သျှမ်းပြည်တောင်ပိုင်း တောင်ကြီးခရိုင်အတွင်းရှိ ပအိုဝ်းအမျိုးသားအဖွဲ့ချုပ်၊ ပအိုဝ်းအမျိုးသား တပ်မတော် (PNO/PNA) တို့မှ သျှမ်းလူမျိုးအပါအဝင် အရပ်သားပြည်သူ လူငယ်များ စစ်သားလုပ်ရန် ညွှန်ကြား စေခိုင်းမှုများ ရှိနေကြောင်း သတင်းသိရသည်။

တောင်ကြီးခရိုင်အတွင်းရှိ ဆီဆိုင်မြို့နယ် နှင့် ဟိုပုံးမြို့ အတွင်းရှိ ကျေးရွာ အုပ်ချုပ်ရေးမှူးများကို PNO အဖွဲ့မှ အစည်းအ၀ေးခေါ်ဆိုကာ သျှမ်းလူမျိုးအပါအ၀င် ကျား၊မ မရွေး တစ်အိမ်ထောင်လျှင်တစ်ဦး စစ်သင်တန်း တက်ရမည် ဟု သိရသည်။

မေလ ၂၆ ရက်တွင် ဆီဆိုင်မြို့နယ် ဆိုင်လဲကျေးရွာအုပ်စု ရွာပေါင်း ၃၃ ရွာကို PNO မှ စစ်သားသစ် စာရင်းကောက်ခံရန်၊ ကျပ်ငွေ ၃ သောင်း နှင့် ဆန်တပြည် ပေးရန် လာရောက်ပြောဆိုခဲ့ကြောင်း သိရသည်။

“ဇွန် ၁၆ ရက် နောက်ဆုံးထားပြီး စာရင်းပေးရမယ်။ စာရင်းမသွင်းပေးရင်လည်း အိမ်ထိ လာခေါ်မှာ ကြောက်ရတယ်။ စစ်သင်တန်းက ၉ ရက် တက်ရမယ်လို့ သိရတယ်” ဟု ဆိုင်လဲကျေးရွာမှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် မေလ ၂၃ ရက်နေ့တွင် ဆီဆိုင်မြို့နယ်အတွင်းရှိ ကျေးရွာနေ ပြည်သူများကို PNO မှ အစည်းအဝေး ခေါ်ပြီး ကျေးရွာတစ်ခုလျှင် အမျိုးသားလူငယ် အယောက် ၂၀ ပေးရန် စေခိုင်းညွှန်ကြားမှုများ ရှိခဲ့ကြောင်း ဒေသခံများထံမှ သိရသည်။

“ကျနော်တို့ ဆီဆိုင်မြို့နယ်မှာက အုပ်စုတွေများတယ်၊ နယ်မြေကျယ်တော့ တစ်ရွာကို လူငယ်အယောက် ၂၀ ပေး ဖို့ PNO တွေကအစည်းအဝေးခေါ်ပြီးတောင်းတယ်၊ဒါပေမဲ့ ကားလမ်းအရှေ့ဘက်ခြမ်းကို မကောက်ဘူး၊ သျှမ်း လူမျိုး တွေများတဲ့ ကားလမ်းအနောက်ဘက်ကိုပဲ အများစုတောင်းလာတယ်” ဟု ဆီဆိုင်မြို့နယ်မှ အမျိုးသား တစ်ဦးက သျှမ်းသံတော်ဆင့်ကို ပြောသည်။

ထို့အတူ ဟိုပုံးမြို့နယ်ရှိ ရန်ကင်းကျေးရွာ၊ လွယ်အွန့်ကျေးရွာ၊ ဂနိုင်ထုံကျေးရွာ တို့မှ ဒေသခံများကို PNA လက်အောက်ခံ ပြည်သူ့စစ်များ လုပ်ဆောင်ရန် စေခိုင်းညွှန်ကြားမှုများ ရှိနေကြောင်း သတင်းသိရသည်။

“ရန်ကင်းရွာဆို ဟိုပုံးမြို့အဝင်ကရွာပေါ့၊ အဲ့ရွာမှာ လူငယ် ၁၃ ယောက်ပေးလိုက်ရတယ်၊ တချို့ရွာကျတော့ မဲနှိုက်ရတယ်၊ ရွာလူဦးရေ များရင်များသလို ပိုပေးရတယ်၊ သျှမ်းလူမျိုးဆိုလည်း သွားရတာပဲ၊ ပအိုဝ်းလူမျိုး တွေကိုပဲ သူတို့ကောက်တာ မဟုတ်ပါဘူး” ဟု ဟိုပုံးမြို့ အမျိုးသားလူငယ်တစ်ဦးက သျှမ်းသံတော်ဆင့်ကို ပြောသည်။

ထို့ပြင် PNO မှ အသက် ၁၈ နှစ်မှ အသက် ၅၀ နှစ် အောက် ကျား၊မ မရွေး ကောက်ခံသွားမည် ဟုသိရသည်။

ကိုဗစ်-၁၉ ကပ်ရောဂါ နှင့် စစ်အာဏာသိမ်းမှုကြောင့် စီးပွားရေးကျဆင်းနေချိန် PNO မှ ကျေးရွာပြည်သူများထံ နည်းမျိုးစုံ ခြိမ်းခြောက်နေပြီး စစ်သားသစ်စုဆောင်းနေသဖြင့် လူငယ်များ ထိုင်းနိုင်ငံသို့ ထွက်ပြေးတိမ်းရှောင် နေမှုများလည်း ရှိနေကြောင်း သတင်းသိရသည်။