သျှမ်းပြည်တောင်ပိုင်း၊ ရွာငံမြို့နယ် မြိုင်ကျေးရွာနှင့် ကျောက်ငှက်ကျေးရွာတို့တွင် အမျိုးသား(၃)ဦးထပ်မံ အသတ်ခံရပြီး၊ မေလအတွင်း (၉)အသတ်ခံရကြောင်း သတင်းရရှိသည်။

ဖြစ်စဉ်မှာ ပြီးခဲ့သည့် မေလ (၂၀)ရက် ညသန်းခေါင်ယံ အချိန် ကျောက်ငှက်ကျေးရွာတွင် အသက် (၃၀)ကျော် ပျူစောထီးအမျိုးသား တစ်ဦးနှင့် အသက် (၃၀)ကျော် ဒေသခံ အမျိုးသားတစ်ဦးကို ဒလန်ဟု ဆို၍ အမည်မသိ လက်နက်ကိုင်အဖွဲ့မှ လာရောက်သတ်ဖြတ်သွားခဲ့ကြောင်း သိရသည်။

အလားတူ ပြီးခဲ့သည့် မေလ (၁၈)ရက် ညအချိန် မြိုင်ကျေးရွာတွင်လည်း အမျိုးသားတစ်ဦးကို စစ်တပ်သတင်းပေး ဒလန်ဟုဆိုကာ သေနတ်ဖြင့် လာရောက်ပစ်ခတ်သွားကြောင်း သိရသည်။

“ရွာငံမှာက တပတ်တခါလောက် အသတ်ခံနေရတာ၊ စစ်တပ်သွားပြီး တပ်စွဲတဲ့ရွာတိုင်းလိုလို အသတ်ခံရတာ၊ ကျောက်ငှက်ကလည်း ပျူစောထီးတစ်ယောက်နဲ့ ဒလန်တစ်ယောက်ကို ဆွဲခေါ်ပြီး သတ်သွားတာတဲ့ မြိုင်ကျေးရွာမှာလည်း တစ်ယောက် အသတ်ခံရတယ်”ဟု ရွာငံဒေသခံ အသက် (၃၀)ဝန်းကျင် အမျိုးသားတစ်ဦးက ပြောသည်။

ထိုသို့ အသတ်ခံရပြီးနောက် စစ်ကော်မရှင်တပ်က ကျေးရွာအတွင်း တပ်စွဲခြင်း၊ အစစ်ဆေးတင်းကြပ်ခြင်း အပြင် ညဘက် ၈ နာရီနောက်ပိုင်း အပြင်မထွက်ရန်လည်း သတိပေးထားကြောင်း အဆိုပါ အမျိုးသားက ပြောသည်။

ယခုလက်ရှိ ရွာငံမြို့နယ်တွင် မေလ တစ်လအတွင်း အမျိုးသမီး တစ်ဦးအပါအဝင် ဒေသခံ (၉)ဦးကို စစ်တပ်သတင်းပေး ဒလန်ဟုဆို၍ အမည်မသိလက်နက်ကိုင် အဖွဲ့မှ သတ်ဖြတ်သွားခဲ့သည်။

ထို့အပြင် ရွာငံဒေသခံများသည် လုံခြုံရေးအရ စိုးရိမ်ပူပန်မှုများဖြင့် နေထိုင်နေရပြီး စစ်တပ်လာရောက် တပ်စွဲသည့် ကျေးရွာတွင်လည်း ပေါ်တာဆွဲခံရမည်ကိုစိုးရိမ်ခြင်း လူမှားအသတ်ခံရမည်ကို စိုးရိမ်နေကြကြောင်း အသက် (၂၀)ကျော်အရွယ်ရှိ လူငယ်အမျိုးသားတဦးကသျှမ်းသံတော်ဆင့်ကို ပြောသည်။

“ခုဆို ရွာငံမှာ မကြာခဏ အသတ်ခံရတော့ လန့်တယ်။ လူမှားအသတ်ခံရမှာလည်း ကြောက်တယ်။ စစ်တပ်လာရင်တောင် အိမ်ထဲ အိမ်ပြင်မထွက်ရဲဘူး စစ်သားတွေနဲ့လည်း စကားမပြောရဲဘူး ရွာထဲက အထင်မှားဖြစ်ပြီး သတင်းပေးလိုက်မှာ စိုးရိမ်တယ်။ ဒီခေတ်ကာလ အခြေအနေအရ ပေါ်တာဆွဲခံရမှာလည်း စိုးရိမ်တယ်။ တစ်ခါတလေ ရွာထဲ စစ်တပ်ရောက်လာရင် အိပ်လို့လည်း မပျော်ဘူး အလိုလိုနေရင်း ကြောက်နေရတယ်။”ဟု ၎င်းအမျိုးသားတဦးက ပြောသည်။

စစ်ကော်မရှင်တပ်သားများသည် ရွာငံမြို့မြောက်ဘက် ကျေးရွာများတွင် တပ်စွဲထားပြီး ဒေသခံများ၏ ကားများကို ချောဆွဲယူဆောင်ခြင်း ကားဆီဖြည့်ခိုင်းခြင်းများ လုပ်ဆောင်ကာ ကားပျက်သွားလျှင်လည်း ပျက်သည့်နေရာတွင် ထားခဲ့ကြသောကြောင့် ကားပိုင်ရှင်များက လိုက်ယူနေရကြောင်း ရွာငံကိုယ်တိုင်ကြုံတွေ့ရဒေသခံများက ဆိုသည်။

ပြီးခဲ့သည့် မေလ (၁၃)ရက်တွင်လည်း ရွာငံမြို့ ဈေးတန်းရပ်ကွက်တွင် စစ်ကော်မရှင်တပ် ကင်းစောင့်နေသည့် ကြားမှ အသက် (၄၀)ကျော်အရွယ်ရှိ လင်မယားနှစ်ဦးကို အမည်မသိလက်နက်ကိုင်တပ်ဖွဲ့မှ လာရောက် ပစ်ခတ်သတ်ဖြတ်သွားကြောင်း သိရသည်။

ယခု (၂၀၂၆) ခုနှစ် ဇန်နဝါရီလမှ မေလ (၅)လအတွင်း ပျူစောထီးများအပါဝင် ဒေသခံ(၂၀)ထက်မနည်း အသတ်ခံခဲ့ရကြောင်း သျှမ်းသံတော်ဆင့်၏ ဒေတာအချက်လက်များအရ သိရသည်။