အာဏာသိမ်းစစ်ကောင်စီ တပ်ဖွဲ့သည် ယနေ့ (မေ ၁၂)ရက် နံနက် အစောပိုင်းတွင် သျှမ်းပြည်တောင်ပိုင်း ဖယ်ခုံမြို့နယ်အတွင်း တိုက်လေယာဥ်ဖြင့် ဗုံးများပစ်ချနေသဖြင့် ဒေသခံများထွက်ပြေးနေရကြောင်း စုံစမ်းသိရသည်။

သျှမ်းပြည်တောင်ပိုင်း ဖယ်ခုံမြို့နယ် ထီရီကျေးရွာအနီး အာဏာသိမ်း စစ်ကောင်စီ တပ်ဖွဲ့သည်နှင့် ဒေသခံပြည်သူ့ကာကွယ်ရေး တပ်ဖွဲ့ ဖယ်ခုံ PDF နှင့် ပူးပေါင်းတပ်ဖွဲ့တို့သည် ယနေ့ (မေ ၁၂)ရက် မနက် ၄နာရီ၀န်းကျင်တွင် တိုက်ပွဲဖြစ်ပွားခဲ့ကြောင်း၊ စစ်ကောင်စီဘက်မှ တိုက်လေယာဥ်ဖြင့် ဗုံးများပစ်ချနေကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“အင်းရဲ့ အရှေ့ဘက်မှာ မနက် ၄ နာရီကတည်းက ပစ်ခတ်သံတွေကြားရပါတယ်၊ စစ်ကောင်စီတွေဘက်က လက်နက်ကြီးရော တိုက်လေယာဥ်ဗုံးတွေရော ပစ်ချနေလို့ရွာထဲက ပြည်သူတွေ တော်တော်များများ ထွက်ပြေး တိမ်းရှောင်နေရတယ်၊ တစ်ရွာလုံးနီးပါးလောက်ပါပဲ” ဟု ဒေသခံအမျိုးသားတစ်ဦး သျှမ်းသံတော်ဆင့်ကို ပြောသည်။

အာဏာသိမ်းစစ်ကောင်စီတပ်ဖွဲ့နှင့် ဒေသခံပြည်သူ့ကာကွယ်ရေးတပ်ဖွဲ့တို့သည် နံနက် အာရုဏ်ဦးချိန် ကတည်းက ယခု မွန်းလွဲပိုင်း ၂ နာရီကျော်အချိန်ထိ တိုက်ပွဲဆက်လက်ပြင်းထန်နေသေးကြောင်းလည်း သတင်းသိရသည်။

တိုက်ပွဲဖြစ်ပွားမှုနှင့် ပက်သက်ပြီး PDF ဖယ်ခုံမှ တာဝန်ရှိသူ တစ်ဦးနှင့်ဆက်သွယ်မေးမြန်းရာ တိုက်ပွဲ များ ဖြစ်ပွားနေကြောင်းနှင့် မြေပြင်အနေအထားများကို အသေးစိတ်မသိရှိရသေးကြောင်း သျှမ်းသံတော်ဆင့်ကို ပြောသည်။ 

“ကျနော်တို့ ဖယ်ခုံတပ်ရင်းနဲ့ တိုက်ပွဲဖြစ်ပွားနေပါတယ်၊ ဒါပေမဲ့ ထိခိုက်ကျဆုံးမှု နဲ့ ပက်သက်ပြီးတော့ ကျနော်တို့ ဘက် သတင်းထုတ်ပြန်တာ မရှိသေးဘူး၊ ဒါကြောင့်မြေပြင်အနေအထားဆိုရင် အခုကပြည်သူတွေ ထွက်ပြေးနေ ရတယ်၊ အဓိကကတော့ ပြည်သူတွေ ဘေးကင်းအောင်ပဲ ကျနော်တို့ ဦးတည်လုပ်ဆောင်နေပါ တယ်” ဟု PDF Pekhon မှ ပြန်ကြားရေးတာဝန်ခံတစ်ဦးက သျှမ်းသံတော်ဆင့်ကို ပြောသည်။ 

လက်ရှိတွင် ဖယ်ခုံမြို့ အခြေစိုက် စစ်ကောင်စီတပ်ဖွဲ့ အမှတ် ၄၃၁ နှင့်  ၃၃၆ တို့မှ လက်နက်ကြီးနှင့် အရပ်လေး မျက်နှာသို့ ဦးတည်ချက်မရှိ ရမ်းသမ်းပစ်ခတ်နေမှုကြောင့် ဖယ်ခုံမြို့မှ လွယ်ပေါင်းကျေးရွာနှင့် လာလေကျေးရွာ တို့မှ ပြည်သူ့နေအိမ်များ အဆောင်အအုံများ ထိခိုက်ပျက်စီးရကြောင်းလည်း သတင်းသိရသည်။