အဝေးပြေးလိုင်းကားခများ ဈေးတက် လိုင်းကားပုံမှန်ပြေးဆွဲမှုမရှိ

0

မြန်မာပြည်တဝှမ်း စက်သုံးဆီဈေးတက်လာသည့်နောက်ပိုင်း တောင်ကြီးမြို့မှ တခြားမြို့သို့ ပြေးဆွဲနေသည့် အဝေးပြေးကားများသည် ကားခ ဈေးနှုန်းတက်လာသဖြင့် လိုင်းကား ပုံမှန်ပြေးဆွဲမှုမရှိတော့ကြောင်း သတင်းရရှိသည်။

သျှမ်းပြည်တောင်ပိုင်း တောင်ကြီးမြို့ အရှေ့မြို့ပတ်လမ်း၊ ကန်ရှေ့ရပ် ၊ ရွှေရုပ်လေးကားဂိတ်တွင် တောင်ကြီးကနေ ရန်ကုန်ထိ တစ်ယောက်ကိုကားခ ၂၅၀၀၀ ကျပ် ပေးရပြီး တစ်ရက်ကိုခရီးသည် ၁၀ ဦးခန့် ရှိသည်ဟု ဂိတ်တာဝန်ခံ အမျိုးသမီးတစ်ဦးက သျှမ်းသံတော်ဆင့် ကိုပြောသည်။

“ ဆီဈေးတက်လာပြီးနောက်ပိုင်း လိုင်းကားတွေတော့ အရင်ထက်တော့ မပြေးဆွဲဘူး ၊ကားခတွေက ပုံမှန်မဟုတ်တော့ တစ်ယောက်ကို ၂သောင်းခွဲ တော့ပေးရတယ်၊ အခုနောက်ပိုင်းလည်း တစ်နေ့ကို နှစ်စီးဘဲထွက်တယ်“ ဟု ၎င်းက ပြောသည်။

ထို့အပြင် တောင်ကြီး မှ တာချီလိတ်သို့ လိုင်းကားများသည် ယခုနောက်ပိုင်း ပုံမှန်မရှိသည့် အပြင် တစ်နေ့ကို ကား ၂ စီး တာပြေးဆွဲ နေရကြောင်း ကားခများလည်း ပုံမှန်မရှိသဖြင့် တစ်ဦးလျှင် ၃ သောင်းခွဲအထက် ရှိသည်ဟု တာချီလိတ် လိုင်းကားမောင်းသူ အသက် ၃၀ ကျော် အမျိုးသားတစ်ဦးက ပြောသည်။

“ ကားတွေတော့ ပုံမှန်မရှိဘူး။ ကားခတွေလည်း ပုံမှန်လည်းမရှိတော့ဘူး။ အရင်ကတော့ ဈေးနည်းတယ်၊ အခုနောက်ပိုင်း ဆီဈေးလည်းတက်တော့ တစ်ယောက်ကို ၃သောင်း တစ်ခါတစ်လေ ၄ သောင်း ယူရတယ်” ဟု အထက်ပါ အမျိုးသား ကပြောသည်။

ထို့အပြင် စစ်အာဏာသိမ်းပြီးနောက်ပိုင်း မြို့အဝင်ဂိတ်မှာ စစ်ကောင်စီတပ်များ ပိုက်ဆံကောက်ခံနေကြောင်း ဂိတ်တိုင်းတွင် ပေးဆောင်နေရသည်ဟု ၎င်းက ဆက်ပြောသည် ။

“လမ်းမှာ စစ်တပ်က ပိုက်ဆံတွေ ကောက်တာတော့ရှိတယ်။ ကြုံရင် ကြုံသလိုတော့ အဆင်ပြေသလို ပေးလိုက်ရတယ်၊ အခေါက်တိုင်း ကောက်တယ်၊ ၂ ထောင်ပေးရင် ၃ထောင် တောင်းတယ် ၃ ထောင်ပေးရင်လည်း ၄ ထောင်လောက်တောင်းနေတယ်”ဟု ၎င်းကထပ်လောင်းပြောသည် ။

ယနေ့ ဇွန် ၈ ရက် သျှမ်းပြည်တောင်ပိုင်း တောင်ကြီးမြို့ ရှိ ဓာတ်ဆီဆိုင်များမှာ ဓာတ်ဆီ (92 ) တစ်လီတာ ၂၂၈၅ ကျပ်၊ (95) တစ်လီတာ ၂၃၈၀ ကျပ် ၊ ဒီဇယ်ကို တစ်လီတာ ၂၆၅၅ ကျပ် ဈေးတက်လာသည်ဟု သိရသည်။

စစ်ကောင်စီက အာဏာသိမ်းပြီးနောက်ပိုင်း တစ်နှစ်အကြာတွင် မြန်မာနိုင်ငံအတွင်းရှိ ကုန်ပစ္စည်းအားလုံး ဈေးမြင့်တက်လာသည့်အတူ ဓာတ်ဆီစျေးလည်း အဆမတန်မြင့်တက်လာပြီး တောင်ကြီး နှင့် သျှမ်းမြောက်ရှိ လာရှိုးမြို့တွင်လည်း ဓာတ်ဆီဆိုင် တချို့ပိတ်လိုက်ကြောင်း သိရသည်။

Leave a Comments