သျှမ်းပြည်မြောက်ပိုင်း ကွတ်ခိုင်မြို့တွင် ဖွင့်လှစ်ထားသည့် ဂိမ်းဆိုင်တစ်ခုရှေ့၌ စစ်ကောင်စီလက်အောက်ခံ ပြည်သူ့စစ်က အသက် (၅၀) အရွယ်ရှိ အမျိုးသားတစ်ဦးကို သေနတ်ဖြင့် အကြောင်းမဲ့ ပစ်ခတ်ခဲ့ကြောင်း စုံစမ်းသိရသည်။
ထိုသေနတ်ပစ်ခတ်ခံရသည့် အမျိုးသားကို ကွတ်ခိုင်မြို့ ပြည်သူ့စစ်မှ ငွေကျပ် (၁၀) သိန်း ပေးဆောင်ခဲ့သော်လည်း ဆေးကုသရန် ခက်ခဲနေသေးကြောင်း သိရသည်။
ဖြစ်စဉ်မှာ လွန်ခဲ့သည့် မေလ (၂၇) ရက် ည (၇) နာရီဝန်းကျင်က ညစာစားပြီး ဦးလိဖာရှင်သည် ၎င်း သူငယ်ချင်းနှင့် အပြင်သွားစဥ် ကွတ်ခိုင်မြို့တွင်းရှိ ဂိမ်းဆိုင်တစ်ခုရောက်သွားပြီး သေနတ်ပစ်ခံလိုက်ရကြောင်း နီးစပ်သူ တစ်ဦးက ပြောသည်။
“ သူအဲ့ညက ဆေးလိပ်သောက်ဖို့ ဆိုပြီးတော့ အပြင်ထွက်သွားတာ။ သူ့သူငယ်ချင်းနဲ့ ထွက်သွားလိုက်တာ ဂိမ်းဆိုင်ရောက်သွားတယ်တဲ့။ ဘယ်နားဂိမ်းဆိုင်လည်းတော့ ကျမလည်း မသိဘူး။ ဂိမ်းဆိုင်ရှေ့မှာ ရပ်နေရင်းနဲ့ ပြည်သူ့စစ်က သူ့ကို သေနတ်နဲ့ ပစ်လိုက်တာ။ ညာဘက်ခြေထောက်မှာ ထိသွားတာ။ ထိပြီး အိမ်တန်းမရောက်လာသေးဘူး။ ည (၁၂) နာရီလောက်မှ သူအိမ်ပြန်ရောက်လာတာ။ သွေးတွေလည်း အများကြီးထွက်တယ်” ဟု နီးစပ်သူ တစ်ဦးက ပြောသည်။
လက်ရှိတွင် ဦးလိဖာရှင်ကို လားရှိုးမြို့ ဆေးရုံတွင် ဆေးကုသမှုခံယူနေပြီး ခြေထောက်စတီးထည့်ရန်အတွက် ငွေကြေးခက်ခဲနေကြောင်း ပြည်သူ့စစ်ဘက်မှ ငွေကျပ် (၁၀) သိန်းပေးခဲ့သော်လည်း မလုံလောက်သဖြင့် ခွဲစိတ်ရန်ခက်ခဲ နေကြောင်းသိရသည်။
“ အခုက လားရှိုးဆေးရုံမှာဆေးကုနေတယ်။ သူ့ခြေထောက်ကို ခွဲစိတ်ရမယ်တဲ့။ ပြီးတော့ စတီးထည့်ရမယ်တဲ့။ ပိုက်ဆံက မရှိတော့ ဆရာဝန်ကလည်း မခွဲစိတ်ပေးသေးဘူး။ ပိုက်ဆံအရင်သွင်းမှ ခွဲစိတ်ပေးမယ်တဲ့။ ပြည်သူ့စစ်ကတော့ (၁၀) သိန်းပေးပါတယ်။ ဒါမယ့် မလောက်ဘူး။ ကျမတို့ ပိုက်ဆံလည်း ကုန်တယ်။ ဒီကိုရောက်တာ (၈) ရက်လောက်ရှိနေပြီ။ သူ( ဦးလိဖာရှင်) လည်း အရမ်းကို နာကျင်နေတယ်” ဟု ဦးလိဖာရှင်၏ မိသားစုဝင်တစ်ဦးက ပြောသည်။
ထိုငွေလာပေးချိန်တွင်လည်း ပြည်သူ့စစ်က ဆေးရုံပေါ် ခြိမ်းခြောက်ပြီး ရန်စသေးကြောင်း မိသားစုထံမှ သိရသည်။
“ သူတို့ကို ကျမက ခေါ်လာတယ်လေ။ ကွတ်ခိုင်ဆေးရုံမှာလာကြည့်တုန်းကဆိုရင် ရန်ဖြစ်ဖို့ခေါ်သေးတယ်။ “ ချမလားချမလား” လို ခေါ်ချနေသေးတယ်။ သူတို့ လျော်ကြေး အနေနဲ့ ပိုက်ဆံတော့လာပေးသွားပါတယ်” ဟု အထက်ပါ မိသားစုဝင်က ပြောသည်။
ပစ်ခတ်ခဲ့သည့် ပြည်သူ့စစ်ကို ဦးလိဖာရှင် ကျန်းမာရေးပြန်ကောင်းလာတဲ့ အချိန်ထိ တာဝန်ယူပေးရန်အတွက် တောင်းဆိုနေကြသည်။
အလားတူ လွန်ခဲ့သည့် မတ်လ ၁၈ ရက်တွင်လည်း ဂိမ်းဆိုင်တစ်ခုတွင် ဂိမ်းလာဆော့သည့် အမျိုးသား နှင့် ပြည်သူ့စစ်အဖွဲ့တို့ ရန်ဖြစ်ပွားခဲ့ပြီး အဆိုပါ ပြည်သူ့စစ်က ထိုအမျိုးသားကို သေနတ်ဖြင့် ခေါင်းကိုထုလိုက်ပြီး ခေါင်းကွဲသွားကြောင်း သိရသည်။