သျှမ်းပြည်မြောက်ပိုင်း မူဆယ်ခရိုင် မုံးကိုးမြို့နယ်မှ ကြံတင်ကားသမားများထံ ဒေသခံပြည်သူ့စစ်နှင့် စစ်ကောင်စီ တပ်ဖွဲ့က ငွေကြေး အဆမတန် ကောက်ယူနေကြောင်း စုံစမ်းသိရသည်။
မုံးကိုးမြို့ ၀င်ဂိတ်ကို ကျော်ဖို့အတွက် တစ်စီးလျှင် တရုတ်ယွမ် ၃၀၀ (မြန်မာပေါက်ငွေ ၈၁၆၃၀ ကျပ်)ပေးဆောင်ရကာ တချို့ကားသမားများက မပေးဆောင်နိုင်သဖြင့် လမ်းခရီးကြန့်ကြာမှုများရှိနေကြောင်း အမည်မဖော်လိုသည့် ကားသမားတစ်ဦး က သျှမ်းသံတော်ဆင့်ကို ပြောသည်။
“ ကားတွေအရမ်းများတော့ တန်းစီပြီးစောင့်ရတယ်။ ပိုက်ဆံရှိတဲ့သူတွေကတော့ ပြည်သူ့စစ်တွေကို ပိုက်ဆံပေးပြီး အလှည့်ကိုကျော်ဝင်ပါတယ်၊ ယွမ်ငွေ ၃၀၀ ဆိုရင် ကား ၁၀ စီးလောက်ပဲ ကျော်ရတယ်၊ ပြည်သူ့ စစ်တွေလုပ်စားတာပါ။ ပိုက်ဆံမပေးနိုင်ရင် ကားကိုမရွေ့ရတာ” ဟု အထက်ပါ ကားသမား အမျိုးသားက သျှမ်းသံတော်ဆင့်ကိုပြောသည်။
ထို့အပြင် မြို့နယ်အထွေထွေအုပ်ချုပ်ရေးမှူးမှ ဦးစီးပြီး ဖွင့်ထားသည့် မုံးကိုးမြို့အဝင်နားရှိ စစ်ဆေးရေးဂိတ်တွင် လည်း ကားသမားများ ကိုဗစ် စစ်ဆေးခ တစ်ဦးလျှင် ယွမ်ငွေ ၅၀ (မြန်မာငွေ ၁၅၀၀၀ ကျပ်) ပေးရသည့်အပြင် ကားသမားဝတ်ဆင်ရန် PPE ဝတ်စုံများလည်း ၎င်းတို့ထံမှ ဝယ်ယူရကြောင်း ကိုယ်တိုင်ကြုံတွေ့ရသည့် အထက်ပါ ကားသမားက ဆက်လက်ပြောသည်။
“မြို့နယ်/ ထွေအုပ်တွေက ကိုဗစ်စစ်ခဆိုပြီး ကားသမားတစ်ယောက်ကို ယွမ် ၅၀ တောင်းပါတယ်၊ ပြီးတော့ အဲ့နားမှာ ဘီးလိမ့်ခွန်ကောက်တဲ့ ဂိတ်တစ်ခုရှိသေးတယ်၊ အဲ့မှာက ကားတစ်စီးကို ၁၀၀၀ ကျပ်ကောက်ပါတယ်။ ကားသမားတွေ ဝတ်ဖို့ PPE ဝတ်စုံကိုလည်း တရုတ်ပြည်က အလကားပေးလာတာကို တစ်စုံ ၁၅၀၀၀ ကျပ် ဆိုပြီး မဝယ်မနေရဝယ်ရတယ်” ဟု ၎င်းက ပြောပြထားသည်။
ထို စစ်ဆေးမှုနှင့် အခွန်တောင်းခံမှုများ တင်းကြပ်သည့်အပြင် ကားသမားတချို့က ၁၀ ရက်ကျော်အထိ တန်းစီစောင့်ဆိုင်းရသည့်အတွက် ကြံများအနံ့ထွက်ကာ တစ်စီးလုံးသွန်ပစ်လိုက်ရသည့် ကြံကားများလည်း ရှိကြောင်း သတင်းသိရသည်။
“အဲ့လို တန်းစီပြီးစောင့်ရတော့ တချို့ကားသမားတွေက ၁၀ ရက်ကျော်အထိ စောင့်ရတာရှိတယ်၊ အဲ့ကြောင့် ကြံတွေအပုပ်နံ့ထွက်ပြီး သွန်ပစ်လိုက်ရတာမျိုးတွေရှိတယ်၊ အဲ့လိုအကြာကြီး စောင့်ရတဲ့ ကားသမားအများစု က မူဆယ် နမ့်ခမ်းနဲ့ မော်တောင်းဘက်က ဖြစ်တယ်၊ သူတို့က ယွမ် ၃၀၀ ကို မပေးလို့ မဝင်ရတာပေါ့၊ အဲ့ကြောင့် မဝင်မချင်းစောင့်ရတယ်” ဟု မုံးကိုးမြို့ပေါ်မှ ကြံစိုက်တောင်သူ အမျိုးသားက ပြောသည်။
နမ့်ဖတ်ကာနှင့် ၁၀၅ မိုင်မှ ကြံစိုက်တောင်သူများသည် မုံးကိုးဘက်သို့သာ ကြံများကို ရောင်းချနိုင်သဖြင့် မြို့ထဲ ဝင်ရောက်နိုင်ရန်အတွက် ကြံတင်ကားသမားများက ရက်အတော်ကြာ တန်းစီစောင့်ဆိုင်းနေရကြောင်း အမည်မဖော်လို ကားသမားတစ်ဦးက သျှမ်းသံတော်ဆင့်ကိုပြောသည်။
မုံးကိုးမြို့မှ တဆင့် တရုတ်ပြည်သို့ ပို့ဆောင်မည့် ကြံများသည် မူဆယ်၊ နမ့်ခမ်း၊ မုံးပေါ်၊ ၁၀၅ မိုင်နှင့် မော်တောင်းဘက်မှ စိုက်ပျိုးသည့် ကြံများဖြစ်ကြောင်းသိရသည်။
အဆိုပါ လမ်းပိုင်းတစ်လျှောက်တွင် စစ်ကောင်စီတပ် အပြင် ကချင်လွတ်မြောက်ရေးတပ်မတော် (KIA) ၊ တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) ၊ ကိုးကန့်တပ်မတော် (MNDAA) ၊ သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA) နှင့် ဌာနေပြည်သူ့စစ်များ လှုပ်ရှားရာ နယ်မြေဖြစ်သည့် အပြင် တိုက်ပွဲများ မကြာခဏ ဖြစ်ပွားလေ့ရှိသည့် နယ်မြေလည်း ဖြစ်သည်။
