သျှမ်းပြည်မြောက်ပိုင်း ကျောက်မဲ – လားရှိုး လမ်းကြားတွင် စစ်ကောင်စီတပ်သား နှင့် ရဲ တို့သည် ခရီးသည်များ နှင့် ကားသမားများကို တင်းကြပ်စွာ စစ်ဆေးပြီး ပိုက်ဆံ ကောက်ယူနေကြောင်း သတင်း ရရှိသည်။

ပြီးခဲ့သည့် ဇွန် ၅ ရက်နေ့က လားရှိုး – ကျောက်မဲ အသွားလမ်းတွင် စစ်ကောင်စီ နှင့် ရဲ တပ်ဖွဲ့တို့က မှတ်ပုံတင် နှင့် လိုင်စင်များကို စစ်ဆေးနေပြီး ငွေတောင်းယူခြင်း၊ ဆဲဆိုမှုများလည်း ရှိကြောင်း ကြုံတွေ့ရသူများက ပြောသည်။

“ အဲ့နေ့က ကျောက်မဲလမ်းခွဲ မှာ စစ်သားနဲ့ ရဲတွေ စစ်ဆေးနေတယ်။ ကျန်းမာရေးကဒ် နဲ့ မှတ်ပုံတင် ကို စစ်ဆေးနေတာ။ ကားသမားတွေကို လိုင်စင် စစ်ဆေးပြီး ကားငယ်ဆိုရင် သူတို့ ပိုက်ဆံ ၁ သောင်းခွဲ ပေးခိုင်းတယ်” ဟု ကိုယ်တိုင်ကြုံတွေ့ခဲ့ရသည့် ခရီးသည် တစ်ဦးက ပြောသည်။

အဆိုပါ စစ်ဆေးရာတွင်လည်း စစ်သားများက ဆဲဆိုပြီး ပိုက်ဆံကို အတင်းအဓမ္မတောင်းယူနေကြောင်း သိရသည်။

“ စစ်ဆေးတာကလည်း ကောင်းကောင်းမစစ်ဘူး။ အဆဲပါတယ်။ ရိုင်းစိုင်းတဲ့ စကားတွေဆဲပြီး စစ်ဆေးနေတာ။။ ပိုက်ဆံလည်း အတင်းတောင်းတာ။ ခရီးသည်စစ်ဆေးခံရတဲ့သူက ကျနော်ပါ” ဟု ၎င်းက ဆိုသည်။

ယခင်က စစ်တပ်အာဏာမသိမ်းခင်ကာလတွင် ခရီးသွားလာရာမှာ လွယ်ကူပြီး စိုးရိမ်စိတ်မရှိပဲ သွားလာလို့ရကြောင်း၊ လက်ရှိတွင် တိုင်းရင်းသား လက်နက်ကိုင်၊ စစ်ကောင်စီ နှင့် လက်နက်ကိုင် အတုယောင်ဆောင်များကိုလည်း ကြောက်နေရကြောင်း မူဆယ်မြို့ ဒေသခံ အမျိုးသားတစ်ဦးက ပြောသည်။

“အရင်တုန်းက ဒီအာဏာမသိမ်းခင်ဆိုရင် ခရီးသွားလာရတာလွယ်ကူတယ်။ ဘာမှ မကြောက်ရဘူးပေါ့။ နားစရာလည်းမလိုဘူး။ ပြီးတော့ အခုက စစ်တပ်က အာဏာသိမ်းလိုက်တော့ ဟိုက်ဝေးလမ်းမကြီး‌ ပေါ်တွေမှာဆိုရင် လက်နက်ကိုင်တွေနဲ့ စစ်ဆေးနေတာလည်းများတယ်။ တစ်ချို့က အရပ်ဝတ်တွေနဲ့ စစ်ဆေးနေတာတွေလည်းရှိတယ်။ အဲ့လိုအရပ်ဝတ်တွေနဲ့ စစ်ဆေးနေတာက လက်နက်ကိုင် အတုတွေလည်းရှိတယ်။ သွားလာရတာ အခုကတော့ ကြောက်ရတာပေါ့” ဟု မူဆယ်မြို့ ဒေသခံ အမျိုးသား တစ်ဦးကပြောသည်။

စစ်တပ်က အာဏာသိမ်းပြီးနောက်ပိုင်း သျှမ်းပြည်အတွင်း လမ်းခရီးများတွင် စစ်ကောင်စီက မှတ်ပုံတင်စစ်ဆေးပြီး ငွေတောင်းယူနေလျက်ရှိကြောင်း သိရသည်။

ထို့အပြင် စစ်ကောင်စီက စစ်ဆေးမှုများရှိသည့်အပြင် ဖမ်းဆီးမှုများလည်းရှိကြောင်း သိရသည်။