၇ ရက်နေ့တွင် တစ်ကြိမ် စုစုပေါင်း ၃ ကြိမ်မြောက် တပ်ဆုတ်ရန် အမိန့်ညွှန်ကြားချက်ထုတ်ပြန်ခဲ့ခြင်းဖြစ်သည်။
SSPP/SSA တပ်စခန်းဆုတ်ခွာရန် စစ်ကောင်စီညွှန်ကြားသည့်နေရာများသည် မိုင်းရှူးမြို့နယ်အတွင်းရှိ လွိုင်နိုင်း တပ်စခန်းနေရာ တစ်ခုနှင့် မန်ဝိန်းမှ တပ်စခန်း နေရာ ၂ ခုဖြစ်ကြောင်း သိရသည်။
