သျှမ်းပြည်မြောက်ပိုင်း သီပေါမြို့တွင် မာရှယ်လော ညမထွက်ရအမိန့်အချိန်အတွင်းနေအိမ်တစ်လုံး နှင့် ဖုန်းဆိုင် တစ်ဆိုင် ဖောက်ထွင်းခံရကြောင်း စုံစမ်းသိရှိရသည်။
ယမန်နေ့ (ဇွန် ၁၄ ရက်) ည ၁၁နာရီကျော် တွင် သီပေါမြို့ရှိ မြို့မစီးပွားရေးဘဏ် အဟောင်းအနီး တွင်ဖွင့်လှစ်ထားသည့် ဖုန်းဆိုင်တစ်ဆိုင် နှင့် တောင်ရပ်ကွက်တွင်ရှိသည့် အိမ်တစ်လုံ ဖောက်ထွင်းခံရကြောင်း သီပေါမြို့တွင် နေထိုင်သည့် အမျိုးသားတစ်ဦးက သျှမ်းသံတော်ဆင့်ကိုပြောသည်။
“ ဟုတ်တယ်။ မနေ့ညက တစ်ညတည်း ၂ အိမ်ဖောက်ခံရတာ။ တစ်ခု က ဖုန်းဆိုင်နဲ့ တစ်ခုက အိမ်တဲ့။ ဒါတောင် မာရှယ်လောထုတ်ထားတဲ့အချိန်မှာဖြစ်တယ်။ ညမထွက်ရတဲ့အချိန်မှာ ဖြစ်သွားတာ” ဟု သီပေါမြို့ ဒေသခံ အမျိုးသားတစ်ဦးက ပြောသည်။
အဆိုပါဖောက်ခံရမှုကြောင့် နေအိမ်တွင် ငွေ ၁ သိန်းပါသွားပြီး၊ ဖုန်းဆိုင်တွင် သိန်း (၂၀) နီးပါး အထိ ဆုံးရှုံးသွားကြောင်းသိရသည်။
“ နေအိမ်ကတော့ ကျနော်သေချာမသိဘူး။ ငွေ ၁ သိန်းလောက်ပါသွားတယ်လို့ပဲကြားတယ်။ ကျနော်ဆိုင်ကတော့ သိန်း (၂၀) နီးပါးလောက်ပါသွားတယ်။ ဖုန်းအလုံး (၆) လုံးနဲ့ နာရီတွေလည်း ပါသွားတယ်။ ကျနော်ဆိုင်ကတော့ ဖုန်းပြင်ဆိုင်ပါပဲ။ ဒါမဲ့ သူများဖုန်းလာပြင်ထားတာတွေ အများကြီးရှိထားတယ်” ဟု ဖုန်းဆိုင်ဖောက်ခံရသည့် ဆိုင်ရှင်က ပြောသည်။
အဆိုပါ ခိုးယူမှုများကြောင့် ဒေသခံ ပြည်သူများက အပြင်သွားလာရာတွင်လည်း ကြောက်နေရပြီး ညအချိန်ဘက်တွင်လည်း စိုးရိမ်စိတ်ဖြင့်အိပ်ရကြောင်းသိရသည်။
“ အပြင်သွားရတာလည်းသတိထားသွားလာရတယ်။ ပြီးတော့ ရွှေတွေလည်မဆွဲရဲတော့ဘူး။ အပြင်သွားရင်လည်း ၂ ယောက်တွဲသွားကြတာ။ ညအချိန်ဆိုရင်လည်း သတိထားပြီး အိပ်နေရတာ” ဟု ဒေသခံ အမျိုးသမီးက ပြောသည်။
သီပေါမြို့နယ်အတွင်း ဇွန် ၈ ရက်နေ့က စပြီး ညမထွက်ရ မာရှယ်လောကို ထုတ်ပြန်ကြေညာခဲ့သည်။
Leave a Comments