မူဆယ်မြို့နယ်အတွင်း တိုင်းရင်းသားလက်နက်ကိုင် တပ်ဖွဲ့နှင့် စစ်ကောင်စီတို့ တိုက်ပွဲဖြစ်

0

သျှမ်းပြည်မြောက်ပိုင်း မူဆယ်မြို့နယ်အတွင်း တိုင်းရင်းသားလက်နက်ကိုင်တပ်ဖွဲ့နှင့် အာဏာသိမ်း စစ်ကောင်စီ တပ်ဖွဲ့တို့မှ တိုက်ပွဲဖြစ်ပွားခဲ့ကြောင်း သတင်းသိရသည်။

ယမန်နေ့ (ဇွန်လ ၂၆ )ရက် ညနေ ၂ နာရီဝန်းကျင်မှ စတင်ကာ မူဆယ်မြို့နယ် နမ့်တောင်းကျေးရွာဘက်တွင် တိုင်းရင်းသားလက်နက်ကိုင် တပ်ဖွဲ့နှင့် စစ်ကောင်စီတို့ တိုက်ပွဲဖြစ်ပွားခဲ့ကြောင်း သတင်းသိရသည်။

“တိုက်ပွဲက မစခင် ၂ နာရီမှာ လက်နက်ကြီးလေးလုံးနဲ့အရင်ဆုံးစပစ်တယ်၊ အဲ့ကနေ ပစ်ခတ်သံတွေ ဆက်တိုက် ကြားရပြီး ၄ နာရီလောက်မှ တိုက်ပွဲက ငြိမ်သွားတယ်၊ အဲ့တိုက်ပွဲအပြီး ည ၁၁ နာရီရောက်တော့ ၁၀၅ မိုင်ဘက် မှာ ရှိတဲ့ စစ်ကောင်စီတွေက လက်နက်ကြီးတွေနဲ့ လှမ်းပစ်တယ်လို့လည်း သိရတယ်” ဟု မူဆယ်မြို့ခံ အသက် ၃၀ နှစ်အရွယ်ရှိ အမျိုးသားတစ်ဦးက သျှမ်းသံတော်ဆင့်ကို ပြောသည်။

စစ်ကောင်စီနှင့် တိုက်ပွဲဖြစ်ပွားသည့် တိုင်းရင်းသားလက်နက်ကိုင်တပ်ဖွဲ့တို့သည် ကိုးကန့်တပ်မတော် MNDAA ဟု ဒေသခံများက ပြောဆိုသော်လည်း သျှမ်းသံတော်ဆင့်မှ သီးခြားအတည်ပြုနိုင်ခြင်းမရှိသေးပေ။

မူဆယ်မြို့

ထို့အပြင် ယင်းတိုက်ပွဲမှ စစ်ကောင်စီတို့ ပစ်လိုက်သည့် လက်နက်ကြီးကျည်ဆန်များသည် ကျေးရွာနှင့် လွန်စွာ နီးကပ်သည့် အနေအထားတွေ ကျရောက်ပေါက်ကွဲသဖြင့် ဒေသခံများက ထိတ်လန့်စိုးရိမ်နေကြကြောင်းလည်း သိရသည်။

“အခုတစ်ခေါက် ပစ်လိုက်မယ် ဆိုရင်တော့ လက်နက်ကြီးက ရွာထဲကို ကျမှာအမှန်ပဲ၊ အခုလို လက်နက်ကြီး နဲ့ ရွာတွေဘက် ရမ်းပစ်တာ မဖြစ်သင့်ပါဘူး၊ ကျနော်တို့ ဒေသခံတွေအနေနဲ့ လယ်ခြံသွား လုပ်ကိုင် စားသောက်ဖို့ ခက်ခဲပါတယ်၊ ပြီးတော့ စိုးရိမ်ထိတ်လန့်မှုနဲ့ စိတ်ဒုက္ခရောက်ရတယ်” ဟု လက်နက်ကြီး ကျသည့် နမ့်သောင်းကျေးရွာခံ တစ်ဦးက ပြောသည်။

ထို့အပြင် တိုက်ပွဲဖြစ်ပွားပြီးနောက် ည ၁၀ နာရီခန့်မှစကာ ည ၁၁ နာရီခွဲဝန်းကျင်အထိ မူဆယ်မြို့ ၁၀၅ မိုင်ဘက်ရှိ စစ်ကောင်စီတပ်မှ လက်နက်ကြီး ၇ ကြိမ်ထက်မနည်း ပစ်ခတ်မူများလည်း ရှိနေကြောင်းလည်း ဒေသခံများထံ မှ သိရသည်။

မူဆယ်မြို့နယ်အတွင်းတွင် တိုက်ပွဲများ မကြာခဏဖြစ်ပွားလေ့ရှိသည့်အတွက် ဒေသခံများစုပေါင်းကာ ကျေးရွာ အနီးပတ်ဝန်းကျင်တွင် တိုက်ပွဲမဖြစ်ကြရန် တိုင်းရင်းသားလက်နက်ကိုင်တပ်ဖွဲ့နှင့် စစ်ကောင်စီတို့ကို တောင်းဆို လိုကြောင်းလည်း သိရသည်။

ယခုရက်ပိုင်းအတွင်းတွင် သျှမ်းပြည် မြောက်ပိုင်း၊ မူဆယ်ခရိုင် ပြည်ထောင်စုလမ်းမ အနီးအနား တစ်ဝိုက် စစ်ကောင်စီနှင့် ကိုးကန့် MNDAA၊ စစ်ကောင်စီနှင့် ကချင်တပ်မတော် KIA တို့အကြား မကြာခဏ တိုက်ပွဲ ဖြစ်ပွားလာနေ ကြောင်း သိရသည်။

Leave a Comments