မြန်မာနိုင်ငံတစ်ဝှမ်းလုံး ကုန်ပစ္စည်းအဆမတန် မြင့်တက်လာသောကြောင့် ကျပန်းအလုပ်ကိုသာရှာလုပ်ရသည့် လူငယ်သည် ယခင်ကထက် ထမင်းကို လုံလုံလောက်လောက်မစားနိုင် တစ်နေ့ကိုထမင်းတစ်နပ်လျော့စားကာ ချွေတာပြီး စားနေရကြောင်း စုံစမ်းသိရှိရသည်။
သျှမ်းပြည်တောင်ပိုင်း တောင်ကြီးမြို့ပေါ်တွင် ကျပန်းအလုပ်ကို လုပ်ကိုင်နေသည့် လူငယ်များသည် ကုန်ပစ္စည်း အဆမတန်မြင့်တက်လာသဖြင့် ယခင် ထမင်းကိုတစ်ရက်လျှင် သုံးနပ်စားရပြီး ယခုအချိန် ကာလ၌ စီးပွားရေးကြပ်တည်းမှုကြောင့် တစ်ရက်လျှင် နှစ်နပ်သာ စားနေရကြောင်း တောင်ကြီးလူငယ် အမျိုးသား တစ်ဦးကပြောသည် ။
“တချို့ပန်းရံလုပ်တဲ့သူ နေ့စား တစ်နေ့ကို ၈ ထောင်ကျပ်ရတယ်။ အခုကုန်ပစ္စည်းတွေ အရမ်းဈေးတက်လာတော့ အဆင်မပြေတော့ဘူး ။လူတိုင်းတော့ ရှိတဲ့အလုပ်တွေ အကုန်လုပ်နေရတယ် ဈေးအရမ်းတက်တော့ တချို့ဆို အရင်ကတစ်နေ့ကို သုံးနပ်စားကြတယ်။ အခုဆို တစ်နေ့ကို နှစ်နပ်ဘဲစားတော့တယ်“ ဟု ပြောသည်။
ထို့အပြင် ယခင်က ဆန်တစ်ပြည်လျှင် (၁၆၀၀) ကျပ် ရှိခဲ့ပြီး၊ လက်ရှိမှာ ဆန်တစ်ပြည်လျှင် (၂၈၀၀) ကျပ် ဈေးတက်လာကြောင်း၊ ယခင်က စားသုံးဆီ တစ်ပိဿလျှင် (၂၈၀၀) ကျပ်နှင့် ဝယ်ယူရရှိပြီး လက်ရှိမှာ စားသုံးဆီကို တစ်ပိဿလျှင် (၄၈၀၀) ကျပ်ထိ ဈေးတက်လာသည်ဟု သိရသည်။
“အရမ်းမလိုအပ်တဲ့ ပစ္စည်းတွေ မဝယ်ပဲ အရေးကြီးတဲ့ ဆန်၊ဆီ ဆေးကိုပဲ အဓိက ထားပြီးသုံးတယ်။ကုန်ဈေးနှုန်း တက်လာလို့ အလုပ်နားရတာတွေရှိတယ် ၊ အလုပ်လက်မဲ့ များလာတော့လည်း လုယက်မှုတွေရှိလာတယ် ၊ဆိုင်ကယ် အများဆုံးပျောက်တယ် ကားပါ ပျောက်တဲ့သူလည်းရှိတယ်“ ဟု တောင်ကြီးဒေသခံအမျိုးသမီးတစ်ဦး ကပြောသည်။
ထိုကြောင့် ကုန်ပစ္စည်းမြင့်တက်လာသည်နှင့်အမျှ တောင်ကြီးမြို့ပေါ်တွင် လုယက်မှုများ ၊သူခိုး ဓားပြများ နေ့စဉ်နေ့တိုင်း ဖြစ်လာနေပြီဟု တောင်ကြီးဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည် ။
“ကျမ အိမ်အဝင်မီးကြိုးခိုးခံရတယ်။ ခုထိမတပ်ရသေးဘူး။ ခြံဝင်းထဲက မိုးကာတဲပါပျောက်တယ် ။လုယက်မှု ကတော့ နေ့တိုင်းလိုလို ဖြစ်နေတယ် ဆိုင်ကယ်တွေလည်း ခဏခဏပျောက် တောင်ကြီး တက္ကသိုလ် မှာလည်း ဆိုင်ကယ်ခဏခဏ ပျောက်တယ်။ တက္ကသိုလ်မှာအများဆုံးဖြစ်တယ်” ဟု ၎င်းက ပြောသည်။
သျှမ်းပြည်တဝှမ်းတွင် ခိုးမှု၊ လုယက်မှုများ နေ့စဉ်အမျှ ဖြစ်ပွားနေသဖြင့် သက်ဆိုင်ရာ မှ ဖမ်းဆီးအရေးယူ ပေးပြီး ပြည်သူများ၏ လုံခြုံရေးကိုလည်း ပိုပြီး အားဖြည့်လုပ်ဆောင်ပေးစေချင်ကြောင်း သျှမ်းပြည်သူများက ပြောသည်။
