သျှမ်းပြည်တောင်ပိုင်း ရွာငံမြို့နယ်အတွင်း အာဏာသိမ်းစစ်ကောင်စီ လက်အောက်ခံ အဖွဲ့အစည်းများသည် သစ် နှင့် သတ္တုများ ခိုးထုတ်နေကြောင်း သတင်းသိရသည်။
ရွာငံမြို့နယ် ဆင်ခေါင်းကျေးရွာအုပ်စု၊ လေးရွာကျေးရွာအတွင်းရှိ ပြည်သူများ ထိန်းသိမ်းစောင့်ရှောက်ထားသည့် ကန့်သတ် သစ်တောကြိုးဝိုင်းမှ သစ်များကို စစ်ကောင်စီ လက်အောက်ခံ ပျူစောထီး နှင့် PNO တပ်ဖွဲ့တို့မှ ခိုးထုတ် မှုများရှိနေ ကြောင်း ဒေသခံများထံမှ သိရသည်။
“ညဘက်ရောက်မှ သစ်ကို ဖြတ်၊ ခိုးထုတ်တာ လုပ်တယ်၊ တခါတလေတော့ လက်နက်တွေကိုင်ပြီး ကြိုးဝိုင်းထဲလာတယ်။ နှစ်ရက်၊သုံးရက်လောက်နေရာယူထားတာ၊ သေသွားတဲ့ ပျူစောထီးခေါင်းဆောင် ဦးဝင်းမြင့် တပည့်နဲ့ PNO/PNA တွေပေါင်းပြီးလုပ်နေပါတယ်” ဟု ရွာငံမြို့နယ်မှ အသက် ၃၀ အရွယ်ရှိ ဒေသခံ အမျိုးသားတစ်ဦးက သျှမ်းသံတော်ဆင့် ကို ပြောသည်။
ထို့အပြင် သစ်ခိုးထုတ်သူများသည် ဖြတ်စက်များအပြင် လက်သုံးလွှများ၊ သေနတ်များ နှင့် ဓားများကိုလည်း ကိုင်ဆောင်လေ့ရှိကြောင်း အထက်ပါ ပုဂ္ဂိုလ် ကပြောသည်။
လေးရွာမြို့နယ်မှ သစ်တောကြိုးဝိုင်းအပြင် ရွာငံမြို့နှင့် ပင်းတယမြို့ ကြားရှိ ကန့်သတ်သစ်တောကြိုးဝိုင်း တချို့မှာလည်း ပျူစောထီး နှင့် PNO/PNA များ သစ်ခိုးထုတ်နေမှုများ ရှိနေကြောင်းလည်း ဖြစ်စဥ်များကို သိရှိသူ အမည်မဖော်လိုသူ အသက် ၄၀ ကျော် အမျိုးသားတစ်ဦးက သျှမ်းသံတော်ဆင့်ကို ပြောသည်။
“လုပ်ပိုင်ခွင့်တွေကို အသုံးချပြီး ကန့်သတ်သစ်တော တော်တော်များများမှာ သစ်ခိုးထုတ်မှုတွေ ရှိနေပါတယ်၊ ရွာငံမြို့နယ်နဲ့ ပင်းတယကြားမှာလည်း သစ်ခိုးထုတ်မှုတွေ ရှိနေပါတယ်” ဟု ၎င်းက ပြောသည်။
ထို့အပြင် ရွာငံမြို့ မြောက်ပိုင်းရှိ ယုန်တောင်ဘက်တွင်လည်း စစ်ကောင်စီ လက်အောက်ခံတပ်ဖွဲ့များက သတ္တုခိုးထုတ်ယူမှု ရှိနေကြောင်း သိရသည်။
“ယုန်တောင်ဘက်မှာ ခဲမဖြူတွေ ခိုးထုတ်နေပါတယ်၊ မြို့ပြင်ဘက်လည်းရောက်တယ်၊ စစ်ကောင်စီစစ်ဆေးရေး ဂိတ်လည်း ရှိနေတော့ပြည်သူတွေ PDF တွေ မရောက်တာကို အခွင့်ကောင်းယူပြီး သတ္တုတွေ ထုတ်နေတယ်” ဟု အထက်ပါ အမည်မဖော်လိုသူက ဆက်ပြောထားသည်။
အဆိုပါ စစ်ကောင်စီလက်အောက်ခံများ ပူးပေါင်းခိုးထုတ်နေသည့် သစ်နှင့် သတ္တုများကို အောင်ပန်းဘက်သို့ သယ်ယူသွားကြောင်း ဒေသခံများက ပြောသည်။
စစ်အာဏာသိမ်းမှု မဖြစ်ခင်တွင် ရွာငံမြို့နယ်အတွင်း၌ တရားမဝင် တူးဖော်နေသည့် သတ္တုတွင်း ကုမ္ပဏီ ၅ ခု ထပ်မနည်း ရှိကြောင်း နှင့် လက်ရှိအာဏာသိမ်းပြီးနောက်ပိုင်း အရေအတွက် ပိုမိုများပြားလာနိုင်ကြောင်းလည်း ဒေသခံများက ဝေဖန်ပြောဆိုထားသည်။
