သျှမ်းပြည်တောင်ပိုင်း ပင်လောင်းမြို့နယ်အတွင်း အာဏာသိမ်းစစ်ကောင်စီတို့ တပ်ဆင်ထားသည့် မြေမြှုပ်မိုင်းကို ရေဆင်းချိုးသည့် စစ်ကောင်စီတပ်ဖွဲ့သားများ ပြန်လည်နင်းမိပြီး နှစ်ဦးသေဆုံးခဲ့ကြောင်း သတင်း သိရသည်။

ပင်လောင်းမြို့နယ် ပင်ပုံကျေးရွာ မေ ၂၄ရက် တွင် စစ်ကောင်စီတပ်ဖွဲ့နှင့် ပအို၀်း အမျိုးသား တပ်မတော် PNA တို့က ပူးပေါင်း စခန်းချ နေရာယူထားပြီး ရေဆင်းချိုးသည့် စစ်ကောင်စီ တပ်သားနှစ်ဦးမှ မိုင်းနင်းမိခြင်းဖြစ်ကြောင်း ဒေသခံများထံမှ သိရသည်။

“ပြီးတဲ့ တစ်ပတ်က ရွာအနီးပတ်ဝန်းကျင်မှာ စစ်ဆေးရေးလုပ်သား စစ်သားတစ်ဖွဲ့ရှိတယ်၊ ဒါပေမဲ့ သူတို့ထဲက ၁၀ ယောက်ကျော်လောက်ပဲချန်ပြီး PNA တွေနဲ့ ရွာနားမှာ ကင်းပုန်းချထားတယ်၊ ပင်ပုံရွာအစပ်မှာ ရေဆင်းချိုးရင်း သူတို့ထောင်ထားတဲ့ မိုင်း သူတို့ပြန်တက်နင်းမိလို့ နှစ်ဦးသေသွားတယ်” ဟု အမည်မဖော်လိုသည့် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

အဆိုပါ နယ်မြေပတ်ဝန်းကျင်တွင် စစ်ကောင်စီတပ်ဖွဲ့နှင့် PNA တို့သာ သွားလာလှုပ်ရှားလေ့ရှိပြီး ပြည်သူ့ ကာကွယ်ရေး တပ်ဖွဲ့ PDF များ မရောက်ရှိသေးသည့်အတွက် ယင်းမြေမြှုပ်မိုင်းသည် စစ်ကောင်စီတို့ ထောင်ထားခြင်းဖြစ်မည်ဟု ဒေသခံများက ပြောဆိုကြသည်။

“တောအစပ်တွေ စစ်ကောင်စီနဲ့ PNA ကင်းပုန်းတွေရှိတဲ့ သွားလာဖူးတဲ့နေရာတွေကို ဖြတ်သွားရမယ် ဆိုရင် သတိထားဖို့လိုလာပြီဗျ၊ အခု စစ်တောင် မဖြစ်သေးတဲ့ ကျနော်တို့ ရွာနားမှာတောင် မြေမြှုပ်မိုင်း ပေါက်ကွဲမှုတွေ ရှိနေပြီဆိုတော့ တော်တော်သတိထားဖို့လိုပြီ” ဟု အထက်ပါ ဒေသခံက ဆက်လက်ပြောဆိုထားသည်။

နိုင်ငံတကာမြေမြှုပ်မိုင်းများတားဆီးရေးလှုပ်ရှားမှု (ICBL) က မြန်မာနိုင်ငံရှိ လက်နက်ကိုင်အဖွဲ့များအားလုံးကို မြေမြှုပ်မိုင်း အသုံးပြုမှု ချက်ချင်းရပ်တန့်ရန် တောင်းဆိုမှုများ ပြုလုပ်ခဲ့ပေမယ့် Landmine Monitor အရ ၂၀၀၀ ခုနှစ်ကနေ ၂၀၂၀ ခုနှစ်အတွင်း မိုင်းထိခိုက်ဒဏ်ရာရသူများသည် သျှမ်းပြည်နှင့် ကချင်ပြည်မှ အများဆုံး ဖြစ်နေသည်