သျှမ်းပြည်အရှေ့ပိုင်း မြန်မာ – ထိုင်းနယ်စပ် တာချီလိတ် – မယ်ဆိုင် ချစ်ကြည်ရေး အမှတ် (၁) တံတားများဖွင့်လှစ်ရန် နယ်စပ်ပြည်သူများ မျှော်လင့်ခဲ့သော်လည်း ယနေ့ချိန်ထိ မဖွင့်လှစ်သေးကြောင်း စုံစမ်းသိရသည်။

ယနေ့ ဇွန် ၁ ရက်နေ့တွင် တံတားကို ဖွင့်လှစ်ပေးမည်ဟု သတင်းထွက်ပေါ်ခဲ့သော်လည်း တံတားမဖွင့်လှစ်နိုင်သည့်အတွက် နယ်စပ် ပြည်သူများ စားဝတ်နေရေးအတွက် တံတားဖွင့်လှစ်ပေးရန်လည်း မျှော်လင့်နေကြသည်။

“ သူတို့ပြောတာ ဖွင့်တော့မယ်။ ဖွင့်တော့မယ်နဲ့ ပြောနေတာ။ ဖွင့်ပြီးလို့ မမြင်ရသေးရင်တော့ မမျှော်လင့်နိုင်သေးပါဘူး။ မယ်ဆိုင်ဘက်လူဆိုရင် အရမ်းကို မျှော်လင့်နေတယ်။ တံတားမှာ ဆိုင်ကယ် ကယ်ရီ လုပ်နေတဲ့သူတွေဆို သူတို့အရမ်းမျှော်နေတယ်။ တာချီလိတ်ဘက်ကလူတွေ မမျှော်ဘူးလာဆိုရင် မျှော်တာပေါ့။ ဒါပေ့မယ့်လည်း ကျမတို့ဘက်သိနေတယ်လေ။ သူတို့တစ်ခါထဲ ဖွင့်မယ်မဟုတ်ဘူး” ဟု တာချီလိတ်မြို့ ဒေသခံ အမျိုးသမီးက ပြောသည်။

အဆိုပါ တံတားကို ဖွင့်ရန် မကြာခဏ သတင်းထွက်ပေါ်လာခဲ့သော်လည်း လက်တွေ့မှာ တကယ်မဖွင့်ပေးသော်ကြောင့် ပြည်သူတစ်ချို့ မျှော်လင့်ချက်ကို ရိုက်ချိုးခံရသည့်အတွက် တစ်ချို့က မမျှော်လင့်ရဲကြောင်းလည်း ဒေသခံများက ပြောဆိုကြသည်။

“ တကယ့်အခြေနေကို ကြည့်မယ်ဆိုရင်လည်း ဘာမှမကွာခြားဘူး။ ဖွင့်ဖို့ အကြိမ်ကြိမ်လုပ်နေတာ။ ဒါကြောင့် ပြည်သူတွေလည်း အရမ်းကို မမျှော်လင့်ရဲတော့ဘူး။ တံတားတကယ်ဖွင့်မှပဲ အဆင်ပြေတော့မယ်။ ကျနော်တို့ ဒီဘက်ကတော့ အရမ်းကို သိပ်မမျှော်လင့်ရဲတော့ဘူး” ဟု တာချီလိတ်မြို့တွင် နေထိုင်သည့် အမျိုးသားက ပြောသည်။

လက်ရှိထို တံတားအမှတ် (၁) ကို မဖွင့်သေးသည့် အကြောင်းရင်းမှာ မြန်မာနိုင်ငံမှ ထိုင်းကို ဘတ်ငွေ သန်း (၂၀) တောင်းထားပြီး ထိုင်းက မပေးနိုင်သောကြောင့် တံတားကို မဖွင့်သေးကြောင်း တာချီလိတ်မြို့ စီးပွားရေးလုပ်ငန်းရှင် အသိုင်းအဝိုင်းတစ်ချို့က‌ ပြောသည်။

“ကြားရတာတော့ ဒီတံတားကို ဖွင့်ဖို့ မြန်မာဘက် က ထိုင်းကို ဘတ်ငွေ သန်း ၂၀ တောင်းထားတာ။ ဒါကို သူတို့ သဘောတူညီမှုမရသေးလို့ တံတားကို မဖွင့်သေးတာလား မသိဘူး” ဟု တာချီလိတ်မြို့ စီးပွားရေးလုပ်ငန်းရှင် အမျိုးသမီးက ပြောသည်။

သို့သော် ထိုတံတားကို မဖွင့်ရခြင်းသည် ကိုဗစ်-၁၉ ကြောင့် ဟု တာချီလိတ်ခရိုင် အုပ်ချုပ်‌ရေးမှူး ဦးမြင့်နိုင် ကပြောသည်။

“ ကျနော်တို့ ဒီနိုင်ငံတော် အစိုးရကနေပြီးတော့ ကိုဗစ် -၁၉ ကြောင့် မလို့ မဖွင့်ပေးသေးတာပါ။ အခုနယ်စပ်တိုင်းကို ကိုဗစ် -၁၉ ကြောင့်ပဲ ပိတ်ထားတာပါ” ဟု တာချီလိတ်ခရိုင် အုပ်ချုပ်ရေးမှူး ဦးမြင့်နိုင် က သျှမ်းသံတော်ဆင့်ကို ပြောသည်။

မြန်မာနိုင်ငံတွင် လက်ရှိ ကိုဗစ် -၁၉ ကာကွယ်ဆေးထိုးထားနေကြပြီဖြစ်ပြီး တစ်ချို့ဒေသတွင် ကိုဗစ် -၁၉ ရောဂါကို ပေါ့ဆနေသေးကြောင်း၊ တာချီလိတ်မြို့တွင်လည်း တစ်ချို့ပြည်သူများက Mask ( နှာခေါင်းစည်း) တပ်ခြင်းမရှိဘဲ အပြင်သွားလာမှုများလည်း ရှိနေကြောင်း သိရသည်။

“ အကုန်လုံးကလည်း ကိုဗစ် ကာကွယ်ဆေးထိုးပြီးကြပြီလေ။ တစ်ချို့ဆို ကိုဗစ် ကို မကြောက်တော့ဘူး။ ငှက်ဖျားလိုဖြစ်နေတော့ တစ်ချို့က ကိုဗစ် ကို အလေးမထားတော့ဘူး။ Mask ( နှာခေါင်းစည်း) မတပ်ပဲ အပြင်သွားလာနေတာတောင်ရှိနေတာပဲ” ဟု တာချီလိတ်မြို့တွင် ရောက်နေသည့် အမျိုးသား တစ်ဦးက ပြောသည်။

တာချီလိတ် – မယ်ဆိုင် တံတားကို ပြီးခဲ့သည့် မေ ၂၄ ရက်နေ့တုန်းက Thai – Myanmar Township Border Committee (TBC) ညှိနှိုင်းရေးမှူး၊ ချင်းရိုင်း အုပ်ချုပ်ရေးမှူး Passakorn Boonyaluck ၊ မြန်မာနိုင်ငံ တာချီလိတ်ခရိုင် အုပ်ချုပ်ရေးမှူး ဦးမြင့်နိုင် တို့က ဇွန်လ ၁ ရက်နေ့တွင် ဖွင့်သွားမည်ဟု အစည်းဝေးတက်ပြီး ဆုံးဖြတ်ခဲ့ကြသည်။