သျှမ်းပြည်မြောက်ပိုင်း အခြေစိုက် တိုင်းရင်းသားလက်နက်ကိုင်ဖြစ်သည့် တအာင်း (ပလောင်) အမျိုးသား တပ်မတော် (TNLA) တပ်ဖွဲ့သင်တန်းဆင်းလာသည့် လူငယ် (၁၀) ဦး ကို ရန်ကုန်မြို့တွင် ဖမ်းဆီးခံရကြောင်း သတင်းသိရသည်။

ရန်ကုန်မြို့ ဧရာဝတီလမ်းရှိ ရဲကင်းဖောက်ခွဲမှုတွင် လုပ်ဆောင်ခဲ့သည့် လူငယ် (၁၀) ကို ဖမ်းဆီးရမိထားကြောင်း စစ်ကောင်စီ သတင်းပြန်ကြားရေးက ဇွန် (၃၀) ရက်မှာ သတင်းထုတ်ပြန်ခဲ့ကြောင်း သိရှိရသည်။

“ပြီးခဲ့တဲ့ ဇွန်လ (၁၆) ရက်မှာ ဒဂုံမြို့သစ် (တောင်ပိုင်း) မြို့နယ်၊ ဧရာဝတီလမ်းရှိ ရဲကင်းကို ဖောက်ခွဲရေး လုပ်ခဲ့တဲ့ အဖွဲ့သားတွေပါ၊ သူတို့ကို ဇွန်လ ၁၄ ရက်မှာ ၇ ယောက်အရင်ခြေရာခံမိပြီး ဖမ်းမိတယ်၊ ၁၆ ရက်နေ့မှာတော့ ၃ ယောက်ဖမ်းမိတယ်”ဟု မြေပြင်လှုပ်ရှားသည့်အဖွဲ့နှင့် နီးစပ်သူ လူငယ်တစ်ဦးက သျှမ်းသံတော်ဆင့်ကို ပြောသည်။

TNLA ထံတွင် ဖောက်ခွဲရေး သင်တန်း တက်ရောက်ခဲ့ပြီးနောက် Yangon Union Young Organization-(YUYO) အဖွဲ့ဝင်များနှင့်အတူ ဖောက်ခွဲရေး လုပ်ငန်းများ လက်တွေ့လုပ်ဆောင်စဥ်တွင် ဖမ်းဆီးခံရခြင်းဖြစ် ကြောင်း သိရသည်။

လက်ရှိဖမ်းဆီးခံရသူ ကျား (၆) ဦး၊ မ (၄) ဦး၊ ပေါင်း (၁၀) ဦးတို့အား လက်လုပ် Remote မိုင်း (၂) လုံး၊ Sound Box အတွင်း ထည့်သွင်းတပ်ဆင်ထားသည့် Remote မိုင်း (၁) လုံး၊ Keypad ဖုန်း (၁) လုံး၊ ကြယ်ဖြူတစ်လုံးပါ အလံ (၁) ခုတို့နှင့်အတူ ဖမ်းဆီးရမိခဲ့ကြောင်း စစ်တပ်ဝါဒဖြန့် သတင်းစာမျက်နှာများ တွင် ရေးသားထားသည်။