သျှမ်းပြည်တောင်ပိုင်း မိုးဗြဲမြို့အတွင်း စစ်ရှောင်ကလေးများအတွက် စာသင်ရန် ခက်ခဲမှုရှိနေကြောင်း စုံစမ်းသိရသည်။
မိုးဗြဲမြို့အတွင်း စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲကြောင့် ပြည်သူများ ထွက်ပြေးနေရပြီး လက်ရှိ ကလေးများအတွက် စာသင်ရန်ခက်ခဲနေကြောင်း စစ်ရှောင်များကို ကူညီပေးနေသည့် အသက် ၂၆ နှစ် အရွယ်ရှိ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ အခု အားလုံးကတော့ အဆင်ပြေနေတာတော့ရှိပါတယ်။ ဒါပေမယ့် ကျနော်တို့ စစ်ရှောင်ကလေးတွေအခက်အခဲဖြစ်နေပါတယ်။ သူတို့ စာသင်ပေးဖို့ အဆောက်အအုံတွေ ၊ ခုံတွေက ခက်ခဲနေတာပါ” ဟု ၎င်းက ဆိုသည်။
အဆိုပါ စစ်ရှောင်ကလေးများသည် စာသင်ရန်အတွက် မိုးကာ၊ ခုံ၊ သင်ထောက်ကူပစ္စည်း၊ စာရေးကိရိယာများ လိုအပ်နေကြောင်းသိရသည်။
“ကုန်ကျစရိတ်ကတော့ ၅ သိန်းဝန်းကျင်လောက်ကျမယ်ထင်တယ်ဗျ၊ ကျနော်တို့ အခုက မိုးကာ၊ ခုံ၊သင်ထောက်ကူ ပစ္စည်းတွေ၊ စာရေးကိရိယာတွေ လိုအပ်နေတယ်။ အဲဒါတွေ ခက်ခဲနေပါတယ်။ ကလေးတွေကလည်း များနေတယ်။ သူတို့အတွက် စာမသင်ရရင်လည်း နောက်လာမယ့် သူတို့အနာဂတ် မကောင်းဘူးလေ” ဟု စစ်ရှောင်ကူညီသည့် သူက ထပ်လောင်းပြောသည်။
မိုးဗြဲမြို့ အတွင်းရှိ ကျေးရွာအများစုသည် စစ်ကောင်စီက တပ်စွဲထားပြီး ပြည်သူအများစု စစ်ဘေးရှောင် နေရကြောင်းသိရသည်။
အလားတူ ဇွန် ၂၈ ရက်နေ့တွင်လည်း စစ်ကောင်စီက ဝါရီဆူးပလိုင်းကျေးရွာကို တပ်စွဲနေထိုင်ထားသောကြောင့် ပြည်သူ့ကာကွယ်ရေးတပ်ဖွဲ့ PDF က စစ်နယ်ဇုန်အဖြစ်သတ်မှတ်လိုက်ရကြောင်းသိရသည်။
မိုးဗြဲမြို့အတွင်း စစ်ဘေးရှောင်စုစုပေါင်း ၁ ထောင်ကျော်ရှိပြီး ထိုထဲတွင် ကလေး နှင့် အမျိုးသမီး အများစုဖြစ်ကြောင်းသိရသည်။
Leave a Comments