သျှမ်းမြောက် တချို့မြို့နယ် အတွင်း ဓာတ်ဆီများပြတ်လပ်မှုကြောင့်တချို့ဓာတ်ဆီဆိုင်များ ပိတ်လိုက်ရပြီ ဖြစ်ကြောင်းစုံစမ်း သိရသည် ။

လားရှိုးမြို့ ရှိ ဓာတ်ဆီဆိုင်တချို့ ဆီပြတ်လပ်မှုကြောင့် ကားတစ်စီးကို ကျပ်ငွေ ၂ သောင်းဖိုးသာ ဆီထည့်ရန်နှင့် ဆိုင်ကယ် တစ်စီးကို ကျပ်ငွေ ၅ ထောင်သာ ထည့်ရန် ကန့်သတ်လိုက်ကြောင်း ဒေသခံ အမျိုးသမီးတစ်ဦး က သျှမ်းသံတော်ဆင့်ကို ပြောသည်။

“ မနေ့ကတော့ ဓာတ်ဆီကို ၁ လီတာ ၂၅၀၀ ကျော် ၊ဒီနေ့ဈေးထပ်တက်လာတယ်။ ဓာတ်ဆီ ၁ တစ်လီတာ ၂၆၀၀ ကျော် ပေးနေရတယ် ။ တချို့ဆိုင်တွေတော့ ပိတ်နေပြီ တချို့ဆိုင်တွေတော့ ရောင်းနေသေးတယ်၊ သူတို့က အကန့်သတ်နဲ့ ရောင်းပေးနေတယ် “ဟု ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောပြသည်။

လာရှိုးမြို့ရှိ ပန်းခြံအနီး နှင့် မြို့ပြင်ထွက် တိုးဂိတ်မှာလည်း ဆီဆိုင်များ ပိတ်ထားပြီး တချို့ ဖွင့်ထားသည့် ဆိုင်များသည် ယခင်ကထက် ဆီဈေးအဆမတန် မြင့်တက်လာသောကြောင့် ဒေသခံများ အခက်အခဲများဖြင့် ရင်ဆိုင်နေရကြောင်း ၎င်းက ဆိုသည်။

ထို့အပြင် မိုင်းရယ်မြို့တွင် အောက်တိန်းဓာတ်ဆီများ ပြတ်လပ်နေသဖြင့် တာချီလိတ်မြို့သို့ သွားတင်နေရပြီ ဖြစ်ကြောင်း မိုင်းရယ်ဒေသခံများ ပြောပြချက်အရ သိရသည်။

“ အဓိက ကတော့ အောက်တိန်းဓာတ်ဆီတွေ မရှိတော့ဘူး ၊ဓာတ်ဆီတွေတော့ ရောင်းကောင်းလွန်းလို့ မှာလို့တောင် မရတော့ဘူး ၊ဗမာပြည်မှာလည်း မရှိဘူး လားရှိုးမှာလည်း ကုန်နေလို့ တာချီလိတ်မြို့မှာ သွားတင်ရနေပြီ” ဟု ဒေသခံ သျှမ်းအမျိုးသားတစ်ဦးက ပြောသည် ။

အောက်တိန်းဓာတ်ဆီ ၁ လီတာလျှင် မြန်မာကျပ်ငွေ ၂၇၀၀ ခန့် ပေးနေရပြီး ရန်ကုန်၊ မန္တလေးမြို့တွင်လည်း ဆီများပြတ်လပ်နေသဖြင့် ထိုင်းနယ်စပ် နှင့် နီးသော တာချီလိတ်မြို့ သို့ ကိုယ်တိုင်သွားသယ်နေရကြောင်း ၎င်းက ထပ်လောင်းပြောသည်။

စစ်ကောင်စီက အာဏာသိမ်းပြီးနောက်ပိုင်း တစ်နှစ်အကြာတွင် မြန်မာနိုင်ငံအတွင်းရှိ ကုန်ပစ္စည်းအားလုံး ဈေးမြင့်တက်လာသည့်အတူ ဓာတ်ဆီစျေးလည်း အဆမတန်မြင့်တက်လာသည့်အတွက် သာမန်ပြည်သူများလည်း စားဝတ်နေရေး ခက်ခဲလာသည့်အပြင် အခြေခံလူတန်းစားများ အတွက် ပိုမို ခက်ခဲလာကြောင်း သိရသည်။