သျှမ်းပြည်မြောက်ပိုင်း မူဆယ်မြို့ ဈေးရပ်ကွက်တွင် ယနေ့ (မေ ၁၀) မွန်းလွဲပိုင်း ၃ နာရီဝန်းကျင်တွင် စိုင်းညီ secondဖုန်း ဆိုင် တစ်ခု ဓားပြတိုက်ခံလိုက်ရကြောင်းစုံစမ်းသိရှိရသည်။
အဆိုပါ ဆိုင်တွင် အမည်မသိလက်နက်ကိုင် (၆) ဦးရောက်လာပြီး ဆိုင်တွင်းရှိပစ္စည်းများကို ဓားပြတိုက်လုယူသွားကြောင်း မူဆယ်မြို့ဒေသခံတစ်ဦးက သျှမ်းသံတော်ဆင့်ကို ပြောသည်။
“ လူက (၆) ယောက်လာတာ။ ကားနဲ့လာတာ။ ဆိုင်ထဲရှိတဲ့ ပစ္စည်းတွေကိုယူသွားတာ။ဆိုင်ရှင်ကို ဓားထောက်ပြီး ဓားပြတိုက် သွားတယ်။ ပစ္စည်းတန်ဖိုးတွေက စုစုပေါင်း သိန်း ၁၀၀၀ လောက်ရှိတယ်တဲ့။ အဲ့ဆိုင်က ဖုန်း Second ရောင်းဝယ်ရေးဆိုင် ဖြစ်တယ်” ဟု မူဆယ်မြို့ ဒေသခံ အမျိုးသားတစ်ဦးက ပြောသည်။
အဆိုပါဖုန်းဆိုင်သည် ဂျောင်ကျနေပြီး စည်ပင်ရုံးနှင့်နီးကြောင်း၊ လူသွားလူလာနည်းပါးသည့် နေရာဖြစ်ပြီး မိုးရွာနေသည့် အချိန်တွင် ဓားပြတိုက်ခံလိုက်ရကြောင်းသိရသည်။
“ လူထိခိုက်ဒဏ်ရာရရှိတာတော့မရှိသေးဘူး။ သူ့ဆိုင်က ဂျောင်ကျတယ်။ လူသွားလူလာသိပ်မရှိဘူး။ ပြီးတော့ သူ့ဆိုင်ကလည်း စည်ပင်ရုံးနဲ့လည်းနီးတယ်။ ဓားပြတိုက်ခံရတာက မိုးရွာတဲ့အချိန်ဖြစ်တယ်။ ပြီးတော့ လူသွား၊ လူလာ သိပ်မရှိတာလည်း ဖြစ်တာပေါ့။ သူ့ကိုတော့ ဓားထောက်ပြီး ဆိုင်ထဲကရှိတဲ့ တန်ဖိုးကြီးဖုန်းတွေကို ယူသွားတာ” ဟု မူဆယ်မြို့ ဒေသခံ အမျိုးသားကပြောသည်။
မူဆယ်မြို့သည် ပြီးခဲ့သည့် ဧပြီ ၂၂ ရက်တွင်လည်း လုယက်မှုမှ ပစ်ခတ်မှုဖြစ်ပွားခဲ့ပြီး ပြည်သူတစ်ဦး သေဆုံးသွားကြောင်း သိရသည်။
မူဆယ်မြို့သည် မကြာခဏ ဓားပြတိုက်မှုများဖြစ်ပွားလေ့ရှိသည့်ဒေသဖြစ်ပြီး လက်နက်ကိုင်အဖွဲ့စည်းများ လှုပ်ရှားသည့် ဒေသတစ်ခုလည်းဖြစ်သည်။
Leave a Comments