သျှမ်းပြည်တောင်ပိုင်း တောင်ကြီးမြို့ ယခုကာလအတွင်း ရဲ နှင့် စစ်သားများ ဧည့်စာရင်း စစ်ဆေးရာ အမျိုးသားတစ်ဦး၏ ဓာတ်ပုံနှင့်အတူ လိုက်ပြပြီး စစ်ဆေးနေကြောင်း စုံစမ်းသိရသည်။
တောင်ကြီးမြို့ စဝ်စံထွန်းရပ်ကွက်တွင် အရပ်ကားများဖြင့် ည ၁၀ နာရီ မှ ၁၁ နာရီကျော်တွင် လာရောက်ပြီး အမျိုးသားတစ်ဦး၏ ဓာတ်ပုံကို လိုက်လံပြကာ စစ်ဆေးမေးမြန်းခဲ့ကြောင်း တောင်ကြီးမြို့ဒေသခံတစ်ဦး က သျှမ်းသံတော်ဆင့်ကို ပြောသည်။
ထိုဧည့်စာရင်း စစ်ဆေးရာတွင် အိမ်ငှားများကို အဓိကထားပြီး စစ်ဆေးနေကြောင်း သိရသည်။
“အခုက ဧည့်စာရင်း လာစစ်တယ်။ အဲ့မှာ ယောင်္ကျားလေးရဲ့ ပုံပြပြီး စစ်ဆေးနေတာ။ ဒလန်သတင်းပေးရှိလို့နေမယ်။ ပြီးတော့ အိမ်ငှားတွေကိုပဲ စစ်တာများတယ်” ဟု တောင်ကြီးမြို့မှ လူငယ်အမျိုးသားတစ်ဦးက သျှမ်းသံတော်ဆင့်ကို ပြောသည်။
ဧည့်စာရင်း စစ်ဆေးမေးမြန်းမှုတွင် သက်ဆိုင်ရာ ရပ်ကွက်တာဝန်ရှိသူများ မပါရှိပဲ ၎င်းမှ သံသယရှိသော ရပ်ကွက်များ၊ အိမ်များကို စစ်ဆေးမေးမြန်းခြင်း၊ စစ်ဆေးရေး ကာလအတွင်း ဧည့်သည်လက်ခံထားရှိသည့် ဧည့်စာရင်း မတိုင်ထားသူများကို ဖမ်းဆီးခြင်းများ ပြုလုပ်နေကြောင်း သိရသည်။
ထို့အပြင် တောင်ကြီးမြို့ အထွက်လမ်း တောင်ကြီး – အေးသာယာထွက်လမ်း၊ တောင်ကြီး – ကက္ကူဘုရား သွားလမ်း နှင့် တောင်ကြီး – ဟိုပုံးလမ်း စသည့် တောင်ကြီးမြို့ထွက်လမ်းများအားလုံးကို ရဲနှင့် စစ်သားများက မြို့ထွက်မည့်သူကို အဓိကထားပြီး အတင်းအကြပ်စစ်ဆေး မေးမြန်းသည်ဟု တောင်ကြီး ဒေသခံများက ပြောပြသည်။
“တောင်ကြီးမြို့ထွက် လမ်းတွေမှာ သူတို့စစ်တာက မြို့ထွက်မယ့် သူကို စစ်တာ မြို့ထဲဝင်လာတဲ့သူကိုတော့ မစစ်ဘူး၊ ဆိုင်ကယ်ဆို အကုန်ဖွင့်ကြည့်ပြီး စစ်တာ၊ စစ်ဆေးမှုကတော့ ကြမ်းတယ်“ ဟု အမျိုးသမီးတစ်ဦးက ပြောသည်။
ထို့အပြင် ယနေ့ (ဇူလိုင် ၈) ရက် တွင် တောင်ကြီးမြို့ ယာဥ်ထိန်းရဲရုံးရှေ့ လမ်းမကြီးပေါ်မှာ ဆိုင်ကယ်ဦးထုပ် မဆောင်းလာသူများနှင့် ဆိုင်ကယ်နံပါတ်ပြားမပါသူများကို ယာဥ်ထိန်းရဲများက ဆိုင်ကယ်သော့သိမ်းယူပြီး စစ်ဆေးမေးမြန်းမှုများရှိကြောင်း သိရသည်။
ဆိုင်ကယ်နံပါတ်ပြားမပါသော ဆိုင်ကယ်စီးသူများကို ဆိုင်ကယ်သော့သိမ်းယူပြီးနောက် ဆိုင်များ၌ နံပါတ်ပြား ကဒ်ကိုဝယ်ယူခိုင်းပြီး သေသေချာချာ တပ်ဆင်စေပြီးမှသာလျှင် ဆိုင်ကယ်သော့ကိုပြန်ပေးကြောင်း၊ ဆိုင်ကယ် နံပါတ်ပြားမပါသည့် ဆိုင်ကယ်တစ်စီး လျှင် ပိုက်ဆံ (၂၀၀၀၀) ကျပ် ပေးရကြောင်း တောင်ကြီးဒေသခံမှ အသက် ၂၀ နှစ် အရွယ်ရှိ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“သူတို့ ဆိုင်ကယ်သော့တန်းယူထားတာ၊ ကျမ ဆိုင်ကယ်နံပါတ်ပြားကရှိတယ်၊ နံပါတ်ပြားက နည်းနည်းလေး မကောင်းတာလည်း မရဘူး၊ ဆိုင်ကယ်နံပါတ်ပြား အသစ်သွားဝယ်ခိုင်းတယ်၊ ပြီးရင် ဓာတ်ပုံရိုက်တယ်။ သူတို့ပြပြီးမှ ဆိုင်ကယ်သော့ ပြန်ပေးတယ် “ဟု ၎င်းက ပြောသည်။
စစ်တပ် အာဏာသိမ်းပြီးနောက်ပိုင်း သျှမ်းပြည်အတွင်း ပြည်သူများ ခရီးသွားလာမှု ပိုမိုခက်ခဲလာကြောင်း၊ စစ်ဆေးမှုလည်း တနေ့ထက် တနေ့ တင်းကြပ်လာကြောင်းသိရသည်။
