သျှမ်းပြည်မြောက်ပိုင်း လားရှိုးမြို့နယ် စစ်ကောင်စီမှ ဖွင့်လှစ်သည့် စာသင်ကျောင်းများတွင် ပညာရေးဝန်ထမ်းများက အချိန်ပို ဟုခေါ်ဆိုကာ ကျောင်းသား/သူ များကို စာသင်ပေးပြီး တစ်ဦးလျှင် ငွေကျပ် ၂ သောင်းပေးဆောင်ရကြောင်း စုံစမ်းသိရှိရသည်။
အာဏာသိမ်းပြီးနောက်ပိုင်း စာသင်ကျောင်းများတွင် ကျောင်းဆရာ၊ဆရာမ များက အချိန်ပိုယူသင်ပေးကာ ပိုက်ဆံယူနေလျက်ရှိကြောင်း သိရသည်။ ထိုသို့ အချိန်ပိုကို အတန်းတိုင်းက တက်ရကြောင်းလည်း သိရသည်။
“ အတန်းတိုင်းက တက်ရတယ်။ ကျောင်းမှာ အချိန်ပိုဆိုပြီးတော့ သင်ပေးတာပေါ့။ ကျူရှင် ပုံစံလိုမျိုးသဘောပဲ။ သင်ပေးပြီးတော့ကျောင်းသား/ သူ တစ်ယောက်ကို ၂ သောင်းပေးရတယ်။ အတန်းတော့ ကွာမယ်ထင်တယ်။ အတန်းကြီးရင်တော့ ၂ သောင်းပေါ့။ ကျနော်အတိကျတော့ ၂ သောင်းပေးရတာပေါ့” ဟု လားရှိုးမြို့ ဒေသခံ အမျိုးသားတစ်ဦးက ပြောသည်။
အဆိုပါ ကျောင်းတွင် အချိန်ပိုသင်ကြားရခြင်းသည် ဆရာ/ဆရာမ များ၏ နေအိမ်တစ်ချို့က ကျဉ်းမြောင်းသောကြောင့် ကျောင်းတွင်အချိန်ပိုသင်ပေးပြီး ကျောင်းသားတိုင်းကို တက်ခိုင်းကြောင်း ဒေသခံများက ပြောသည်။
“ ဒီမှာစာလာသင်တဲ့ ကျောင်းဆရာ/ဆရာမတွေ တစ်ချို့နေအိမ်က ကျဉ်းတယ်လေ။ အဆောင်တွေ၊ အခန်းတွေနဲ့နေတဲ့ ဆရာမတွေလည်းရှိနေတယ်။ ဒါကြောင့် သူတို့က ကျောင်းမှာ အချိန်ပိုဖွင့်ပေးလိုက်ပြီးတော့ ပိုက်ဆံကောက်ယူတာပါ။ ကျောင်းသားအားလုံးကိုလည်း တက်ခိုင်းတာပေါ့” ဟု ဒေသခံ အမျိုးသားက ပြောသည်။
အဆိုပါ ကျောင်းဆရာ/ ဆရာမများသည် ယခုလိုမျိုး အချိန်ပိုသင်ကြားပေးပြီး ငွေတောင်းနေခြင်းသည် စေတနာအရင်းဖြင့် စာသင်ပေးနေသည် မဟုတ်ကြောင်း ကျောင်းသားမိဘများတစ်ချို့က သုံးသပ်ပြောဆိုသည်။
“ သူတို့ ဒီလိုကောက်နေတာက အာဏာသိမ်းပြီးကတည်းပဲ။ စာလည်းသူတို့ သေချာသင်ပေးတာမဟုတ်ဘူး။ ကျန်ရှိနေတဲ့ ကျောင်းဆရာမတွေကလည်း ကျောင်းသားအပေါ် စိတ်ရင်းစေတနာနဲ့သင်ပေးတာမျိုးမဟုတ်ဘူး။ အများစုက ငွေကြောင့်ပဲ လုပ်နေတာများတယ်” ဟု ဒေသခံ ကျောင်းသားမိဘက ပြောသည်။
စစ်ကောင်စီလက်အောက်ခံကျောင်းကို ယခုနှစ် ဇွန်လအတွင်း ပြန်ဖွင့်ပေးခဲ့ပြီး သျှမ်းပြည်အတွင်းရှိ မြို့နယ်တိုင်းနီးပါး ကျောင်းတက်သူများလည်း ပိုမိုများပြားလာကြောင်းသိရသည်။
အဆိုပါ ကျောင်းတွင် အချိန်ပိုယူပြီး ငွေတောင်းခြင်းသည် စစ်အစိုးရ ဗိုလ်ချုပ်ကြီး သန်းရွှေလက်ထက်က စတင်ရှိခဲ့ဖူးကြောင်းသိရသည်။
Leave a Comments