သျှမ်းပြည်တောင်ပိုင်း တောင်ကြီးခရိုင် ပုံးအင်းဒေသကို ပအိုဝ်းအမျိုးသားအဖွဲ့ချုပ် (PNO) က နိုင်ငံရေး ရှုပ်ထွေးနေချိန် အခွင့်ကောင်းယူပြီး သိမ်းယူရန် ကြိုးပမ်းနေကြောင်း ဒေသခံများထံမှ စုံစမ်းသိရှိရသည်။
အဆိုပါ ပုံးအင်းဒေသသည် တောင်ကြီးမြို့နယ်၊ ဟိုပုံးမြို့နယ် နှင့် ဆီဆိုင်မြို့နယ် (၃) မြို့နယ် ပါဝင်ဖွဲ့စည်းထားသည်။
ထိုပုံးအင်းဒေသအတွင်းရှိ ကျေးရွာများကိုလည်း မြစ်ချောင်းအဖြစ် ခြားထားပြီး မြို့နယ်အလိုက် ကွဲသွားကြောင်း သိရသည်။
“ကျနော်တို့ ပုံးအင်းဒေသက ကျယ်တယ်။ ၃ မြို့နယ်ရှိတယ်။ ကျနော်တို့နေတာတော့ ဆီဆိုင်မြို့နယ်ထဲပါတယ်။ မြို့နယ်တွေကိုလည်း ချောင်းပဲခြားတယ်။ ချောင်းရဲ့ အနောက်ဘက်ကဆိုရင် တောင်ကြီးမြို့နယ်ထဲပါတယ်။ ချောင်းရဲ့ အရှေ့ဘက်ကတော့ ဆီဆိုင်မြို့နယ်ထဲပါတယ်” ဟု ပုံးအင်းဒေသတွင်းနေထိုင်သည့် အသက် ၂၀ အရွယ် လူငယ်အမျိုးသားတစ်ဦးက ပြောသည်။
စစ်ကောင်စီက ရေးဆွဲထားသည့် ၂၀၀၈ ဖွဲ့စည်းပုံ အခြေခံဥပဒေအရ ဆီဆိုင်မြို့နယ်၊ ဟိုပုံးမြို့နယ်၊ ပင်လောင်းမြို့နယ် တို့ကို ပအိုဝ်းကိုယ်ပိုင်ခွင့် ပေးထားကြောင်း သိရသည်။
လက်ရှိမှာ ပုံးအင်းဒေသအားလုံးကိုလည်း နိုင်ငံရေး ရှုပ်ထွေးနေချိန် (PNO) တပ်ဖွဲ့မှ ၎င်းလက်အောက်ထဲသို့ သိမ်းရန် ကြိုးစားပြီး ပအိုဝ်းကိုယ်ပိုင်အုပ်ချုပ်ခွင့်ရအဖြစ် ထားရန် ကြိုးစားနေကြောင်း ဒေသခံများ ပြောပြချက်အရ သိရသည်။
“ဟုတ်တယ်။ သူတို့က ရှေ့ကြိုတွေးပြီးတော့လုပ်နေတယ်။ ဒီနေရာတွေကို သူတို့နယ်မြေထဲ ပါလာအောင်လည်း လုပ်နေတာ။ သူတို့ ပြည်နယ်အသစ်လိုမျိုးလိုချင်တာ” ဟု အသက် ၄၀ ကျော် ဝန်းကျင်ရှိ အမျိုးသားက ပြောသည်။
ပုံးအင်းဒေသတွင်းရှိ ကျေးရွာအုပ်ချုပ်ရေးမှူးကိုလည်း PNO မှ ပြန်ခန့်အပ်ပြီး၊ ရွာလုံခြုံရေးအဖွဲ့ကို တစ်ရွာလျှင် ၁၇ ဦး ခန့်ထားသည်။
“အခုက ရွာတစ်ရွာမှာ ရွာလုံခြုံရေးအဖွဲ့က ၁၇ ထိ ဖွဲ့ပေးလိုက်တယ်။ အဲ့ရွာလုံခြုံရေးအဖွဲ့ရဲ့ ဥက္ကဌ က ကျေးရွာအုပ်ချုပ်ရေးမှူးတွေဖြစ်တယ်” ဟု အထက်ပါ ဒေသခံက ပြောသည်။
အဆိုပါ ရွာလုံခြုံရေးအဖွဲ့ဝင်များကိုလည်း ကျေးရွာအတွင်းရှိ ပြည်သူများက မည်သည့်အတွက်ကြောင့် ၎င်းတို့ကို ဖွဲ့စည်းကြောင်း အကျိုးအကြောင်းကို မသိရှိရသေးပေ။
