သျှမ်းပြည်တောင်ပိုင်း ညောင်ရွှေမြို့နယ် အင်းလေးဒေသမှ စစ်ကောင်စီ သတင်းပေးဟု နာမည်ထွက်နေသည့် ဒေသခံအမျိုးသားနှစ်ဦး အသတ်ခံရပြီးနောက် စစ်ကောင်စီတို့က အင်အားဖြည့်တင်းကာ စစ်ဆေးမှုများ တင်းကျပ်စွာ ပြုလုပ်နေကြောင်း စုံစမ်းသိရသည်။

ယနေ့ မေလ ၉ ရက်တွင် ညောင်ရွှေမြို့နယ် သန်းထောင်ဈေးအတွင်း ဈေးရောင်းနေသည့် စစ်တပ်သတင်းပေး ဒလန်ဖြစ်သူ နှင့် သားမက်ဖြစ်သူတို့သည် အမည်မသိလူတစ်စုတို့၏ သေနတ်ဖြင့် ပစ်သတ်ခြင်းကို ခံရပြီး ပွဲချင်း ပြီး သေဆုံးသွားကြောင်း သတင်းသိရသည်။ 

“သူတို့နှစ်ယောက်က ခမည်းခမက်တွေပေါ့၊ ဟဲယာရွာမမှာနေတယ်၊ ဒီနေ့ ဈေးရောင်းနေတုန်း ဈေးထဲမှာ အပစ်ခံ  လိုက်ရတာ၊ တခြား ပြည်သူတွေကလည်း သေနတ်သံကြားတာနဲ့ ဝပ်ကြတာဆိုတော့ ဘယ်သူဘယ်ဝါက လုပ်သွားမှန်းတော့ မသိလိုက်ဘူး၊ သူတို့နှစ်ယောက်တော့ ခေါင်းကိုသေနတ်ကျည်မှန်တဲ့ ဒဏ်ရာနဲ့ ပွဲချင်းပြီး သေသွားတယ်” ဟု အင်းလေးဒေသမှ အမည်မဖော်လိုသူ လူငယ်အမျိုးသားတစ်ဦးက သျှမ်းသံတော်ဆင့်ကို ပြောသည်။

အဆိုပါ သေနတ်ဖြင့်ပစ်သတ်ခံရသူ အမျိုးသား နှစ်ဦးသည် ဟဲယာရွာမမှ ဦးရဲမြင့် နှင့် ၎င်း၏ သမက်ဖြစ်သူ ကိုကျော်စွာ ဆိုသူဖြစ်ကြောင်း နှင့် ၎င်းတို့နှစ်ဦး သတင်းပေးမှုကြောင့် ဒေသအတွင်းမှ ပရဟိတသမားများနှင့် အမျိုးသမီးများအပါအဝင်ဒေသခံပြည်သူများ ဖမ်းဆီးခံရမှုရှိခဲ့ကြောင်း ဒေသခံများက ပြောသည်။

၎င်းတို့နှစ်ယောက် ပစ်သတ်ခံရမှုမတိုင်ခင် တစ်ပတ်အလိုတွင်လည်း ဒေသခံပြည်သူ့ကာကွယ်ရေးတပ်ဖွဲ့တစ်ဖွဲ့ မှ ကျည်ဆံတစ်ထောင့်နှင့်အတူ သတိပေးစာဖြင့် ကြိုတင်သတိပေးမှု ရှိခဲ့ကြောင်းလည်း ဒေသခံများထံမှ သိရ သည်။

“သူတို့နှစ်ယောက်ဆီကိုကျည်ဆံနဲ့ သတိပေးစာလည်း ပေးဖူးပါတယ်၊ ပြီးတော့ ရွာမ အုပ်ချုပ်ရေးမှူးဖြစ်သူ ဦးအောင်နိုင်ဦးခေါ် ကိုသားကြီးဆိုသူကိုလည်း ကျည်ဆံတစ်တောင့်နဲ့အတူ သတိပေးစာ ရောက်လာနေတာ တစ်ပတ်တောင်မရှိသေးဘူး၊ အခု ကိုသားကြီးလည်းအိမ်အပြင် မထွက်ရဲတော့ဘူး” ဟု အင်းလေးသား တစ်ဦးမှ သျှမ်းသံတော်ဆင့်ကို ပြောသည်။

လက်ရှိတွင်လည်း ၎င်းတို့နှစ်ဦး ပစ်သတ်ခံရပြီးနောက် အင်းလေးဒေသအတွင်း စစ်ကောင်စီအင်အား အများ အပြားရောက်ရှိလာပြီး စစ်ဆေးမှုများကို တင်းကျပ်စွာ လုပ်ဆောင်နေကြောင်းလည်း သတင်းသိရသည်။