Thursday, June 20, 2024

ရပ်စောက်မြို့နယ်အတွင်း တိုင်းရင်းသားလက်နက်ကိုင်တပ်ဖွဲ့ နှင့် စစ်ကောင်စီတို့ စစ်ရေးလှုပ်ရှားမှုရှိနေ

Must read

သျှမ်းပြည်တောင်ပိုင်း ရပ်စောက်မြို့နယ် အတွင်း တိုင်းရင်းသားလက်နက်ကိုင်တပ်ဖွဲ့များ နှင့် စစ်ကောင်စီတပ်ဖွဲ့တို့ စစ်ရေးလှုပ်ရှားမှုများ ရှိနေကြောင်း သတင်းသိရသည်။

ပြီးခဲ့သည့် ဇူလိုင်လ ၉ ရက်တွင် ရပ်စောက်မြို့နယ် အတွင်းရှိ ကျောက်ဂူကျေးရွာအုပ်စု၊ နောင်လုံ ကျေးရွာအုပ်စု နှင့် နောင်ဝိုးကျေးရွာအုပ်စုဘက် သို့ ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တို့မှ သွားလာလှုပ်ရှားမှုများ ရှိနေကြောင်း ဒေသခံ အမျိုးသားတစ်ဦး က သျှမ်းသံတော်ဆင့်ကို ပြောသည်။

“အရင်တုန်းကတော့ RCSS/SSA လှုပ်ရှားခဲ့ဖူးတဲ့ ဒေသပါ၊ ဒါပေမယ့် သူတို့က ဆုတ်ပေးလိုက်ရတယ်၊ ပြီးတော့ ပြန်ကပ်လာတဲ့ အနေအထားရှိတယ်၊ ဒါကြောင့် SSPP/SSA တွေက ပိုပြီး အင်အားဖြည့်တာတွေ့ရတယ်၊ ပြည်သူ တွေကတော့ သူတို့ ထိပ်တိုက်တိုက်ပွဲ ထပ်ဖြစ်မှာကို အရမ်းကြောက်နေတယ်” ဟု ကျောက်ဂူကျေးရွာမှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

၂၀၂၂ ခုနှစ် ဖေဖော်ဝါရီလက စစ်ရှောင်ပုံ

ပြီးခဲ့သည့် ဇူလိုင် ၈ ရက်နေ့ ညပိုင်းအချိန်တွင် စစ်အင်အား ၁၀၀ ဝန်းကျင်ခန့်ရှိသည့် သျှမ်းပြည်ပြန်လည် ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) တပ်သားများသည် ကျောက်ဂူကျေးရွာဘက်သို့ ရောက်ရှိလာပြီး တစ်ညစခန်းချ အိပ်သွားကြောင်း ဒေသခံများက ပြောသည်။

“RCSS/SSA ဘက်က အဲ့လိုရောက်လာတော့ SSPP/SSA ကလည်း ရွာနားမှာ တပ်စုတစ်စုရောက်လာတယ်၊ အဲ့နေ့ က တိုက်ပွဲဖြစ်မှာစိုးလို့ တချို့ပြည်သူက အထုပ်အပိုးတွေ ပြင်ဆင်ရတဲ့အထိ စိုးရိမ်စိတ်များနေရပါတယ်” ဟု အထက်ပါ ပုဂ္ဂိုလ်က ဆက်လက်ပြောဆိုထားသည်။

ပြီးခဲ့သည့် ဖေဖော်ဝါရီလအတွင်းတွင် ကျောက်ဂူရွာအနီး SSPP/SSA နှင့် RCSS/SSA တိုက်ပွဲ ဖြစ်ပွားခဲ့ပြီး လူထောင်ချီ ထွက်ပြေးတိမ်းရှောင်ခဲ့ရသလို တိုက်ပွဲကြောင့် နေအိမ်တချို့ မီးလောင်ခြင်းများလည်း ရှိခဲ့ကြောင်း သိရသည်။

ထို့အပြင် ရပ်စောက်မြို့ပေါ်ရပ်ကွက်များတွင်လည်း အာဏာသိမ်း စစ်ကောင်စီ တပ်ဖွဲ့တို့၏ စစ်ဆေးမေးမြန်း မှုများ တင်းကြပ်စွာရှိနေသဖြင့် ဒေသခံပြည်သူများအတွက် အခက်အခဲရှိနေကြောင်းသိရသည်။

“SSPP/SSA ဘက်က စစ်ရေးလှုပ်ရှားမှု အင်အားဖြည့်တင်းမှုတွေ ရှိလာပြီလို့ သတင်းထွက်လာတာနဲ့ စစ်ကောင်စီ ကလည်း လုံခြုံရေးတွေ တင်းကြပ်တော့တာပဲ၊ အခု မြို့ပေါ်မှာ ည ၈ နာရီ နဲ့ နံနက် ၄ နာရီကြား အပြင်မထွက်ရ အမိန့်ထုတ်လာတယ်” ဟု ရပ်စောက်မြို့နယ်မှ ဒေသခံလူငယ်တစ်ဦးက သျှမ်းသံတော်ဆင့်ကို ပြောသည်။

နိုင်ငံတော် အာဏာသိမ်းယူမှုကို လက်မခံသည့် ပြည်သူလူထုတို့သည် စစ်ကောင်စီကို နည်းလမ်း အမျိုးမျိုးဖြင့် ဆန့်ကျင် ဆန္ဒပြနေလျှက်ရှိပြီး စစ်ကောင်စီတို့ကလည်း ပြည်သူများ နေထိုင်စား သောက်ရေးနှင့် အပြင်ထွက် သွားလာရေးတို့ အခက်အခဲရှိအောင် အမျိုးမျိုး လုပ်ဆောင်တားမြစ်မှုများရှိနေကြောင်း သိရသည်။

Leave a Comments

- Advertisement -spot_img

Latest article