သျှမ်းပြည်မြောက်ပိုင်း လားရှိုးမြို့တွင် ယခုရက်ပိုင်း ယာဥ်များ စည်းကမ်းမဲ့ မောင်းမှုကြောင့် အသက်မပြည့်သေးသည့် လူငယ်များ အသက်ဆုံးရှုံးနေရကြောင်း စုံစမ်းသိရှိရသည် ။
လားရှိုးမြို့တွင် နှစ်ပတ်အတွင်း ယာဉ်တိုက်မှု ၁၂ ကြိမ်ခန့်ဖြစ်ပွားပြီး အသက်မပြည့်သည့် လူငယ် နှစ်ဦး နှင့် အသက် ၃၀ နှစ်အောက် အမျိုးသားတစ်ဦး သေဆုံးခဲ့ကြောင်း လားရှိုးပရဟိတ ကိုမြင့်ဇော်မောင်က သျှမ်းသံတော်ဆင့်ကို ပြောပါသည်။
“ယာဉ်တိုက်မှုမှာ အမျိုးသမီးတွေကတော့ရှားတယ်။ အမျိုးသားကတော့ အသက်မပြည့်သေးတဲ့ အသက် ၁၆ နှစ် ၁၇နှစ် နှစ်ဦး၊ ပြီးတော့ အသက် ၃၀ အောက်ကတစ်ဦး ယာဉ်တိုက်မှုတွေ ဖြစ်ပွားခဲ့ပြီး အသက်ဆုံးရှုံးခဲ့ရတယ်” ဟု လားရှိုးပရဟိတ ကိုမြင့်ဇော်မောင်က ပြောသည်။
ယခုခေတ်လူငယ်များသည် ဆိုင်ကယ်ကို ကြမ်းတမ်းမောင်းနှင်ခြင်း ၊ယာဉ်စည်းကမ်း သိရှိမှု အားနည်းခြင်း မိဘများမှ အသက်မပြည့်သည့် လူငယ်များကို မောင်းနှင်ခွင့် မပေးသင့်ကြောင်း ၎င်းက ဆက်ပြောသည်။
“မိဘတွေကို မှတ်ချက်ပြုချင်တာက အသက်မပြည့်တဲ့ သားသမီးတွေကို ဆိုင်ကယ်ပေးမမောင်းဖို့အတွက်၊
အသက်မပြည့်သေးတဲ့အတွက် ဒီကလေးတွေရဲ့ စဥ်းစားဆင်ခြင်နိုင်တဲ့ ဦးနှောက် မမှီသေးတဲ့ အတွက် ခနက ပြောသလို ယာဉ်မောင်းခြင်းတွေ မပေးသင့်ဘူး”ဟု ပရဟိတသမား ကိုမြင့်ဇော်မောင်က ဆိုသည်။
ထို့အပြင် သျှမ်းပြည်တောင်ပိုင်းတွင်လည်း နှစ်ပတ်အတွင်း ၃ ဦးသေဆုံးမှု အပါအဝင် အသက် ၁၈ နှစ် အမျိုးသမီးတစ်ဦးလည်း ယာဉ်တိုက်မှု မတော်တဆဖြစ်ပွားပြီး အသက်ဆုံးရှုံးခဲ့ကြောင်း သိရသည် ။
သျှမ်းပြည်တောင်ပိုင်း ဟိုပုံးမြို့နှင့် ပင်လုံမြို့တွင် နှစ်ပတ်အတွင်း ယာဉ်တိုက်မှု ဖြစ်ပွားခဲ့ပြီး ၃ဦး သေဆုံး ခဲ့သည်။ အဆိုပါ သေဆုံးသွားသည့် ၃ ဦးမှာ အမျိုးသား ၂ ဦးနှင့် အသက် ၁၈ နှစ်ရှိအမျိုးသမီးတစ်ဦးဖြစ်ကြောင်း သိရှိရသည်။
“ကျမ တောင်ကြီးကအပြန် ဟိုပုံးအကွေ့ ရေအိုင်နားမှာလည်း မတော်တဆ ယာဉ်တိုက်တာ အမျိုးသားတစ်ဦး ဆုံးသွားတယ်။ ပင်လုံမှာလည်း မတော်တဆယာဉ်တိုက်မှုဖြစ်တော့ အမျိုးသားတစ်ဦး နဲ့ အသက် ၁၈ နှစ်အရွယ် အမျိုးသမီး တစ်ဦး အသက်ဆုံးရှုံးရတယ်“ ဟု ပင်လုံဒေသခံ နန်းအွမ်က ပြောသည်။
ယာဉ်မောင်းသည့်အခါတွင် စည်းစနစ်မောင်းနှင်ရန် နှင့် လျှင်မြန်စွာ မမောင်းရန်လိုအပ်ကြောင်း၊ ဖြစ်လာပါက မိမိနှင့် မိမိတို့ မိသားစုသာ ခံစားရမည်ဖြစ်ကြောင်း နန်းအွမ်က ပြောသည်။
ထို့အတူ သက်ဆိုင်ရာ ယာဉ်ထိန်း၊ ယာဉ်စည်းကမ်း ကျွမ်းကျင်သူတို့ အားလုံးပူပေါင်းပြီး အသိပညာပေး တို့ကို သက်ဆိုင်ရာ မိဘအုပ်ထိန်းသူ နှင့် လူငယ်များကို အသိပညာပေးပြီးမှသာလျှင် အကောင်းဆုံးလမ်းဟု လားရှိုး ပရဟိတ ဦးကိုနိုင်က ပြောသည် ။
“ဆိုင်ကယ်ဆိုတာ အပေါဆုံး ပစ္စည်းဖြစ်တယ် ။ သက်ဆိုင်ရာ ကျောင်းရယ်၊ မိဘရယ် ၊သက်ဆိုင်ရာ ယာဉ်ထိန်းတို့ ရဲတို့ အဲ့ဒါကို အားလုံးပူးပေါင်းပြီးတော့မှ အသိပညာပေး ဆောင်ရွက်မှ သာတတ်နိုင်မယ်” ဟု ပြောသည်။
အသက်မပြည့်သေးသည့် လူငယ်များကို ယာဉ်စည်းကမ်း ၊လမ်းစည်းကမ်း သိရှိစေရန်အတွက် မိဘထံနှင့် လူငယ်များကို အသိပညာပေးခြင်းများ ပြန်လည်ပြုလုပ်ပေးရန် ၊အသက် ငယ်သေးသည့် လူငယ်များကို ဆိုင်ကယ်စီးခွင့် မပေးရန်အတွက် လူငယ်များလည်း အသက်ဆုံးရှုံးမှု လျော့နည်းသွားမည်ဟု ဒေသခံများက တိုက်တွန်းထားသည်။
