သျှမ်းပြည်တောင်ပိုင်း ဆီဆိုင်မြို့နယ် ဆိုက်ခေါင်စံပြကျေးရွာအတွင်း လူငယ်အချင်းချင်း ရန်ဖြစ်ရာမှ ပအိုဝ်းပြည်သူ့စစ် (PNO) တပ်ဖွဲ့မှ သေနတ်ဖောက်ကာ အမျိုးသမီးတစ်ဦး ကျည်ထိမှန်ပြီး ခဲ့ကြောင်း စုံစမ်းသိရှိရသည်။
ဆိုက်ခေါင်စံပြကျေးရွာမှာ ဇွန် ၁၄ ရက် ညနေ ၆ နာရီဝန်းကျင်တွင် လူငယ်များ သောက်စားပျော်ပါးပြီး အချင်းချင်း စကားများရန်ဖြစ်ရာမှ PNO က ဝင်တားကာ လူငယ်တစ်ယောက်ကိုချိန်ပြီး သေနတ်ဖောက်သဖြင့် ကျည်သည် လွှဲချော်သွားပြီး အမျိုးသမီးတစ်ဦးကို ထိမှန်သွားကာ လက်ရှိမှာ တောင်ကြီးမြို့ရှိ စဝ်စံထွန်းဆေးရုံသို့ ပို့ဆောင်နေကြောင်း ဆိုက်ခေါင်ဒေသခံ တစ်ဦးက သျှမ်းသံတော်ဆင့် ကို ပြောသည် ။
“ လူငယ်တွေ သောက်စားပျော်ပါးပြီး အချင်းချင်း စကားများရန်ဖြစ်တာကို PNO တပ်သားက ဝင်တားတယ်။ အဲ့မှာ ရန်ဖြစ်တဲ့ထဲက တယောက်က ပြန်ဆဲလို့ PNO တပ်သားက စိတ်တိုပြီး ရန်ဖြစ်တဲ့ ကောင်ကို ပစ်တာ၊ မိန်းကလေးကို ထိမိသွားတာ“ဟု ၎င်းက ပြောသည်။
အဆိုပါ ကျည်ထိမှန်သည့် အမျိုးသမီးငယ်သည် ဆိုက်ခေါင်စံပြကျေးရွာ သီရိရပ်ကွက်တွင် နေထိုင်ပြီး လက်ရှိတွင် ထိုအမျိုးသမီးကို တောင်ကြီး စဝ်စံထွန်းဆေးရုံသို့ ပို့ဆောင်ထားကြောင်း ၎င်းက ထပ်လောင်း ပြောသည်။
အဆိုပါ အမျိုးသမီး ကျည်ထိမှန်ခဲ့သည့်အပေါ် ဆိုက်ခေါင်စံပြကျေးရွာ မှ လူငယ်များကလည်း စိတ်မကောင်းကြောင်း၊ PNO တပ်ဖွဲ့အနေဖြင့် အရပ်သားလူငယ်များကို လက်နက်သုံးပြီး ပစ်ခတ်မှုမျိုး မလုပ်သင့်ကြောင်းလည်း ပြောဆိုလိုက်သည်။
“ မဆိုင်တဲ့ မိန်းခလေးအတွက်တော့ စိတ်မကောင်းဘူး၊ လက်နက်ကို အသုံးပြုတာဟာ လုံးဝကြီးလေးတဲ့ အပြစ် ပေးသင့်တယ်၊ပိုက်ဆံတစ်အိမ်ကို ၃သောင်းကောက်ပြီး အပြစ်မဲ့တဲ့ ပြည်သူကို ပစ်တာစိတ်နာစရာဖြစ်တယ် “ဟု ဆိုက်ခေါင်လူငယ်များက ပြောသည် ။
လက်ရှိ အချိန်ထိ သေနတ်ပစ်ဖောက်သည့် PNO တပ်သားကို သက်ဆိုင်ရာဌာနမှ တာဝန်ယူဖြေရှင်းပေးမှု မရှိသေးကြောင်း သိရသည်။
စစ်ကောင်စီ လက်အောက်ခံ ပအိုဝ်းအမျိုးသားအဖွဲ့ချုပ် (PNO/PNA) သည် ဆီဆိုင်မြို့နယ်၊ ပင်လောင်းမြို့နယ် နှင့် ဟိုပုံးမြို့နယ်အထိ တစ်အိမ်ကို ငွေ ၃ သောင်း နှင့် ဆန် ၃ ပြည်တောင်းသည့် အပြင် စစ်သားများကို ကောက်ယူနေလျက်ရှိကြောင်း သိရသည်။
