စစ်ကောင်စီမှ နိုင်ငံတော် အာဏာသိမ်းယူခဲ့သည့် တစ်နှစ်ကျော် ကာလအတွင်းတွင် လုံခြုံရေးတာဝန် ယူထားသည့် ရဲတပ်ဖွဲ့ဝင်များအစား ပြည်သူများက သူခိုးကို နှိမ်နင်းနေရကြောင်း သတင်းသိရသည်။
ပြီးခဲ့သည့် ဇွန်လ ၇ ရက်နေ့တွင် သျှမ်းပြည်တောင်ပိုင်း ညောင်ရွှေမြို့မှ မီးကြိုး နှင့် သံတုံးများ၊ သံဇကာများကို လိုက်ခိုးသည့် သူခိုးအဖွဲ့ကို ပြည်သူများက ဝိုင်းဝန်းဖမ်းဆီးမိသည့် ဖြစ်စဥ်များ ဖြစ်ပွားခဲ့ကြောင်း ဒေသခံများထံမှ သိရသည်။
အဆိုပါ ခိုးသူများသည် မကြာခဏခိုးယူနေသူများ ဖြစ်ကြပြီး ရပ်ကျေးတာဝန်ရှိသူများနှင့် သက်ဆိုင်ရာရဲစခန်းများ ကို တိုင်တန်းပြောဆိုသော်လည်း အရေးယူပေးခြင်းမရှိသည့်အတွက် ပြည်သူများကိုယ်တိုင် စောင့်ဖမ်းခြင်း ဖြစ် ကြောင်း ရပ်ကွက်နေ ပြည်သူအမျိုးသားတစ်ဦးက သျှမ်းသံတော်ဆင့်ကို ပြောသည်။
“လမ်းဘေးဓါတ်တိုင်ကနေ အိမ်ထဲကို သွယ်လာတဲ့ မီးကြိုးတွေကို လိုက်ခိုးတဲ့သူတွေပါ ၊ မကြာခဏတွေ့ နေရ တယ်၊ ရဲစခန်းကို သွားတိုင်ပေမယ့် ဘယ်သူမှ လာမလုပ်ပေးတော့ ကျနော်တို့ရပ်ကွက်သားတွေ စုပြီးဖမ်းလိုက် တာ၊ ကျနော်တို့ဖမ်းပြီးမှ အုပ်မှူးက ရဲနဲ့ရောက်လာပြီး အဲ့သူတွေကို ခေါ်သွားတယ်” ဟု ညောင်ရွှေမြို့ ရပ်ကွက်နေ ပြည်သူအမျိုးသားတစ်ဦးက သျှမ်းသံတော်ဆင့်ကို ပြောသည်။
ထို ခိုးသူ အဖွဲ့သည် အမျိုးသား သက်လတ်ပိုင်းအရွယ် အမျိုးသား ၂ ယောက်ဖြစ်ကြပြီး ဘုန်းကြီးကျောင်း အပါအဝင် ပြည်သူ့နေအိမ် စုစုပေါင်း ၁၁ အိမ်မှ မီးကြိုးများ ခိုးယူခံရခြင်းဖြစ်ကြောင်းနှင့် ၎င်းတို့ အိမ်ဝန်း တစ်ခုအတွင်း မီးကြိုးဖြတ်ယူနေစဥ် ရပ်ကွက်နေပြည်သူများက ဝိုင်းဝန်းဖမ်းဆီးခဲ့ခြင်းဖြစ်ကြောင်း သိရသည်။
အလားတူ ဇွန်လ ၇ ရက်တွင်လည်း အောင်ပန်းမြို့မှ ရပ်ကွက်နေ ပြည်သူများကို ဒုက္ခအမျိုးမျိုးပေး နေသည့် သူခိုး နှစ်ဦးကို ရပ်ကွက်နေပြည်သူများက ဝိုင်းဝန်းဖမ်းဆီးရမိခဲ့ကြောင်း သတင်းသိရသည်။
“ဒီအောင်ပန်းမှာ လျှပ်စစ်မီးကြိုးတွေ၊ သံဇကာတွေ လိုက်ခိုးနေတဲ့အဖွဲ့က ဂိုဏ်းလိုလိုဖြစ်နေပြီ၊ အောက်ဈေးနား မှာ သူတို့ကို ဖမ်းမိတာပါ၊ အောက်ပြည်ဘက်ကလာတဲ့ အလုပ်သမားတွေအများစုနေတဲ့ ရပ်ကွက်ဘက်မှာ နေတဲ့သူတွေ ဖြစ်တယ်” ဟု အောင်ပန်းမြို့နေ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့အပြင် ယနေ့ ဇွန်လ ၉ ရက်နေ့ နံနက်ပိုင်းအချိန် တောင်ကြီးမြို့ ဘုရားဖြူရပ်ကွက်၊ နယ်မြေ (၄) (လွယ်ခမ်း) စာသင်ကျောင်းအနီးရှိ နေအိမ်နောက်ဘက်တံခါးအား ဖျက်ဝင်ပြီးနောက် အိမ်တွင်းရှိ ငွေကျပ်များအား ခိုးယူနေသည့် သူခိုးကို ဒေသခံ ပြည်သူများက ဝိုင်းဝန်း ဖမ်းဆီးရမိခဲ့ကြောင်း သိရသည်။
နေအိမ်ဖောက်ထွင်း ခိုးယူသူမှာ တောင်ကြီးမြို့၊ ညောင်ဖြူစခန်းရပ်ကွက်နေသူ ဖြစ်ကာ ၎င်းနှင့်အတူ စိတ်ကြွရူးသွပ်ဆေးပြား ၃ ပြားကိုလည်း တွေ့ရှိခဲ့ကြောင်း နှင့် လက်ရှိတွင် ရဲစခန်းသို့ အပ်နှံလိုက်ကြောင်းလည်း သိရသည်။
စစ်တပ်မှ နိုင်ငံတော်အာဏာသိမ်းပြီးနောက်ပိုင်း သျှမ်းပြည်တောင်ပိုင်း အပါအဝင် နိုင်ငံတဝန်းလုံး၌ ခိုးဆိုးလု နှိုက်မှုများ ပေါ်ပေါ်ထင်ထင် ဖြစ်ပွားလာနေသော်လည်း ဖမ်းဆီးအရေးယူခြင်းမရှိသည့်အတွက် ပြည်သူများက ကိုယ့်အားကိုယ်ကိုးကာ သူခိုးရန်ကို နှိမ်နှင်းနေရကြောင်း သတင်းသိရသည်။