ထိုရွာလုံခြုံရေးအဖွဲ့များကိုလည်း PNO တပ်ဖွဲ့မှ စိတ်ကြိုက်ရွေးချယ်ခန့်အပ်ခဲ့ပြီး၊ ကျေးရွာအတွင်းရှိ ပြည်သူများ ကိုလည်း စည်းရုံးနိုင်ရန် အတွက် ခန့်ထားကြောင်း သိရသည်။
“ သူတို့ ခန့်ထားပေးတဲ့ ရွာလုံခြုံရေးအဖွဲ့တွေကလည်း PNO လက်အောက်ကပဲဖြစ်တယ်။ PNO ကလည်းသူတို့ စိတ်ကြိုက်လူ ကိုဖွဲ့ထားတာ။ သူတို့ လိုရာကို အသုံးပြုနိုင်မဲ့သူကို ဖွဲ့ပေးလိုက်တာဖြစ်မယ်ထင်တယ်” ဟု ၎င်း ဒေသခံက ထပ်လောင်းပြောသည်။
ထိုအပြင် လုံခြုံရေးအဖွဲ့ဝင်များသည်လည်း အသက်ကြီးရွယ်အိုသူများဖြစ်ကြောင်း သိရသည်။
“နမ့်ကွတ်ရွာမှာ ဖွဲ့ထားတဲ့ ရွာလုံခြုံရေးအဖွဲ့တွေဆို အသက်ကြီးတဲ့ သူတွေပဲဖြစ်တယ်။ တစ်ချို့ဆိုရင် အသက် ၅၀၊ ၆၀ သမားတွေဖြစ်တယ်။ အသက်ကြီးတဲ့ သူတွေကိုပဲ အများဆုံးခန့်ထားတာ” ဟု အသက် ၄၀ အရွယ်ရှိ အမျိုးသားတစ်ဦးက သျှမ်းသံတော်ဆင့် ကိုပြောသည်။
လက်ရှိမှာလည်း ပုံးအင်းဒေသကို အထူးဒေသ (၆) ကန်တောင်ကြီးမြို့နယ် ဟု သတ်မှတ်ရန်ကြိုးစားနေပြီး၊ ရွာလုံခြုံရေးအဖွဲ့များကို ဖွဲ့စည်းပေးလိုက်ကြောင်း သိရသည်။
ထိုအပြင် လက်ရှိ PNO ၏ စစ်သင်တန်းတက်ရန် ပြည်သူများကို ကောက်ခံနေသောကြောင့် ဒေသတွင်း လူငယ်အများစုကလည်း အိမ်နီးချင်း ထိုင်းနိုင်ငံသို့ ထွက်ပြေးသွားပြီး ကျေးရွာအတွင်းတွင် အသက်ကြီးသူများသာ ကျန်ရှိခဲ့သည်။
“ အခုသူတို့လိုရာသွင်းဖို့ ဖန်တီးနေပြီလေ။ အထူးဒေသ (၆) ထဲပါလာအောင်ပြီးတော့ အခုက ကန်တောင်ကြီးမြို့နယ် ဆိုပြီးတော့ အသစ်ထပ်လုပ်လာတယ်။ ဒါက တကယ်ဆို ဒီမြို့နယ်က မရှိဘူးလေ။ သူတို့ ဖန်တီးနေတာလေ။ ကြာလာရင် သူတို့ကိုထောက်ခံကြောင်း ပြည်သူတွေကို လက်မှတ်ထိုးခိုင်းမယ်” ဟု အမည် နှင့် နေရာ မဖော်လိုသည့် ပြည်သူက ပြောသည်။
ထိုအသစ်ဖွဲ့မည့် ကန်တောင်ကြီးမြို့နယ်သည် တောင်ကြီးမြို့နယ်အတွင်းရှိ ပုံးအင်းကျေးရွာ အုပ်စုများ၊ ဆီဆိုင်မြို့နယ်၊ ဟိုပုံးမြို့နယ် ပါဝင်သွားမည် ဖြစ်ကြောင်း သိရသည်။
ပအိုဝ်းအမျိုးသားအဖွဲ့ချုပ် PNO တပ်များသည် မေလမှ စပြီး တောင်ကြီးမြို့နယ်၊ ဟိုပုံးမြို့နယ်၊ ဆီဆိုင်မြို့နယ် နှင့် ပင်လောင်းမြို့နယ်ထဲတွင် တစ်အိမ်ကို ငွေ (၃) သောင်းနှင့် ဆန် တစ်ပြည် ကောက်ခံနေကြောင်း သိရသည်။
ပုံးအင်းဒေသသည် စိုက်ပျိုးရေးကောင်းမွန်ပြီး ထိုဒေသမှ ထွက်သည့် ဆန်ကို သျှမ်းပြည်တစ်ဝှမ်းလုံး စားသုံးနေသည်။
Leave a Comments