သျှမ်းပြည်အရှေ့ပိုင်း အထူးဒေသ (၄) မှ ဒုတိယ ဥက္ကဌ ဦးဆောင်သည့် အဖွဲ့သားများသည် အာဏာသိမ်း စစ်ကောင်စီနှင့် တွေ့ဆုံဆွေးနွေးရန်အတွက် ကျိုင်းတုံလေဆိပ်မှ ခရီးစဥ်ထွက်ခွာသွားကြောင်း သတင်းသိရသည်။

ယနေ့ ဇွန် ၃ ရက်နေ့ မွန်းလွဲ ၁ နာရီခွဲဝန်းကျင်တွင် သျှမ်းပြည် အရှေ့ပိုင်း အထူးဒေသ (၄) မှ ငြိမ်းချမ်းရေးနှင့် စည်းလုံးရေး ကော်မတီ ဒုတိယ ဥက္ကဌ ဦးစန်ပေ့ ၊ ဦးကြည်မြင့် ( အထွေထွေအတွင်းရေးမှူး)၊ ဦးအားလူ (အတွင်းရေးမှူး ၂) နှင့် ဦးစိုင်းမောက် တို့ပါဝင်သည့် ကိုယ်စားလှယ်အဖွဲ့များသည် ကျိုင်းတုံလေဆိပ်မှ နေပြည်တော်သို့ စတင်ထွက်ခွာသွားကြောင်း သိရသည်။

“၂ နာရီခွဲလောက်မှာ ကျိုင်းတုံလေဆိပ်ကို ရောက်လာကြပြီး တြိဂံတိုင်းမှူးလည်း လာနှုတ်ဆက်တာတွေ့ရတယ်၊ ပြည်နယ်/ခရိုင်က ထွေအုပ်နဲ့ တိုင်းရင်းသား မိဘပြည်သူတွေက လေဆိပ်မှာ ရိုးရာဝတ်စုံတွေနဲ့ ကြိုဆိုပို့ဆောင်ခဲ့ ပါတယ်” ဟု ဖြစ်စဥ်များကို သိရသည့် ဒေသခံတစ်ဦးက သျှမ်းသံတော်ဆင့်ကို ပြောသည်။

ပြည်တွင်းငြိမ်းချမ်းရေးအတွက်ဟု အကြောင်းပြ ပြုလုပ်သည့် ဆွေးနွေးပွဲတွင် စစ်ခေါင်းဆောင် မင်းအောင်လှိုင်၏ ဖိတ်ခေါ်ဆွေးနွေးမှုအရ အထူးဒေသ ၄ မှ ငြိမ်းချမ်းရေးကိုယ်စားလှယ် အဖွဲ့ဝင် စုစုပေါင်း ၁၃ ဦးတက်ရောက်မည်ဖြစ်ကြောင်း သိရသည်။

စစ်ကောင်စီဆွေးနွေးပွဲတက်မည့် တိုင်းရင်းသား လက်နက်ကိုင်တပ်ဖွဲ့များအနက် လက်ရှိတွင် သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA)၊ ကရင်အမျိုးသား အစည်းအရုံး / ကရင်အမျိုးသားလွတ်မြောက်ရေးတပ်မတော်-ငြိမ်းချမ်းရေးကောင်စီ (KNU/KNLA-PC)၊ “ဝ” ပြည် သွေးစည်းညီညွတ်ရေးပါတီ ၊”ဝ” ပြည်သွေးစည်းညီညွတ်ရေးတပ်မတော် (UWSA/UWSP) နှင့် မွန်ပြည်သစ်ပါတီ (NMSP) တို့က တွေ့ဆုံဆွေးနွေးပြီးဖြစ်သည်။