သျှမ်းပြည်မြောက်ပိုင်း နမ့်ခမ်းမြို့အတွင်းရှိ စာသင်ကျောင်းများ အားလုံးကို စစ်ကောင်စီလက်အောက်ခံ စစ်သား၊ ရဲ နှင့် ပြည်သူ့စစ် တို့က လုံခြုံရေးအပြည့် ယူထားကြောင်း စုံစမ်းသိရှိရသည်။
ယမန်နေ့ ဇွန် ၆ ရက်က တအာင်းအမျိုးသားလွတ်မြောက်ရေးတပ်မတော် (TNLA) ဈေးထဲဝင်ရောက်လာသည့် သတင်းထွက်ပေါ်လာပြီးနောက် ယနေ့ ဇွန် (၇) ရက်နေ့တွင် စစ်ကောင်စီတပ်၊ ရဲ နှင့် ပြည်သူ့စစ်များက စာသင်ကျောင်း နှင့် ဈေးထဲတွင် လုံခြုံရေးယူထားကြောင်း သိရသည်။
“ ကျောင်းတိုင်းမှာ လုံခြုံရေးတွေ အပြည့်စောင့်ကြည့်နေကြတာ။ စောင့်နေတာတော့ စစ်သားတွေ၊ ရဲတွေ နဲ့ ပြည်သူ့စစ်တွေ စောင့်နေတာ။ စာသင်ကျောင်းတိုင်း အားလုံးရဲ့ အဝင်ဝမှာစောင့်နေကြတာ။ ကျောင်းတော့ မပိတ်ဘူး။ ဖွင့်နေသေးတယ်” ဟု နမ့်ခမ်းမြို့ ဒေသခံ အမျိုးသား တစ်ဦးက ပြောသည်။
အလားတူ ယမန်နေ့က သတင်းထွက်ပေါ်မှုကြောင့် ယနေ့ ဇွန် (၇) ရက် နမ့်ခမ်းမြို့မဈေးထဲတွင် သွားလာသူ နည်းပါးလာကြောင်း သိရသည်။
“ ဒီနေ့တော့ ဈေး ပြန်ဖွင့်ကြတယ်။ ဒါမဲ့ ဈေးသွားတဲ့သူမရှိဘူး။ အရမ်းနည်းတယ်။ ဈေးသွားတဲ့သူ မရှိသလောက်ပါပဲ။ ဒီနေ့ကျတော့ ကျောင်းတွေမှာ လုံခြုံရေး ပိုတင်းကြပ်တာပေါ့” ဟု အထက်ပါ ဒေသခံ အမျိုးသားက ပြောသည်။
နမ့်ခမ်းမြို့သည် တအာင်းလွတ်မြောက်ရေးတပ်မတော်TNLA ၊ ကချင်တပ်မတော် KIA နှင့် သျှမ်းပြည်တိုးတက်ရေးပါတီ၊ သျှမ်းပြည်တပ်မတော် SSPP/SSA တို့အပြင် စစ်ကောင်စီတပ်သားတို့ မြို့ပတ်လည်ရှိတောင်တန်းများနှင့် နမ့်မောဝ် (ရွှေလီမြစ်) တစ်လျှောက် သွားလာလှုပ်ရှားနေကြကြောင်းသိရသည်။
Leave a Comments