သျှမ်းတောင် ဟိုပုံးမြို့နယ် အတွင်းရှိ ကျေးရွာတချို့ကို ပအိုဝ်းပြည်သူ့စစ် (PNO)မှ တအိမ်ထောင်စုလျှင် ကျပ်ငွေ ၃သောင်းကျပ်နှင့် စစ်သားသစ်စုဆောင်းရန် စာရင်းများလာကောက်နေကြောင်း စုံစမ်းသိရသည်။

PNO မှ နယ်မြေလုံခြုံရေး ဟုပြောဆိုပြီး အသက် ၁၈နှစ်မှ အသက် ၅၀ အောက်များ၏ နာမည်စာရင်းကို ကောက်ပေးရန် နှင့် လုံခြုံရေးလှုပ်ရှားရန် အတွက် လိုအပ်သည့် စရိတ် ရိက္ခာ ဆန်၊ဆီ၊ဆားများနှင့် တအိမ်ထောင်လျှင် ကျပ်ငွေ ၃သောင်း ပေးဆောင်ရမည် ဟု ဟိုပုံးမြို့နယ်မှ PNO စာရင်းလာကောက်ချိန်တွင် သွားရောက်တွေ့ဆုံခဲ့သည့် အမျိုးသား တစ်ဦးက သျှမ်းသံတော်ဆင့်ကို ပြောသည်။

“ သူတို့က လူတွေကို လက်တလော မခေါ်သေးဘူး၊ စာရင်းကို ဇွန် ၃ရက်မှာ အပြီးပေးရမယ်။ လောဆယ်တော့ တအိမ်ကို ပိုက်ဆံ ၃သောင်းနဲ့ဆန်တပြည်ကတော့ ပေးလိုက်ရပြီ၊ လုံခြုံရေး အတွက်လို့ပြောတာပဲ” ဟု အစည်းအဝေးတက်သည့် အမျိုးသား က ပြန်ပြောပြသည်။

အဆိုပါကိစ္စရပ်များကို မီဒီယာနှင့် လူမှုကွန်ရက်စာမျက်နှာပေါ် တင်ပါက အရေးယူမည်ဟုလည်း PNO အဖွဲ့ က ရွာသားများကို ခြိမ်းခြောက်ပြောဆိုခဲ့သည်။

PNO ၏ အစည်းအဝေး တွင် အသက် ၁၈နှစ်နှင့်အထက် အသက် ၅၀နှစ်အောက်များအား လုံခြုံရေးအမည်ခံ ပျူစောထီးတပ်များဖွဲ့စည်းရမည်ဖြစ်ကြောင်း၊ မေ ၂၄ရက် နောက်ဆုံးနေ့ထားပြီး မြို့နယ်အဆင့်၊ မေ ၂၇ရက် နောက်ဆုံးထားပြီး ကျေးရွာအုပ်စုအဆင့် နှင့် ဇွန် ၃ရက် နောက်ဆုံးထားပြီး မြို့နယ် တိုင်းလုံခြုံရေး အဖွဲ့ဆီ စာရင်းပေးပို့ရန် ဆုံးဖြတ်ခဲ့သည်။

ထို့ပြင် ဇွန်လအတွင်း အပြီးအစီး လုံခြုံရေး သင်တန်းအားသင်တန်းပေးရန် နှင့် PNO လုံခြုံရေး စရိတ်အတွက် ပအိုဝ်း ဒေသ တခုလုံး အိမ်ထောင်စုများအားတအိမ်ထောင်လျှင် ကျပ်ငွေ ၃သောင်း နှင့် အထက် ကောက်ခံရန် နှင့် ဆန်၊ ဆီ၊ဆား များအားကောက်ရန် ညွှန်ကြားထားကြောင်းသိရသည်။

ထို့ကိစ္စနှင့် ပတ်သက်ပြီး ဟိုပုံးမြို့နယ် အတွင်းနေထိုင်သည့် သျှမ်းအမျိုးသားတစ်ဦးက “ ကျနော်တို့ရွာကလူတွေကလည်း အခက်အခဲတွေရှိကြတယ်လေ။ စီးပွားရေး ဝင်ငွေက အဆင်မပြေတော့ ငွေရော လူရော မပေးနိုင်ဘူးဆိုပြီး တောင်းပန်ခဲ့ပေမယ့် မရဘူး။ အထက် အမိန့်ပဲဆိုပြီးပြောတယ်” ဟု သျှမ်းသံတော်ဆင့်ကို ပြောသည်။

ကိုဗစ်-၁၉ ကပ်ရောဂါနှင့် စစ်အာဏာသိမ်းမှုကြောင့် ဟိုပုံးမြို့နယ်အတွင်း အဖက်ဖက် ကျဆင်းနေချိန် တဖက်မှာလည်း PNO မှ ကျေးရွာပြည်သူများထံ နည်းမျိုးစုံ ခြိမ်းခြောက်နေပြီး စစ်သားသစ်စုဆောင်နေသဖြင့် လူငယ်များလည်း ထိုင်းနိုင်ငံသို့ ထွက်ပြေးတိမ်းရှောင်နေရကြောင်း ၎င်းသျှမ်းအမျိုးသားက ထပ်လောင်းပြောသည်။

ပြီးခဲ့သည့် ၁၂ရက်တွင် ညောင်ရွှေမြို့နယ်၊ ထီရိကျေးရွာ၌ စစ်တပ်နှင့် PNO အဖွဲ့ကို PDFပူးပေါင်းအဖွဲ့က တိုက်ခိုက်ခဲ့ရာ စစ်ကောင်စီ ဘက်မှ ၁၅ဦးကျဆုံးခဲ့ပြီး စစ်ကောင်စီတပ်သား တပ်သား ၂ ဦးနှင့် PNO တပ်သား၃ ဦး လက်နက်ချဖမ်းဆီးခံခဲ့ရသည်။

ထို့နောက် PNOတပ်ဖွဲ့မှ ၎င်းတို့နယ်မြေလုံခြုံရေးအစည်းအဝေးကို ခေါ်ယူခဲ့ခြင်းဖြစ်သည်။