သျှမ်းပြည်မြောက်ပိုင်းအတွင်း မိုးသည်းထန်စွာရွာသွန်းပြီး ရေကြီးရေလျှံမှုဖြစ်ပွားကာ ဒေသခံတစ်ဦး သေဆုံးခဲ့ကြောင်း စုံစမ်းသိရဿည်။
ဇူလိုင် (၃) ရက်တွင် သီပေါမြို့ ဆောင်ကြဲကျေးရွာအုပ်စု၊ ဆောင်ကြဲကျေးရွာအတွင်း မိုးသည်းထန်စွာ ရွာသွန်းသဖြင့် ဒေသခံ အမျိုးသားတစ်ဦး သေဆုံးခဲ့ပြီး စိုက်ပျိုးသီးနှံများလည်း ပျက်စီးကြောင်း ဒေသခံများ ပြောပြချက် အရသိရသည်။
“သူက ရောဂါအခံရှိတယ်။ အရက်လည်း အနည်းငယ်သောက်တယ်။ အဲ့နေ့ သူက မိုးရွာပြီး အပြင်ထွက်သွား လိုက်တာ။ ရေကတော့ အရမ်းကြီးမနက်ဘူး။ သူက ရောဂါအခံရှိတော့ သွေးတိုးပြီးတော့ ရေထဲမှာ မှောက်သွားတာ။ သူမှောက်သွားတဲ့အချိန်က ဘယ်သူမှ သူ့ကို မတွေ့ဘူး။ လမ်းမှာရေလာ စုတ်တဲ့အချိန်မှာ သူ့ကိုတွေ့တော့ သူက သေနေပြီ” ဟု ဆောင်ကြဲကျေးရွာ ဒေသခံ အမျိုးသား တစ်ဦးက ပြောသည်။
အဆိုပါသေဆုံးသွားသည့်သူသည် အမျိုးသားဖြစ်ပြီး အသက် (၄၀) နှစ်ဝန်းကျင်ရှိပြီး ၎င်းသည် မိခင်နှင့် အတူနေထိုင်သည့် သူတစ်ဦးဖြစ်သည်။
လက်ရှိအချိန်ထိ သီပေါမြို့နယ် ဆောင်ကြဲကျေးရွာထဲတွင် ရေကြီးနေသေးကြောင်းသိရသည်။
အလားတူ ယနေ့ ဇူလိုင် (၅) ရက် ကျောက်မဲမြို့နယ် ပုံဝိုးအုပ်စုအတွင်း မနက်ပိုင်း မိုးသည်းထန်စွာ ရွာသွန်းမှုကြောင့် လမ်း၊ တံတားများ နှင့် ပြည်သူများ၏ လယ်ယာ၊ စိုက်ခင်းများလည်း အများအပြား ပျက်ဆီးသွားကြောင်းသိရသည်။
“ လယ်ကွက်တွေလည်း အများကြီး ရေမြှုပ်သွားတယ်။ လမ်းတွေလည်း သွားလာလို့မရသေးဘူး။ တံတားတွေလည်း ပျက်နေတယ်။ လယ်ကွက်တွေဆို အကုန်လုံးမြှုပ်သွားတယ်။ စပါးတွေတော့ အခုမစိုက်ရသေးဘူး။ ထွန်ထားတုန်းပဲရှိသေးတယ်” ဟု ပုံဝိုးကျေးရွာ ဒေသခံအမျိုးသားတစ်ဦးက ပြောသည်။
ထိုအပြင် လက်ရှိမှာ သျှမ်းပြည်တစ်ဝှမ်း မိုးသည်းထန်စွာရွာသွန်းနေပြီး မြို့နယ်အများစုက ရေကြီး နေလျက်ရှိကြောင်းသိရသည်။
