သျှမ်းပြည်တောင်ပိုင်း လွိုင်လင်ခရိုင်အတွင်း တိုင်းရင်းသားလက်နက်ကိုင် လှုပ်ရှားနေသည့် ဒေသများတွင် မြေမြှုပ်မိုင်းများရှိနေသည့်အတွက် ပြည်သူများ တောင်ယာသွားရန် ခက်ခဲနေကြောင်း စုံစမ်းသိရသည်။
လွိုင်လင်ခရိုင်အတွင်းရှိ မိုင်းကိုင်မြို့နယ်၊ လဲချားမြို့နယ်၊ ပင်လုံမြို့တွင် တိုင်းရင်းသား လက်နက်ကိုင်အချင်းချင်း ဖြစ်ကြသည့် မြောက်ပိုင်းမဟာမိတ်နှင့် သျှမ်းပြည်ပြန်လည်ထူထောင်ရေးကောင်စီ၊သျှမ်းပြည်တပ်မတော် (RCSS/SSA) တို့ ယမန်နှစ် ၂၀၂၁ ခုနှစ်တွင် တိုက်ပွဲဖြစ်ပွားခဲ့သည်။
ထိုတိုက်ပွဲဖြစ်ပွားပြီးနောက် မြေမြှုပ်မိုင်းများရှိလာကာ ထိခိုက်ဒဏ်ရာရရှိသူ ၁၀ ဦးအထက် ရှိကြောင်း သိရသည်။
အဆိုပါ မြေမြှုပ်မိုင်းကြောင့် ဒေသခံများက ရာသီစာ ဟင်းသီးဟင်းရွက်များကို တောတောင်ထဲသို့ သွားရောက် ရှာဖွေရန် အတွက် အခက်အခဲများကြုံတွေ့နေရကြောင်း မိုင်းကိုင်မြို့နယ် ဒေသခံများကပြောသည်၊
“တပ်ပေါင်းစု နဲ့ RCSS နဲ့ တိုက်ပွဲဖြစ်ပြီးကတည်းက ကျမတို့ တောတောင်ထဲ မသွားလည်ရဲဘူး။ တောတွေထဲမှာလဲ မြစ်၊ မှို၊ ဟင်းသီးဟင်းရွက် တွေသွားမရှာရတော့ဘူး။ သွားမရှာရဲဘူး။ ဒီအချိန်ကလည်း စားဝတ်နေရေးအတွက် ခက်ခဲနေတဲ့ အချိန်ဖြစ်တယ်လေ။ တောထဲမှာ ဟင်းသီးဟင်းရွက်မရှာနိုင်တော့ ဈေးထဲသွားဝယ်နေရတယ်” ဟု အမည် နှင့် နေရာ မဖော်လိုသည့် ဒေသခံ အမျိုးသမီးက ပြောသည်။
အလားတူ လဲချားမြို့အတွင်းနေထိုင်သည့် အမျိုးသမီးတစ်ဦးက “ကျမအရင်က ရွာပြန်ပြီးတော့ တောထဲမှာ ဟင်းသွားရှာတယ်။ ပြီးတော့ မြို့မှာ ပြန်လာရောင်းတယ်လေ။ အခုက ကျမလည်း ရွာပြန်ရင်လည်း တောထဲ မသွားရဲဘူး။ ဟင်းတွေလည်း ဈေးထဲမှာပဲဝယ်ဖြစ်တော့တယ်” ဟု ပြောသည်။
ထိုအပြင် မြေမြှုပ်မိုင်းများ ရှိထားသောကြောင့် ပြည်သူများက ကျွဲ၊ နွားများကိုလည်း ကိုယ်တိုင် ကျက်စားရန် အတွက် ကွင်းပြင်သို့ မပို့ထားရဲတော့ကြောင်း သိရသည်။
“ ကျွဲ၊နွားတွေ ကျက်စားဖို့လည်း နေရာက ရှားလာပြီး။ အရင်လို လွှတ်ချင်တဲ့နေရာကို လွှတ်လို့မရတော့ဘူး။ သူတို့ကိုလည်း မိုင်းသွားနင်းမိမှာကို စိုးရိမ်တယ်။ ကျွဲ၊ နွားတွေက တစ်နေရာထဲပဲ သွားလာပြီး ရှာစားနေတာ မဟုတ်ဘူး။ သူတို့မြေမြှုပ်မိုင်း နင်းမိလို့ သေသွားရင်လည်း တစ်ကောင်ကို ၄ သိန်းလောက်ရမဲ့အစား ၁ သိန်း လောက်ပဲပြန်ရမယ်” ဟု အထက်ပါ အမည် နှင့် နေရာမဖော်လိုသည့် ဒေသခံက ပြောသည်။
ထိုသို့ မြေမြှုပ်မိုင်းကြောင့် ပြည်သူများ စားဝတ်နေရေးခက်ခဲသောကြောင့် ပြန်လည်ဖြေရှင်းပေးရန်အတွက် တိုင်းရင်းသားလက်နက်ကိုင်များကို တောင်းဆိုကြသည်။
“ ကျနော်တို့ နယ်မြေတွေမှာ လှုပ်ရှားနေတဲ့ လက်နက်ကိုင်တွေကို ကျနော်တို့ တောင်းဆိုချင်ပါတယ်။ ဘယ်လက်နက်ကိုင်မဆိုပေါ့။ ဒီမြေမြှုပ်မိုင်းတွေကို ပြန်လာဖြေရှင်းပေးကြပါ။ ကျနော်တို့ ပြည်သူတွေက စားဝတ်နေရေးခက်ခဲနေပြီး သွားလာရတာလည်း ခက်ခဲနေရပါတယ်” ဟု ဒေသခံပြည်သူများက တောင်းဆိုကြသည်။
လွိုင်လင်ခရိုင် မိုင်းကိုင်မြို့နယ်၊ လဲချားမြို့နယ် နှင့် ပင်လုံမြို့တို့တွင် လက်ရှိ မြောက်ပိုင်းမဟာမိတ် တပ်ပေါင်းစုက သွားလာလှုပ်ရှားနေကြောင်းသိရသည်။
