သျှမ်းပြည်မြောက်ပိုင်း လားရှိုးမြို့ရှိ စစ်ကောင်စီ လက်အောက်ခံ ရဲ (၂) ဦး သေနတ် ပစ်သတ်ခံ ရကြောင်း စုံစမ်းသိရှိရသည်။
ဖြစ်စဥ်မှာ ယမန်နေ့ ဇွန် (၂၀) ရက် ည (၁၀)နာရီ အချိန်မှာ လားရှိုးမြို့ သိန္နီလမ်းမကြီး ရပ်ကွက် (၁၂) စစ်မှုထမ်းဟောင်းဘေးလမ်းကြားတွင် စစ်သားများ၊ရဲသားများ ရှာဖွေရေး လုပ်နေစဥ် ပစ်ခတ်သံများ ကြားရကြောင်း လားရှိုးဒေသခံ တစ်ဦး ကပြောသည်။
“ညတုန်းကစစ်သားတွေရဲတွေရှာဖွေရေးလာလုပ်တာ အဲ့လမ်းကြားက အိမ်တွေက တံခါးမဖွင့်ပေး လို့ဆိုပြီး လမ်းထိတ်မှာစစ်ကားကြီး ချထားပြီး အဲ့လမ်းကြားက အိမ်တွေတစ်ယောက်မှ အပြင် မထွက်ခိုင်းဘူး ပြီးတော့ ပစ်ခတ်သံ ကြားရတာပဲ” ဟု လားရှိုးမြို့ ဒေသခံ တစ်ဦး ကပြောသည်။
အဆိုပါ ပစ်ခတ်မှုသည် အချင်းချင်း ပစ်ခတ်မှုဖြစ်ကြောင်းလည်း နီးစပ်သူများက သုံးသပ်ကြသည်။
“တစ်ချို့ပြောတာတော့ သူတို့ အချင်းချင်း ပစ်ခတ်ကြတယ်လို့ပြောတယ်။ သေချာတော့ ကျနော်တို့လည်း မသိရဘူး။ သေချာတာကတော့ ရဲတပ်သား (၂) ဦး သေသွားတာပဲ သိရတယ်” ဟု အဆိုပါ ဒေသခံ အမျိုးသားက ထပ်လောင်းပြောသည်။
စစ်ကောင်စီ အာဏာသိမ်းပြီးနောက်ပိုင်း သျှမ်းပြည်တွင်းရှိ မြို့နယ်အသီးသီးမှာ စစ်ကောင်စီ လက်အောက်ခံ စစ်ကောင်စီများ ရဲတပ်သားများက ညအချိန်မှာ ကင်းလည်ပတ်ခြင်းများ ပြုလုပ်လေ့ရှိ ကြောင်းသိရသည်။
