သျှမ်းပြည်တောင်ပိုင်း ပင်းတယမြို့သို့ ရောက်ရှိနေသည့် စစ်ဘေးရှောင်များသည် မိုးရာသီရောက်ရှိလာသဖြင့် စား၀တ်နေရေးအတွက် အခက်အခဲများ ကြုံတွေ့နေရကြောင်း သတင်းသိရသည်။
စစ်ကောင်စီတို့ ထိုးစစ်ဆင် တိုက်ခိုက်မှုကြောင့် ပင်းတယမြို့ပေါ်ရောက်ရှိနေသည့် စစ်ဘေးရှောင် ၂၅၀ ကျော်သည် မိုးရာသီကာလအတွင်း ဆေး၀ါး၊ ရေလှဲ၀တ် နှင့် အမျိုးသမီး လစဥ်သုံးများ အရေးပေါ် လိုအပ်နေသည် ဟု စစ်ရှောင်များကို ကူညီပေးနေသည့် အသက်(၃၀) အရွယ် အမျိုးသားတစ်ဦးက သျှမ်းသံတော်ဆင့် ကိုပြောသည်။
“အမျိုးသမီးတွေအတွက် ပိုပြီးခက်ခဲနေတဲ့ အနေအထားရှိပါတယ်၊ ဘာဖြစ်လို့လဲဆိုရင် မိုးရာသီလည်း ရောက်လာတော့ သူတို့မှာ လဲဝတ်ဖို့ အဝတ်အစားတွေလည်း လုံလုံလောက်လောက်မရှိကြဘူး၊ လစဥ်သုံး ပစ္စည်းတွေလည်း လုံလောက်မှု မရှိဘူး၊ အလှူရှင်များ စေတနာရှင်များကူညီပေးကြဖို့ မေတ္တာရပ်ခံချင်ပါ တယ်” ဟု ၎င်းက ပြောသည်။
ပင်းတယမြို့ပေါ်ရောက်ရှိနေသည့် စစ်ဘေးရှောင်များသည် အောင်ခြင်းတောရကျောင်း၌ ခိုလှုံနေရပြီး အမျိုးသမီးများ အနေဖြင့် ၇၅ ဦး ဝန်းကျင် ခန့်ရှိနေပြီး၊ ကလေးငယ်နှင့် သက်ကြီးရွယ်အိုများလည်း ပါဝင်ကြောင်း အထက်ပါ အမျိုးသားက သျှမ်းသံတော်ဆင့်ကို ဆက်ပြောသည်။
ထို့အပြင် လက်ရှိတွင် ရွာငံဘက်မှ စစ်ရှောင်များ စုစုပေါင်း ၈၀၀ ဝန်းကျင်ခန့်ရှိနေပြီး ပင်းတယမြို့ပေါ်မှ ၂၅၀ နှင့် တချို့ သော စစ်ရှာင်များက အနီးပတ်ဝန်းကျင်များသို့ထွက်ပြေးတိမ်းရှောင်နေရသလို တချို့လည်း တောထဲမှာ ရှိနေကြောင်း ရွာငံမြို့ ဒေသခံအမျိုးသားလူငယ်တစ်ဦးက သျှမ်းသံတော်ဆင့်ကိုပြောသည်။
“တချို့က ဒီနီးနားမြို့က ဘုန်းကြီးကျောင်းတွေ အမျိုးအိမ်တွေဘက် တိမ်းရှောင်သွားကြသလို တချို့လည်း တောထဲမှာပဲ ရှောင်တိမ်းနေရတဲ့ပြည်သူတွေရှိပါတယ်၊ သူတို့အတွက် မိုးကာတွေ စားဝတ်နေရေး အခက်အခဲရှိနေကြတာ”ဟု အထက်ပါ လူငယ်က ပြောသည်။
စစ်ကောင်စီတပ်သားနှင့် ပျူစောထီးတို့ ပူးပေါင်းပြီး ရွာငံမြို့ထဲရှိ မြို့ရွာများအတွင်း ထိုးစစ်ဆင် တိုက်ခိုက်မှု ဖမ်းဆီးသတ်ဖြတ်မှုတွေကြောင့် ရွာငံဒေသခံတွေက ထွက်ပြေးတိမ်းရှောင်နေရခြင်းဖြစ်ကြောင်း သိရသည်။
ယင်းကဲ့သို့ထွက်ပြေးတိမ်းရှောင်နေရသည့် ပြည်သူများက နွားဘန်းကြီးကျေးရွာ၊ လယ်ကိုင်းကျေးရွာ၊ လွှစင်ကျေးရွာ၊ ပဲရင်းတောင်ရွာတို့မှဖြစ်ပြီး ယင်းဒေသများတွင် စစ်ကောင်စီတို့ မီးရှို့ဖျက်စီးလိုက်သည့် ပြည်သူ့နေအိမ်များလည်း များစွာရှိနေကြောင်း သိရသည်။
စစ်တပ်အခြေစိုက်လှုပ်ရှားမှု မရှိသော်လည်း တော်လှန်ရေးလှုပ်ရှားမှု အားကောင်းလာနေသည့် ရွာငံမြို့နယ် ကို စစ်တပ်မှအင်အားအများအပြား အသုံးချကာ အကြမ်းဖက်နှိမ်နင်းနေသည့်အတွက် ယနေ့အချိန်ထိ ဒေသခံ PDF ရဲဘော် ၄ ဦးကျဆုံးကာ စစ်ကောင်စီဖက်မှ ၁၁ ဦး ထက်မနည်းသေဆုံးထားကြောင်း သိရသည်။
Leave a Comments