သျှမ်းပြည်ပြန်လည်ထူထောင်ရေးကောင်စီ၊သျှမ်းပြည်တပ်မတော် (RCSS/SSA)မှ ခေါင်းဆောင် ဗိုလ်ချုပ်ကြီး ယွက်စစ် ကိုယ်တိုင် ဦးဆောင်သည့် အဖွဲ့သားများသည် စစ်ကောင်စီ နှင့် တွေ့ဆုံ ဆွေးနွေးရန်အတွက်ခရီးစဥ် စတင် ထွက်ခွာ နေကြောင်း သတင်းသိရသည်။

ယနေ့ (မေလ ၁၉) ရက်တွင် ဗိုလ်ချုပ်ကြီးယွက်စစ်ကိုယ်တိုင် ဦးဆောင်သည့် အဖွဲ့သားများက အာဏာသိမ်း စစ်ကောင်စီတပ်ဖွဲ့တို့ ဖိတ်ခေါ်ထားသည့် အတိုင်း ဆွေးနွေးပွဲသို့ တက်ရောက်ရန် တာချီလိတ်လေဆိပ်မှ နေပြည်တော်သို့ ခရီးထွက်ခွာသွားကြောင်း အမည်မဖော်လိုသူတစ်ဦးက သျှမ်းသံတော်ဆင့်ကို ပြောသည်။

“စစ်ကောင်စီနဲ့ ဆွေးနွေးဖို့ စဝ်ယွက်စစ် (ဗိုလ်ချုပ်ကြီးယွက်စစ်) ကိုယ်တိုင် အဖွဲ့သားတွေကို ဦးဆောင်ပြီး သွားပါ တယ်၊ ဒီနေ့နေ့လည်မှာ တာချီလိတ်လေဆိပ်ကနေ နေပြည်တော်ကိုသွားဖို့ ခရီးစဥ်စပါပြီ၊ လေကြောင်းလိုင်းနဲ့ နေပြည်တော်ကို သွားမယ်ပေါ့” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။

တာချီလိတ်လေဆိပ်မှတစ်ဆင့် နေပြည်တော်သို့ ခရီးထွက်မည့် ဗိုလ်ချုပ်ကြီးယွက်စစ်ကို လေဆိပ် လေယာဥ် ကွင်းအထိ လိုက်လံနှုတ်ဆက်နေသည့် ဒေသခံတိုင်းရင်းသား ပြည်သူလည်း များစွာရှိနေကြောင်း ဒေသအစိုးရပိုင် သတင်းဌာန တစ်ခုဖြစ်သည့် တာချီလိတ်မဏ္ဍိုင် သတင်းစာမျက်နှာ Facebook Page မှ တင်ထားသည်။

လက်ရှိစစ်ကောင်စီတို့ ဖိတ်ခေါ်ထားသည့် ဆွေးနွေးပွဲသည် ငြိမ်းချမ်းရေးအတွက်ဆွေးနွေးညှိနှိုင်းရန်ဟု ပြောဆို ထားပြီး အာဏာသိမ်း စစ်ကောင်စီခေါင်းဆောင် ဗိုလ်ချုပ်မှူးကြီး မင်းအောင်လှိုင်ကိုယ်တိုင် ဦးဆောင်မည်ဟု သတင်းသိရသည်။

စစ်ကောင်စီ၏ အဆိုပါ ဆွေးနွေးပွဲကို NCA လက်မှတ်ရေးထိုးထားသည့် တိုင်းရင်းသားလက်နက်ကိုင်များအနက် DKBA၊ MNSP၊ RCSS/SSA၊ ALP၊ PNL နှင့် LDU စသည့်တိုင်းရင်းသားလက်နက်ကိုင်တို့မှ တက်ရောက်မည် ဖြစ်ကြောင်း သိရသည်။

ထို့အပြင် NCA လက်မှတ်ရေးထိုးထားခြင်းမရှိသည့် အဖွဲ့ များအနက် “ဝ” တပ်ဖွဲ့ (UWSA)၊ မိုင်းလားတပ်ဖွဲ့ (NDAA) နှင့် သျှမ်းပြည်တိုးတက်ရေးပါတီ၊သျှမ်းပြည်တပ်မတော် (SSPP/SSA) တို့မှ တက်ရောက်မည်ဟုလည်း သတင်းသိရသည်။