သျှမ်းပြည်တောင်ပိုင်း ခိုလမ်မြို့ အခြေစိုက် စစ်ကောင်စီတပ်သည် စစ်အင်အားအပြည့်ဖြင့် ကွန်ဟိန်းမြို့ဘက်သို့ ဦးတည်သွားနေကြောင်း ဒေသခံများထံ စုံစမ်းသိရသည်။
ပြီးခဲ့သည့် ဇူလိုင် ၂ ရက် ညနေပိုင်းအချိန်တွင် စစ်ကောင်စီ စစ်ကား (၆) စီး လူအင်အားအပြည့်ဖြင့် ကွန်ဟိန်းမြို့ဘက်သို့ ဦးတည်သွားကြောင်း သိရသည်။
“သူတို့ ညဘက်မှာထွက်သွားတာ။ ကား (၅)စီး (၆) စီးလောက်ရှိတယ်။ သူတို့ ကွန်ဟိန်းဘက်ကို ဦးတည်ပြီးတော့ ထွက်သွားတာ။ အဲ့ဘက်ကနေ သွားရင် ကာလိ ၊ မိုင်းစန်မြို့ ကနေဆို မိုင်းရှူးဘက်ကို ရောက်သွားနိုင်တယ်” ဟု ခိုလမ်မြို့ ဒေသခံ အမျိုးသားတစ်ဦးက ပြောသည်။
လက်ရှိအချိန်သည် စစ်ကောင်စီ နှင့် ရှမ်းပြည်တိုးတက်ရေးပါတီ ၊ ရှမ်းပြည်တပ်မတော် (SSPP/SSA) တို့သည် မိုင်းရှူးမြို့ဘက်တွင် စစ်ရေးတင်းမာလျက်ရှိနေကြောင်း သိရသည်။
အလားတူ စစ်ကောင်စီသည် မိုင်းရှူးမြို့ နှင့် တန့်ယန်းကြားတွင်လည်း စစ်အင်အားဖြည့်နေကြောင်း သိရသည်။
“စစ်ကောင်စီကတော့ အင်အားတွေဖြည့်နေတာပဲ။ သူတို့ ညညဆို ကားတွေနဲ့ ထွက်သွားတယ်။ ပြန်လာရင် ကားပေါ်မှာလူမရှိတော့ဘူး။ မိုင်းရှူးကနေလည်း လွိုင်နိုင်းဘက်သွားတာလည်းရှိတယ်။ ပြီးတော့ မိုင်းရှူးမြို့ရဲ့ မြောက်ဘက်ကို သွားတဲ့ စစ်ကားတွေလည်းရှိနေတယ်” ဟု မိုင်းရှူးမြို့ ဒေသခံ အမျိုးသမီးတစ်ဦးက ပြောသည်။
စစ်ကောင်စီက မိုင်းရှူးမြို့ နှင့် တန့်ယန်းမြို့ကြားရှိ SSPP တပ်စခန်း (၃) နေရာကို ဇွန် (၃၀)ရက် နောက်ဆုံးထားပြီး တပ်ဆုတ်ခိုင်းခဲ့ကြောင်း သိရသည်။
လက်ရှိအချိန်ထိ SSPP တပ်စခန်းဆုတ်သွားခြင်းမရှိပဲ သျှမ်းမြောက် မိုးမိတ်ဘက်တွင် ဇူလိုင် (၁) ရက်နေ့က စစ်ကောင်စီ နှင့် တိုက်ပွဲဖြစ်ပွားခဲ့ကြောင်း သိရသည်။
Leave a Comments