သျှမ်းပြည်တောင်ပိုင်း အောင်ပန်းမြို့ ရွာသစ်ရပ်ကွက်  နေအိမ်တည်းခိုခန်းတစ်ခုတွင် ယနေ့ (မေ ၃၀)ရက် မနက် ၁၁နာရီ၌  မီးလောင်မှုဖြစ်ပွားခဲ့ပြီး မီးငြိမ်းသတ်မှု ပါဝင်ကူညီခဲ့သည့် ကြက်ခြေနီတပ်ဖွဲ့ဝင်တစ်ဦး ထိခိုက်ဒဏ်ရာရရှိသွားကြောင်း သတင်းသိရသည်။

ယနေ့ မေလ ၃၀ ရက်နေ့ မနက်ပိုင်း ၁၁ နာရီအချိန်တွင် အောင်ပန်းမြို့၊ ရွာသစ်ရပ်ကွက်မှ ပြည်ထောင်စု လမ်းမဘေးရှိတော်ဝင်ဧည့်ရိပ်သာ အိမ်၌ မီးလောင်မှုဖြစ်ပွားခဲ့ခြင်း ဖြစ်ကြောင်း သိရသည်။ 

အဆိုပါ မီးလောင်မှုကို ကလောမြို့၊ အောင်ပန်းမြို့မှ မီးသတ်တပ်ဖွဲ့ဝင်များ၊ အောင်ပန်း​​ကြက်ခြေနီတပ်ဖွဲ့ ဝင်များနှင့် တာဝန်သိ ပြည်သူများ ပူးပေါင်း၍ မီးငြိမ်းသတ်ခဲ့ကြောင်း ဒေသခံတစ်ဦးက သျှမ်းသံတော်ဆင့် ကိုပြောသည်။

“အပေါ်ထပ်ကနေ မီးစလောင်တာပါ၊ ဘာကြောင့်လောင်လဲဆိုတာတော့ မသိပါဘူး၊ ပျက်စီးဆုံးရှုံးမှု တန်ဖိုး တွေလည်း မသိရသေးဘူး၊ ၁၁ နာရီကျော်မှ မီးလောင်တာ ၁၂ နာရီခွဲမှ မီးငြိမ်းနိုင်ခဲ့တယ်၊ ပျက်စီးမှုတွေတော့ များမယ်ထင်တယ်” ဟု ၎င်းက ပြောသည်။

အဆိုပါ မီးလောင်မှုကြောင့် မီးငြိမ်းမှုတွင် ပါဝင်ကူညီခဲ့သည့် အောင်ပန်းကြက်ခြေနီ တပ်ဖွဲ့ဝင် တစ်ဦး ထိခိုက် ဒဏ်ရာရှိခဲ့ကြောင်း သတင်းသိရသည်။ 

“မီးလောင်တဲ့အိမ်က နှစ်ထပ်တိုက် မြင့်လည်းတော်တော်မြင့်တယ်၊ ဒါကြောင့် မီးငြိမ်းကူနေတဲ့ ကြက်ခြေနီတပ်ဖွဲ့ ဝင်တစ်ဦးက မတော်တဆထိခိုက်ဒဏ်ရာရသွားလို့ ဆေးရုံကို ပို့ပေးခဲ့ရတယ်” ဟု အထက်ပါ ပုဂ္ဂိုလ်က ပြောသည်။

လက်ရှိတွင် မီးလောင်ရခြင်း အကြောင်းရင်းနှင့် ပျက်စီးဆုံးရှုံးမှုတန်ဖိုးများကို သျှမ်းသံတော်ဆင့်မှ ဆက်လက်စုံစမ်းနေဆဲ ဖြစ်သည်။