သျှမ်းပြည်မြောက်ပိုင်း မူဆယ်မြို့နယ် နမ့်ခမ်းမြို့ရှိ မြို့မဈေးမှ ဈေးသည်များ ထိတ်လန့်တုန်လှုပ်နေကြပြီး ဆိုင်ခန်း ပိတ်သိမ်းမှုများ ပြုလုပ်နေကြကြောင်း သတင်းသိရသည်။
ယနေ့ ဇွန်လ ၆ ရက်နေ့ တွင် နမ့်ခမ်းမြို့အတွင်းသို့ တအာင်း (ပလောင် ) အမျိုးသား တပ်မတော် TNLA စစ်သားများ မြို့ထဲဝင်လာသည့် သတင်းများကြောင့် ဈေးသည်များ ထိတ်လန့်ကာ ဆိုင်ခန်းများကို ပိတ်သိမ်းလိုက်ခြင်း ဖြစ်ကြောင်း ဒေသခံ အမျိုးသားလူငယ်တစ်ဦးက သျှမ်းသံတော်ဆင့်ကို ပြောသည်။
“မြို့နားက တောင်ပေါ်တွေမှာ စခန်းချနေရာယူထားတဲ့ ပလောင်စစ်သား TNLA တွေက မြို့ထဲ ဝင်လာတယ်ဆိုတဲ့ သတင်းတွေကြောင့် ဈေးသည်တွေက ထိတ်လန့်ပြီး ဆိုင်ခန်းတွေကို ပိတ်သိမ်းကြတာပါ။ ပြီးတော့ တောင်ပေါ် က ပလောင်တွေကို ဒီရက်ပိုင်းအတွင်း ရိက္ခာတွေ ဝယ်စုထားဖို့နဲ့ တောင်အောက်မဆင်းကြဖို့ သတိပေး တာတွေ ရှိတယ် ဆိုတဲ့ သတင်းထွက်ပေါ်လာပါတယ်” ဟု အထက်ပါ ဒေသခံတစ်ဦးက သျှမ်းသံတော်ဆင့်ကို ပြောသည်။
ထို့အပြင် စစ်ကောင်စီ ဖွင့်လှစ်နေသည့် နမ့်ခမ်းမြို့နယ်အတွင်းမှ စာသင်ကျောင်းများမှာလည်း ပုံမှန်အခြေအနေ များထက် ပိုသည့် လုံခြုံရေးတပ်သားများက ချထားသဖြင့် ပြည်သူများက စိုးရိမ်ထိတ်လန့်နေကြ ကြောင်းလည်း သိရသည်။
“ဖွင့်ထားတဲ့ စာသင်ကျောင်းတွေမှာ လုံခြုံရေးအင်အားတွေ ပိုပြီး ချထားနေတယ်၊ အထက ၁ မှာဆို နေ့လည်စာထမင်းစားဆင်းပြီး ကျောင်းပြန်တက်တဲ့အချိန်ကစ စစ်သားတွေက ဂိတ်ပေါက်ဝမှာ ထပ်လာစောင့်တယ်၊ ကျောင်းသားတွေကိုလည်း အပြင်ပေးမထွက်တော့ဘူး၊ တံခါးကြီးကို သော့နဲ့ပိတ်ထားလိုက်တာ” ဟု ပြည်သူတစ်ဦးက သျှမ်းသံတော်ဆင့်ကို ပြောသည်။
လက်ရှိ နမ့်ခမ်းမြို့နယ်အတွင်းတွင် TNLA ၊ ကချင်တပ်မတော် KIA နှင့် သျှမ်းပြည်တပ်မတော် SSPP/SSA တို့အပြင် စစ်ကောင်စီတပ်သားတို့လည်း မြို့ပတ်လည်ရှိတောင်တန်းများနှင့် နမ့်မောဝ် (ရွှေလီမြစ်) တစ်လျှောက် သွားလာလှုပ်ရှားနေကြကြောင်းသိရသည်။
Leave a Comments