သျှမ်းပြည်မြောက်ပိုင်း လားရှိုးမြို့နယ် မိုင်းယော်တိုက်နယ် မိုင်းကျက်ကျေးရွာအုပ်စုမှ အုပ်ချုပ်ရေးမှူး နှင့် ရွာသူကြီးများသည် ပြည်သူများထံ ငွေကြေးအတင်းအဓမ္မ ကောက်ယူနေကြောင်း စုံစမ်းသိရသည်။
ယမန်နေ့ ဇွန် (၂၇) ရက် နံနက်ပိုင်းမှာ မိုင်းကျက်ကျေးရွာအုပ်စု အုပ်ချုပ်ရေးမှူး စိုင်းထွန်းယီ နှင့် ကျေးရွာသူကြီး တို့ပူးပေါင်းပြီး အခွန်ပြေစာအတုဖြင့် တောင်သူများထံ ငွေကြေးအတင်းအဓမ္မ ကောက်ယူနေကြောင်း သိရသည်။
၎င်းအခွန်ပြေစာတုဖြင့် လယ်ယာပိုင်ရှင်များထံ တစ်ဦးလျှင် တစ်ထောင်ကျပ် ကောက်ယူခဲ့သည်။
“သူတို့ အခွန်ပြေစာလုပ်ပြီး ကောက်ယူကြတယ်။ ခြံပိုင်ရှင်တွေ တစ်ယောက်ကို (၁) ထောင်ကျပ်ပေးရတယ်။ ဒီတစ်ခါ ပထမဆုံးအကြိမ် ငွေတာင်းတာပဲဖြစ်တယ်။ တစ်ခါမှ ဒီလိုမကြုံဖူးဘူး။ သူတို့ လုပ်စား ကြတာပဲထင်တယ်။ ရုံးထဲက တစ်ချို့သူတောင် မသိရဘူး” ဟု မိုင်းကျက်ကျေးရွာ ဒေသခံ စိုင်းခမ်းစိုင်း က သျှမ်းသံတော်ဆင့် ကိုပြောသည်။
အဆိုပါ ငွေတောင်းပြေစာတုကို မိုင်းကျက်ကျေးရွာအုပ်စုရှိ ကျေးရွာများက ဒေသခံ ပြည်သူများထံ ကောက်ခံခြင်း ဖြစ်ကြောင်း သိရသည်။
“အဲ့အခွန်ပြေစာထဲမှာ သူတို့ လယ်ယာပိုင်ရှင်တွေရဲ့ နာမည်နဲ့တကွ ရေးထားပြီး သူများ ဘာပဲ စိုက်ထားစိုက်ထား ပြောင်းစိုက်ပျိုးထားတယ်လို့ပဲ ရေးထားတယ်။ လယ်ယာမြေလဲ သူတို့ အကျယ်အဝန်း ထည့်ချင်သလောက် ထည့်လိုက်တာပဲ။ အဲ့ပြေစာထဲမှာက လယ်ယာ မြေဧက (၇) ဧကရှိရင် သူတို့ (၇) ကျပ်ခွဲ အဲ့လိုရေးထားပေမယ့် သူတို့ကို (၁၀၀၀) ကျပ်ပေးရတယ်” ဟု စိုင်းခမ်းစိုင်း က ထပ်လောင်းပြောသည်။
စစ်တပ်အာဏာသိမ်းပြီးနောက်ပိုင်း ကုန်စျေးနှုန်းများ အဆမတန် စျေးတက်လာသဖြင့် ပြည်သူများ စားဝတ်နေရေးအတွက် အခက်အခဲဖြစ်ကြသည့်အချိန် ငွေ (၁) ထောင်ကျပ်သည် ဒေသခံ ပြည်သူများ အတွက် များစွာ တန်ဖိုးရှိကြောင်း မိုင်းယော်ကျေးရွာ ဒေသခံများက ပြောသည်။
ယခုလို အထက်လူကြီးက ဒေသခံ ပြည်သူများထံ ငွေကြေးကောက်ခံမှုများ ပြုလုပ်ခြင်းသည် သွားရောက်တိုင်ကြားမည့် နေရာ မရှိသည့်အတွက် ဒေသခံများ ခက်ခဲနေကြောင်း သိရသည်။
မိုင်းကျက်ကျေးရွာအုပ်စုသည် အိမ်ခြေ (၂၀၀) ခန့်ရှိပြီး မိုင်းကျက်ကျေးရွာအုပ်စု စိုင်းထွန်းယီ နှင့် ကျေးရွာသူကြီးတို့ က လုံကျက်ကျေးရွာ မှာ အခွန်ပြေစာတု ကောက်ပြီး ၎င်း ကျေးရွာသည် အိမ်ခြေ (၇၆) အိမ်ခန့်ရှိကာ အိမ်တိုင်းနီးပါး တစ်အိမ် (၁) ထောင်ကျပ် ပေးဆောင်ရကြောင်း သိရသည်။
Leave a Comments